އަމާޒަކަށްވީ 2024ގެ ނިޔަލަށް މުޅި ރާއްޖެ ގުޅާލުން، އައު ލޯންޗުތައް ބަނުމުގެ މަސައްކަތް ވެސް ވާނީ ކޮށްފައި - އާޒިމް
6 ނޮވެމްބަރު 2023 | ހޯމަ 09:03ޚިދުމަތް ފުޅާކުރުމަށް އިތުރު ލޯންޗްތައް ބަނުމުގެ މަސައްކަތް ކޮށްފައިވާނެ ކަމަށް އާޒިމް ވިދާޅުވި
އާރުޓީއެލް ފެރީގެ ޚިދުމަތް
އަމާޒަކަށްވީ 2024 ނިމެންވާއިރަށް ދަތުރުފަތުރުގެ ނިޒާމުން މުޅި ރާއްޖެ ގުޅާލުން އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
އާޒިމް އެފަދައިން ވިދާޅުވީ ރާއްޖެޓީވީގެ ފަލަ ސުރުޚީ ޕްރޮގްރާމްގައި ވާހަކަފުޅު ދައްކަަވަމުންނެވެ. އާޒިމް ވިދާޅުވީ އިންތިޚާބީ ރައީސް ޑރ.މުހައްމަދު މުއިއްޒުގެ ސަރުކާރަކީ ޤައުމީ ގޮތެއްގައި ވިސްނާ ސަރުކާރެއް ކަމަށް ވެއްޖެނަމަ، މި ސަރުކާރުން ފެށި އާރްޓީއެލްގެ ނިޒާމް ކުރިއަށް ގެންދާނެ ކަމަށެވެ.
ދަތުރުފަތުރުކުރުމުގެ ނިޒާމް ކުރިން އޮތް ގޮތަށް ބަލާއިރު އެމްޓީސީސީގެ އިތުރުން އެމްޕީއެލް އާއި އަމިއްލަ ފަރާތްތަކުން ވެސް އެ މަސައްކަތް ކުރަމުން އައި ކަމަށް އާޒިމްގެ ވާހަކަފުޅުގައި ފާހަގަކުރެއްވިއެވެ. މިހާރު ދަތުރުފަތުރުގެ ނިޒާމް ހަރުދަނާވެފައި އޮތީ ޕްލޭންތަކަކާއެކު ކުރި މަސައްކަތުގެ ނަތީޖާއެއްގެ ގޮތުން ކަމަށް އޭނާ ވިދާޅުވިއެވެ. އަދި އެކަން ކުރަމުން ދަނީ ސެންޓްރަލައިޒްކޮށްގެން ކަމަށާއި، އެ މަަސައްކަތް ކުރަމުންދަނީ އެކަމަށް ބޭނުންވާ ވަސީލަތްތަކާއި ވެސް އެކުގައި، ތަޖުރިބާ ހުރި މީހުންނާއި އެކުގައި ކަމަށް އާޒިމް ވިދާޅުވިއެވެ. އެކަމަށް ބޭނުންވާ އައިޕީ ސޮފްޓްވެއަރ ވެސް ހޯދާފައިވާނެ ކަމަށް އާޒިމް ވިދާޅުވިއެވެ. އަދި އެ ނިޒާމް ފުރިހަމަ ކުރުމަށް މިހާރުވެސް އިތުރު މަސައްކަތްތައް ކުރަމުންދާ ކަމަށް އާޒިމް ވިދާޅުވިއެވެ.
އެމްޓީސީސީގެ ޚިދުމަތްތަކަކީ އާއްމުން ބަލައިގަންނަ ޚިދުމަތްތަކެއްކަން އާޒިމް ވަނީ ފާހަގަކުރައްވާފައެވެ.
އަދި ޚިދުމަތް ފުޅާކުރުމަށް އިތުރު ލޯންޗުތައް ބަނުމުގެ މަސައްކަތް ކޮށްފައިވާ ކަމަށާއި، ފެރީގެ ޚިދުމަތް ހައިސްޕީޑް ދަތުރުފަތުރަށް ބަދަލުކޮށް ދަތުރުފަތުރުގެ ނިޒާމް ކުރިއަރުވަން މަސައްކަތްކޮށްފައިވާނެ ކަމަށް އާޒިމް ވިދާޅުވިއެވެ.
ދަތުރުފަތުރުގެ ނިޒާމް މި ވެރިކަމާއި ހިސާބަށް އައި އިރު އޮތީ ވަރަށް ނާޒުކު ހާލަތެއްގައި ކަމަށް އާޒިމް ވިދާޅުވިއެވެ. އެހެންނަމަވެސް މިއަދު އެކަން ބަދަލުވެފައިވާކަން ފާހަގަކުރައްވާ އާޒިމް ވިދާޅުވީ އާރްޓީއެލްގެ މަސައްކަތަކީ މިއަދު އާއްމުންގެ އިތުބާރު ލިބިފައިވާ ބަރޯސާވެވޭފަދަ ނިޒާމެއް ކަމަށެވެ. އަދި އާރްޓީއެލް ދަތުރުތައް ފެށުމުން ދަތުރުތަކަށް އޮތް ޑިމާންޑަށް ބަލާލުމުން އާއްމުން މި ޚިދުމަތަށް ބޭނުން ވެފައި ތިބިކަން ވަރަށް ބޮޑަށް އެނގިގެންދާ ކަމަށް އޭނާ ވިދާޅުވިއެވެ.
