މުޅި ރާއްޖެ ލާމަރުކަޒުކޮށް ގެނައި ބޮޑުބަދަލާއެކު، އެކި ދާއިރާތަކުން ގައުމު ކުރިއަރާނެ: ރައީސް

މުޅި ރާއްޖެ ލާމަރުކަޒުކޮށް، ގެނައި ބޮޑުބަދަލާއެކު އެކި ދާއިރާތަކުން ގައުމު ކުރިއަރައިގެންދާނެ މަގުތައް މިހާރު ފަހިވެފައިވާކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.

ޖުމްހޫރީ ދުވަހުގެ މުނާސަބަތުގައި ދިވެހި ގައުމާ މުޚާތަބުކުރައްވައި، ރާއްޖޭގެ ހިންގުން ހުރިހާ ދާއިރާއަކުން ލާމަރުކަޒުކުރުމަށް ގާނޫނީގޮތުން ގެންނެވި ބަދަލުތަކަށް އިޝާރާތްކުރައްވައި ރައީސް ވިދާޅުވީ، ބާރުތައް އެއްތާކަށް ޖަމާކޮށްގެން ގައުމު ކުރިނާރާނެކަމަށެވެ. އަދި ރާއްޖޭގެ ހިންގުން ލާމަރުކަޒުކޮށް ގެންނެވި ބަދަލުތަކަށް އަލިއަޅުވާލައްވަމުން، ފެންވަރު ރަނގަޅު ތައުލީމާއި ސިއްހީ ފަރުވާ ހޯދޭނެ މަގަކީ ލާމަރުކަޒީ ނިޒާމުކަން އެމަނިކުފާނު ފާހަގަކުރެއްވިއެވެ. މި ސަކާރުން ފަށައިގެން ކުރިއަށްގެންދިޔަ ޓާރޝަރީ 5 ހޮސްޕިޓަލަކީ ސިއްހީ ދާއިރާއިން ހޯދުނު ވަށާޖެހޭ ހައްލެއްކަމަށާއި، ނަފްސާނީ ދުޅަހެޔޮކަން މުޅި ރާއްޖެއަށް އާންމުކުރުމުގެ މަޝްރޫއުވެސް ސަރުކާރުން ފައްޓަވާފައިވާކަން އެމަނިކުފާނު ފާހަގަކުރެއްވިއެވެ.

ރާއްޖޭގެ ކުޅިވަރުގެ ތާރީޚުގައިވެސް ބައިނަލްއަގުވާމީ މުބާރާތްތަކުން ރާއްޖެއަށް އެންމެ ގިނަ ކާމިޔާބީތައް ހޯދިފައިވަނީ ވޭތުވެ ދިޔަ 5 އަހަރުކަން ރައީސް ފާހަގަކުރެއްވިއެވެ. އަދި އޭގެ އިތުރުން، ތަފާތުކުރުމެއްނެތި ކޮންމެ މީހަކަށްވެސް ކުޅިވަރު ހަރަކާތްތަކުގައި ބައިވެރިވެވޭގޮތަށް ބަދަލު ގެންނަވާފައި ވާކަމަށާއި، ވަކިވަކި ކުޅުންތެރިން ތަމްސީލުކުރާ ކުޅިވަރުތަކާއި ޓީމް ކުޅިވަރުތަކަށް އަމާޒުކޮށް ހުނަރުވެރިކަން އިތުރުކުރުމުގެ ޕްރޮގްރާމްތައްވެސް ފަށާފައިވާކަމަށް ވިދާޅުވިއެވެ.

އިޖުތިމާއީ ޚިދުމަތް ލާމަރުކަޒުކޮށް ގެންނެވި ބަދަލުތައް ފާހަގަކުރައްވަމުން ރައީސް ވިދާޅުވީ، އިޖުތިމާއީ ޚިދުމަތްތައް ފެންވަރު ރަނގަޅުކޮށް މުޅި ރާއްޖެއަށް ފުޅާކުރުމަށްޓަކައި، ދައުލަތުގެ ބެލުމުގެ ދަށުގައި ތިބޭ ކުދިންނަށް ޚާއްސަކޮށް ރާއްޖޭގެ ހަތް ސަރަހައްދެއްގައި އަމާންވެށި ގާއިމުކޮށްފައި ވާކަމަށާއި، ނުކުޅެދުންތެރިކަން ހުންނަ ފަރާތްތަކަށް ބޭނުންވާ ކަންކަން ވަށާޖެހޭ ނިޒާމެއްގެ ތެރެއިން ފަހިކޮށްދީ، އެފަރާތްތަކަށް ދޭ އެލަވަންސް ބޮޑުކޮށްފައި ވާކަމަށެވެ.