ޓްރާންސްޕޯޓް މިނިސްޓްރީގެ ހުރިހާ ޚިދުމަތެއް ޑިޖިޓަލްކޮށް ލިބޭގޮތަށް ހަމަޖައްސައިފި
13 ނޮވެމްބަރު 2023 | ހޯމަ 02:58އެއްގަމު އަދި ކަނޑު އުޅަނދު ރަޖިސްޓްރީއާއި ގުޅޭ ހުރިޙާ ޚިދުމަތެއްވެސް އޮންލައިންކޮށް ލިބޭނެ
ޓްރާންސްޕޯޓް މިނިސްޓްރީން ބޭއްވި ހަރަކާތެއްގެ ތެރެއިން
ޓްރާންސްޕޯޓް މިނިސްޓްރީގެ ހުރިހާ ޙިދުމަތެއް ޑިޖިޓަލްކޮށް، އެއްތަނަކުން ލިބޭގޮތަށް ހަދައިފިއެވެ.
މިނިސްޓްރީގެ ޚިދުމަތްތައް މީގެ ކުރިން ހޯދުމަށް ފޯމު ޑައުންލޯޑު ކޮށްގެން ފުރައި ސްކޭންކުރުމަށްފަހު ޖެހެނީ އަޕްލޯޑު ކުރާށެވެ. ނަމަވެސް އާދިއްތަ ދުވަހު އަލަށް ތައާރަފްކުރި "ޓްރާންސްޕޯޓް އޮންލައިން" މެދުވެރިކޮށް މިނިސްޓްރީގެ ހުރިހާ ޚިދުމަތެއް އޮންލައިންކޮށް ލިބޭނެއެވެ. އެއްގަމާއި ކަނޑު އުޅަނދުތަކުގެ ރަޖިސްޓްރީއާ ގުޅޭ ހުރިހާ ޚިދުމަތެއް ވެސް އޭގެ ތެރޭގައި ހިމެނެއެވެ.
ޓްރާންސްޕޯޓް މިނިސްޓްރީން ދެމުންގެންދާ ޚިދުމަތްތައް ޑިޖިޓަލް ކުރުމާއި ގުޅޭގޮތުން މިނިސްޓަރު އާއިޝަތު ނަހުލާ ވިދާޅުވީ މިއީ ރައްޔިތުންނަށް ލިބިގެންދާ އިތުުރު ފަސޭހައަކަށްވެގެންދާނެ ކަމަށެވެ. އަދި ޑިޖިޓަލް ދުނިޔެއަކާ ދިމާލަށް ދިޔުމަކީ ޤައުމުތައް ކުރިއަރަމުންދާ އެއް ސަބަބު ކަމަށާއި މިނިސްޓްރީން މަސައްކަތް ކުރަނީ އެ އަމާޒަށް ކަމަށް މިނިސްޓަރު ވިދާޅުވިއެވެ.
ތައާރަފް ކުރެވިގެން ދިޔަ ޓްރާންސްޕޯޓް އޮންލައިން ނިޒާމަކީ ޓްރާންސްޕޯޓް މިނިސްޓްރީއާއި ރައްޔިތުންނާ ދެމެދު މުއާމަލާތް ކުރުމަށް އެޅިގެންދިޔަ މުހިންމު ފިޔަވަޅެއް ކަަމަށް އެ މިނިސްޓްރީން ބުނެެއެވެ.
ޓްރާންސްޕޯޓް މިނިސްޓްރީގެ ހުރިހާ ޚިދުމަތެއް ޑިޖިޓަލްކޮށްފައިވާއިރު އެ މިނިސްޓްރީން ވަނީ ޑިޖިޓަލް ލައިސަންސްގެ ޚިދުމަތްވެސް ތައާރަފްކޮށްފައެވެ.
