އިޓާލިއަން ލީގުގައި ސެލަނިޓާނާއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ނަޕޯލީން ލީގު ތާވަލްގެ ހަތަރު ވަނަ އަށް ޖެހިލައިފި އެވެ.

ލީގުގައި ހޮނިހިރު ދުވަހުގެ ރޭ ސެލަނިޓާނާގެ ދަނޑުގައި ކުޅުނު މެޗު ނަޕޯލީން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި ނަޕޯލީން އެއް ލަނޑު ޖެހިއިރު، އަނެއް ލަނޑު ޖެހީ ދެ ވަނަ ހާފުގަ އެވެ.

މެޗު ފަށައިގެން 13 ވަނަ މިނެޓުގައި އެ ޓީމަށް ލީޑު ނަގައިދިނީ ގިއަކޮމޯ ރަސްޕަރޯޑީ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ސްޓެނިސްލާވް ލޮބްޓްކާ އެވެ. ނަޕޯލީގެ ދެ ވަނަ ލަނޑު އެ ޓީމުން ޖެހީ މެޗުގެ ދެ ވަނަ ހާފުގައި، ފުރިހަމަ ވަގުތު ހަމަވާން އަށް މިނެޓަށް ވެފައި ވަނިކޮށެވެ. މަތިއަސް އޮލިވެރާ ތަނަވަސްކޮށްދިން ފުރުސަތެއްގައި އެ ލަނޑު ޖެހީ އެލްފް އެލްމާސް އެވެ. މެޗުގައި އޭނާ ކުޅެން ނުކުމެފައި ވަނީ ވެސް ބަދަލު ކުޅުންތެރިޔެއްގެ ގޮތުގަ އެވެ.

މިއީ މި ސީޒަންގެ އިޓާލިއަން ލީގުގައި ނަޕޯލީގެ ހަ ވަނަ މޮޅެވެ. މިހާތަނަށް ކުޅުނު 11 މެޗުގެ ތެރެއިން ހަ މެޗުން އެ ޓީމު މޮޅުވެފައިވާއިރު، ތިން މެޗުން އެއްވަރުވެ، ދެ މެޗުން ވަނީ ބަލިވެފަ އެވެ. ލީގުގައި މިހާތަނަށް ލިބުނު 21 ޕޮއިންޓާއެކު އެ ޓީމު އޮތީ ހަތަރު ވަނައިގަ އެވެ. މިދިޔަ ސީޒަންގައި ނަޕޯލީގެ ފަރާތުން މޮޅު ކުޅުމެއް ފެނުނު ނަމަވެސް، އައު ކޯޗާއެކު މި ސީޒަންގެ މިހާތަނަށް ނަތީޖާތައް ވަނީ ދަށްވެފަ އެވެ.