ޣައްޒާގެ މައި ހޮސްޕިޓަލު ކަމުގައިވާ އައްޝިފާ ހޮސްޕިޓަލަށް ކޮންމެހެން ބޭނުންވާ ސިއްހީ ސާމާނު ފޯރުކޮށްދެވިފައިވާކަމަށް ޑަބްލިޔުއެޗްއޯ އާއި ޔޫއެން އެޖެންސީ ފޮރ ފަލަސްތީނިއަން ރެފިޔުޖީ ކޭމްޕުން ބުނެފިއެވެ.
ދެ ފަރާތުން ނެރެފައިވާ ބަޔާނުގައި ބުނެފައިވަނީ މިއީ ހަނގުރާމަ ފެށުނު ފަހުން އެ ހޮސްޕިޓަލަށް ސިއްހީ އެހީ ފޯރުކޮށްދިން ދެވަނަ ފަހަރުކަމަށެވެ. ނަމަވެސް އަދިވެސް ބޭނުންވާވަރާ ގާތަށް ވެސް ތަކެތި ފޯރުކޮށްދެވިފައި ނުވާކަމަށް ބުނެއެވެ. ބަޔާނުގައި އިތުރަށް ބުނެފައިވަނީ ފަލަސްތީނުގައި ސިއްހީ ޚިދުމަތްދޭ ތަންތަނުގެ ހާލަތު ވަރަށް ބޮޑަށް ދަށްވެފައިވާކަމަށާއި ތެޔޮ ނުލިބުމުގެ ސަބަބުން ހޮސްޕިޓަލްތައް ހިންގުމަށް އިންތިހާއަށް ދަތިވަމުން އަންނަކަމަށެވެ.
އައްޝިފާ ހޮސްޕިޓަލަކީ ޣައްޒާގައި ހުންނަ އެންމެ ބޮޑު މެޑިކަލް ފެސިލިޓީ ކަމަށްވާއިރު، އެ ހޮސްޕިޓަލަކީ މިހާރު އިސްރާއީލުގެ ހަމަލާތަކުން ހިމާޔަތް ހޯދަމުން އަންނަ އެތައް ހާސް ބަޔަކު ދިރިއުޅެމުން އަންނަ ހޮސްޕިޓަލެކެވެ.
ތެލާއި ފެނާއި ބޭހުގެ ދަތިކަމުގެ ސަބަބުން މިހާރުވެސް ހަލާކުވާން ކައިރިވެފައިވާ އެ ހޮސްޕިޓަލުގެ ސޯލާ ޕެނަލް ސިސްޓަމަށް ވެސް މިދިޔަ އަންގާރަ ދުވަހު އިސްރާއީލު ސިފައިން ވަނީ ހަމަލާދީފައެވެ.
އައްޝިފާ ހޮސްޕިޓަލާއި ކައިރީގައި ހުންނަ އިމާރާތްތަކަށް އިސްރާއީލުން ހަނގުރާމަ ފެށުނީއްސުރެ ހަމަލާތައް އަންނަނީ ދެމުންނެވެ.
އިސްރާއީލުން ބުނާގޮތުގައި ހަމާސްގެ މައި އަސްކަރީ އޮޕަރޭޝަން މަރުކަޒު ހުންނަނީ އައްޝިފާ ހޮސްޕިޓަލުގެ ދަށުގައެވެ. ނަމަވެސް މިކަން ފަލަސްތީނުގެ ކަމާބެހޭ ފަރާތްތަކާއި އިންސާނީ ހިދުމަތްތެރިން ދޮގުކުރެއެވެ.
