ގަލަޓަސަރާއި ބަލިކޮށް ބަޔާން ދެ ވަނަ ބުރަށް

ޔުއެފާ ޗެމްޕިއަންސް ލީގުގެ ގަރޫޕް ސްޓޭޖުގެ ހަތަރު ވަނަ މެޗުގައި ގަލަޓަސަރާއި ބަލިކޮށް، ޖަރުމަނުގެ ބަޔާން މިއުނިކް ދެ ވަނަ ބުރުން ޖާގަ ހޯދައިފި އެވެ.

ބަޔާންގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގައި ދެ ޓީމުން ވެސް ލަނޑު ޖަހާފައި ވަނީ ދެ ވަނަ ހާފުގަ އެވެ. މެޗުގެ ފުރިހަމަ ވަގުތު ހަމަވާން ދިހަ މިނެޓަށް ވެފައި ވަނިކޮށް، އެންމެ ފުރަތަމަ ލަނޑު ޖަހައި ލީޑު ނެގީ ވެސް ބަޔާނުންނެވެ. ޔޯޝުއާ ކިމިކް ތަނަވަސްކޮށްދިން ފުރުސަތެއްގައި އެ ޓީމަށް ލީޑު ނަގައިދިނީ ޓޮޓެންހަމް ދޫކޮށް އެ ޓީމަށް ބަދަލުވެ މޮޅަށް ކުޅެމުން އަންނަ އިންގްލެންޑުގެ ކެޕްޓަން ހެރީ ކޭން އެވެ. އޭގެ ހަ މިނެޓު ފަހުން ބަޔާންގެ ދެ ވަނަ ލަނޑު ޖަަހައި ލީޑު ފުޅާ ކޮށްދިނީ ވެސް ކޭން އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ މަތީސް ޓެލް އެވެ. ބަޔާނުން ދެ ލަނޑު ޖެހި ފަހުން، މެޗުގެ އިތުރު ވަގުތުގައި ގަލަޓަސަރާއިގެ ހަމައެކަނި ލަނޑު ޖެހީ ބަދަލު ކުޅުންތެރިޔެއްގެ ގޮތުގައި ކުޅެން ނިކުތް ސެޑްރިކް ބަކަމްބޫ އެވެ.

މޮޅާއެކު ބަޔާނުން ދެ ވަނަ ބުރުން ޖާގަ ހޯދީ މިހާތަނަށް ކުޅުނު ހަތަރު މެޗުން މޮޅުވެ، 12 ޕޮއިންޓާއެކު އެވެ. އެ ޓީމަށް ބާކީ އަދި ދެ މެޗު އޮންނާނެ އެވެ. ބަޔާން ހިމެނޭ ގްރޫޕް އޭގެ ދެ ވަނައިގައި އެފްސީ ކޯޕަންހޭގަން އޮތްއިރު، ތިން ވަނައިގައި އޮތީ ގަލަޓަސަރާއި އެވެ.