ފްރާންސް ލީގުގައި ރެނެސްއާ ދެކޮޅަށް ކުޅުނު މެޗުން މޮޅުވެ، ނީސް އަލުން އެއް ވަނަ އަށް ޖެހިލައިފި އެވެ.

ފްރާންސް ލީގުގައި ހޮނިހިރު ދުވަހުގެ ރޭ ކުޅުނު މެޗުން މޮޅުވެ، ޕެރިސް ސެއިންޓް ޖާމަން (ޕީއެސްޖީ) އެއް ވަނަ އަށް ޖެހިލިއިރު، ހޯމަ ދުވަހު ކުޅުނު މެޗުން މޮޅުވެ އެއް ވަނަ އަށް ޖެހިލުމުގެ ފުރުސަތު ނީސް އަށް އޮތެވެ. ނީސްގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ.

މެޗުގައި ނީސް އިން ފުރަތަމަ ލަނޑު ޖަހައި ލީޑު ނެގީ ފުރަތަމަ ހާފުގެ 45 ވަނަ މިނެޓުގަ އެވެ. އެ ޓީމަށް ލީޑު ނަގައިދިނީ ފޯވާޑް ޖެރެމީ ބޮގާ އެވެ. ދެ ވަނަ ހާފަށް ނިކުމެ ރެނެސް އިން ވަނީ ނަތީޖާ ހަމަހަމަ ކުރުމަށް މަސައްކަތް ކޮށްފަ އެވެ. ނަމަވެސް، މެޗުގެ 87 ވަނަ މިނެޓުގައި އެ ޓީމުގެ ގޯލް ކީޕަރު ސްޓީވް މަންޑަންޑާ އަތުން ވަނީ ބައި ކޮޅަށް ލަނޑެއް ވަދެފަ އެވެ.

މޮޅާއެކު ނީސް އިން ވަނީ އެއް ވަނައިގައި ޕޮއިންޓެއްގެ ލީޑު ނަގައިފަ އެވެ. މިހާތަނަށް ކުޅުނު 11 މެޗުން އެ ޓީމު ވަނީ 25 ޕޮއިންޓު ހޯދައިފަ އެވެ. މި ސީޒަންގެ ފްރާންސް ލީގުގައި މިހާތަނަށް ކުޅުނު އެއްވެސް މެޗަކުން އެ ޓީމު ބަލިވެފައެއް ނުވެ އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އެންމެ ފަހުގެ ޗެމްޕިއަން ޕީއެސްޖީ އަށް ލިބެނީ 24 ޕޮއިންޓެވެ.