އަލް ރިޔާދު ބަލިކޮށް، އަލް އަހްލީ ސައުދީ ހަތަރު ވަނަ އަށް

ސައުދީ ޕްރޯ ލީގުގައި އަލް ރިޔާދާ ދެކޮޅަށް ކުޅުނު މެޗުން މޮޅުވެ، އަލް އަހްލީ ސައުދީން ލީގު ތާވަލްގެ ހަތަރު ވަނަ އަށް ޖެހިލައިފި އެވެ.

ލީގުގައި އަލް ރިޔާދާ ދެކޮޅަށް ކުޅުނު މެޗުން އަލް އަހްލީ ސައުދީ މޮޅުވީ 3-0 އިންނެވެ. މެޗު ފަށައިގެން ދެ ވަނަ މިނެޓުގައި އެ ޓީމުން ވަނީ ލަނޑު ޖަހައި ލީޑު ނަގައިފަ އެވެ. އެ ޓީމަށް ލީޑު ނަގައިދިނީ ފެރާސް އަލްބްރިކާން އެވެ. އޭގެ ފަހުން މެޗުގެ 26 ވަނަ މިނެޓުގައި އެ ޓީމަށް ލީޑު ފުޅާ ކޮށްދިނީ ގެބްރީ ވެއިގާ އެވެ. އަލް އަހްލީ ސައުދީގެ ތިން ވަނަ ލަނޑު އެ ޓީމުން ޖެހީ ދެ ވަނަ ހާފުގެ ކުރީ ކޮޅު އެވެ. ދެ ވަނަ ހާފު ފަށައިގެން ހަތް ވަނަ މިނެޓުގައި އެ ޓީމުގެ ތިން ވަނަ ލަނޑު ޖެހީ ރިޔާދު މާރޭޒް އެވެ. މި މެޗުގައި އަލް އަހްލީ ސައުދީގެ ގޯލް ކީޕަރު އެޑުއާޑް މެންޑީ ވަނީ މުހިންމު ބޯޅަތަކެއް މަތަ ކޮށްފަ އެވެ. ލީގުގައި އެންމެ ފަހުން އެ ޓީމު ކުޅުނު ފަސް މެޗުގައި ވެސް އޭނާގެ ފަރާތުން ވަނީ މޮޅު ކުޅުމެއް ފެނިފަ އެވެ.

މޮޅާއެކު އަލް އަހްލީ ސައުދީން ހަތަރު ވަނައިގައި އޮތީ މިހާތަނަށް ކުޅުނު 12 މެޗުން 25 ޕޮއިންޓު ހޯދައިގެންނެވެ. 12 މެޗުގެ ތެރެއިން އެ ޓީމު ވަނީ އަށް މެޗުން މޮޅުވެފަ އެވެ. ތިން މެޗުން ބަލިވެފައިވާއިރު، އެއް މެޗުން ވަނީ އެއްވަރުވެފަ އެވެ.