މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ހުށަހެޅިފައި އޮތުމަކީ އައު ރައީސަކު ހުވާ ކުރެއްވުމަށް ހުރަހެއް އޮތްކަމެއް ނޫން: އޭޖީ އޮފީސް
އައު ރައީސް ހުވާ ކުރެއްވުމަކީ މަޖިލީހުން ބަހުސްކޮށް، ގޮތް ނިންމަންޖެހޭ ކަމެއް ނޫން
ނަޝީދުގެ އިތުބާރު ނެތްކަމުގެ މައްސަލައިގައި އެމްޑީޕީން ސުޕްރީމް ކޯޓަށް ހުށަހަޅާފައިވާ މައްސަލައިގެ އަޑުއެހުމުގެ ތެރެއިން
މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ހުށަހެޅިފައި އޮތުމަކީ އައު ރައީސުލްޖުމްހޫރިއްޔާއަކު ހުވާކުރެއްވުމަށް ހުރަހެއް އޮތްކަމެއް ނޫންކަމަށް ބަންޑާރަނާއިބުގެ އޮފީހުން ބުނެފިއެވެ.
ބަންޑާރަނާއިބުގެ އޮފީހުން އެހެން ބުނެފައިވަނީ އިތުބާރު ނެތްކަމުގެ މައްސަލައިގައި އެމްޑީޕީން ސުޕްރީމް ކޯޓަށް ހުށަހަޅާފައިވާ މައްސަލައިގެ އަޑުއެހުމުގައި ފަނޑިޔާރު ހުސްނުއްސުއޫދު ކުރެއްވި ސުވާލަކަށް ޖަވާބު ދެއްވަމުންނެވެ.
މި އަޑުއެހުމުގައި ފަނޑިޔާރު ސުއޫދު ވަނީ އައު ރައީސް ހުވާ ކުރެއްވުމުގެ މަސައްކަތަށް ހުރަސް އެޅިދާނެތޯ ސުވާލު ކުރައްވާފައެވެ.
އެ ސުވާލުގެ ޖަވާބުގައި އޭޖީ އޮފީހުގެ ވަކީލު ވިދާޅުވީ، އިންތިޚާބީ ރައީސް ހުވާ ކުރެއްވުމުގެ މަސައްކަތް މަޖިލީހުގެ ޤަވާއިދުގެ 205 މާއްދާގެ (ރ)ގައި ބަޔާންކޮށްފައިވާ ބާވަތުގެ މައްސަލަތަކަށް ނުފެތޭކަމަށެވެ.
ރައްޔިތުންގެ މަޖިލީހުގެ ރައީސްގެ އިތުބާރު ނެތް ކަމުގެ މައްސަލައެއް މަޖިލީހަށް ހުށަހަޅާފައިވަނިކޮށް، އެ މައްސަލަ ކުރިއަށް ނުގެންގޮސް އެހެން އެއްވެސް މަސައްކަތެއް ކުރިއަށް ނުގެންދެވޭނެކަން މަޖިލީހުގެ ގަވާއިދުގެ 205 މާއްދާގެ (ރ)ގައި ވަނީ ބުނެފައެވެ. އޭގެ ތެރޭގައި ހިމެނެނީ މަޖިލީހުން ބަހުސްކުރާ މައްސަލަތަކާއި ގޮތް ނިންމަންޖެހޭ މައްސަލަތަކުގެ ވާހަކައެވެ.
އެހެންނަމަވެސް އައު ރައީސް ހުވާ ކުރެއްވުމަކީ މަޖިލީހުން ބަހުސްކޮށް، ގޮތް ނިންމަންޖެހޭ ކަމަކަށް ނުވާއިރު، މި މައްސަލައާ ގުޅިގެން އައު ރައީސް ހުވާ ކުރެއްވުމުގެ މައްސަލައަކަށް ހުރަހެއް ނެތްކަމަށް ވެސް ވަކީލު ވިދާޅުވިއެވެ. ސަބަބަކީ އެ މާއްދާގައި ބުނަނީ މަޖިލީހުން ބަހުސްކޮށް، ގޮތް ނިންމަންޖެހޭ އެއްވެސް މަސައްކަތެއް ކުރިއަށް ނުގެންދެވޭނެ ވާހަކަ ކަމަށްވާތީއެވެ.
މަޖިލީހުގެ ރައީސްގެ އިތުބާރު ނެތްކަމުގެ މައްސަލައެއް ހުށަހަޅާފައި ވަނިކޮށް އެ މައްސަލަ އެޖެންޑާ ނުކުރައްވާ ނަޝީދު ރިޔާސަތުގައި އިންނަވައިގެން މުއިއްޒު ހުވާކުރައްވާނަމަ އެކަމާ މެދު ޤާނޫނީ ގޮތުން ސުވާލު އުފައްދަވާނެ ކަަމަށް ބައެއް ފަރާތްތަކުން ކުރިން ބުނެފައިވެއެވެ.
އިންތިޚާބީ ރައީސް، ޑރ. މުހައްމަދު މުއިއްޒު ރައީސް ކަމުގެ ހުވާކުރެއްވުން އޮތީ ނޮވެމްބަރު މަހުގެ 17 ވަނަ ދުވަހު ޖުމްހޫރީ މައިދާނުގައި އެވެ. އެ ދުވަހުގެ ޖަލްސާގައި 3500 އެއްހާ ފަރާތްތަކުން ބައިވެރިވާނެ ކަމަށް އިންތިޚާބީ ރައީސްގެ އޮފީހުން ބުނެ އެވެ.
