ޗެމްޕިއަންސް ލީގު މެޗުގައި ހާލަންޑަށް ކުޅެވޭނެކަން ޔަގީނެއް ނޫން

ޗެމްޕިއަންސް ލީގުގައި އަންގާރަ ދުވަހުގެރޭ ޗެމްޕިއަން މެންޗެސްޓަރ ސިޓީ ކުޅޭ މެޗުގައި ފޯވާޑް ހާލަންޑަށް ކުޅެވޭނެކަން ޔަގީން ނުވާކަމަށް އެ ކްލަބުން ބުނެފިއެވެ.

ހާލަންޑަށް ކުޅެވޭނެކަމާމެދު ޝައްކު އުފެދުނީ، ޕްރިމިއަރ ލީގުގައި އެންމެ ފަހުން 6-1ން ބޯންމައުތު އަތުން މޮޅުވި މެޗުގައި ލިބުނު އަނިޔާއާ ގުޅިގެންނެވެ. އެ މެޗުގައި ލިބުނު އަނިޔާގެ ސަބަބުން ހާލަންޑް ބަދަލުކުރިއެވެ. ހާލަންޑްގެ ފިޓްނަސްއާ ގުޅޭގޮތުން ކޯޗު ޕެޕް ގާޑިއޯލާ ބުނީ، އެކަމާ ގުޅޭގޮތުން ޑޮކްޓަރާ ވާހަކަ ދައްކާނެ ކަމަށާއި, މިވަގުތު އެއްޗެއް ބުނަން ނޭނގޭ ކަމަށެވެ. ގާޑިއޯލާ ބުނީ ޑޮކްޓަރުގެ ނަސޭހަތް އަޑުއަހާނެ ކަމަށާއި, ހާލަންޑް ތައްޔާރުކަމަށް ޑޮކްޓަރު ބުނެފިނަމަ މެޗުގައި ބޭނުންކުރުމާމެދު ވިސްނާނެ ކަމަށެވެ.

ސިޓީއަށް ކުރިއަށް އޮތީ ޗެމްޕިއަންސް ލީގުގައި ސްވިޒަރލެންޑްގެ ޔަންގް ބޯއީސްއާ ވާދަކުރާ މެޗެވެ. މެޗުން މޮޅުވެއްޖެނަމަ، ބާކީ ދެމެޗު އޮއްވައި ސިޓީއަށް ދެވަނަ ބުރުގެ ޖާގަ ޔަގީންވާނެއެވެ. ގްރޫޕް ޖީގައި ފުރަތަމަ ތިން މެޗު ސިޓީން ވަނީ ކާމިޔާބުކޮށްފައެވެ. މިސީޒަނުގައި މިހާތަނަށް ހާލަންޑް ވަނީ ސިޓީއަށް 13 ގޯލް ޖަހައިދީފައެވެ.