ފުޅާ ދާއިރާއެއްގައި ޑްރަގް ވިޔަފާރި ކުރާކަމަށް ތުހުމަތުކުރެވޭ މީހަކު ދޫކޮށްލީ ރަނގަޅަށް ނޫންކަމަށް ހައިކޯޓުން ނިންމައިފި
ދެފަހަރެއްގެ މަތިން އޭނާގެ ބަންދުގެ މުއްދަތުވެސް ޖަހާފައިވޭ
ހައި ކޯޓް
މަސްތުވާތަކެތި އެތެރެކޮށް އެތަކެތީގެ ވިޔަފާރި ކުރާކަމަށް ތުހުމަތުކުރެވޭ މައްސަލައިގައި ހިމެނޭ މީހަކު ދޫކޮށްލުމަށް ހޯރަފުށީ މެޖިސްޓްރޭޓު ކޯޓުން ނިންމާފައިވާ ނިންމުން ދިވެހިރާއްޖޭގެ ހައިކޯޓުން ބާތިލުކޮށްފިއެވެ.
މި މައްސަލައިގައި ކަން ހިނގާފައިވާ ގޮތަށް ބަލާއިރު، ހއ ހޯރަފުށީ އިބްރާހީމް މުޙައްމަދު އިސްވެހުރެ އިތުރު މީހަކާއި ގުޅިގެން އެރަށަށް މަސްތުވާތަކެތި އެތެރެކޮށް އެތަކެތީގެ ވިޔަފާރި ކުރާކަމަށް ތުހުމަތުކުރެވޭ މައްސަލައިގައި ކޯޓު އަމުރެއްގެ ދަށުން 07 ސެޕްޓެމްބަރ 2023 ދުވަހު އިބްރާހީމް މުޙައްމަދު ހައްޔަރުކޮށްފައިވެއެވެ.
އަދި އޭނާގެ މައްޗަށް ތުހުމަތުކުރެވޭ މައްސަލައިގެ ހެކި ނައްތާލަފާނެކަމަށް ފެންނާތީއާއި ކުށުގެ ޢަމަލު ތަކުރާރު ކޮށްފާނެކަމަށް ފެންނާތީ އާއި، މުޖުތަމަޢުގެ ސަލާމަތަށް ނުރައްކަލެއް ކުރިމަތިވެދާނެކަމަށް ފެންނާތީ އޭނާ ބަންދުކޮށްދިނުމަށް އެދި ހޯރަފުށީ މެޖިސްޓްރޭޓު ކޯޓަށް ދައުލަތުން ހުށައެޅިއެވެ.
އެއަށްފަހު ދެފަހަރެއްގެ މަތިން އޭނާގެ ބަންދުގެ މުއްދަތުވެސް ޖަހާފައިވެއެވެ. އެއަށްފަހު ތިންވަނަ ފަހަރަށް ހުށައެޅިއިރު ދައުލަތުން ވަނީ އޭނާ ޝަރީއަތް ނިމެންދެން ބަންދުކޮށްދިނުމަށް އެދިފައެވެ.
އެހެންނަމަވެސް އެފަހަރު ކޯޓުން ނިންމީ އޭނާ ޝަރުތުތަކާއެކު ބަންދުން ދޫކޮށްލުމަށެވެ. ވުމާއެކު ދައުލަތުން އެ ނިންމުން ހައިކޯޓުގައި އިސްތިއުނާފު ކުރީއެވެ.
ހައިކޯޓުގައި މި މައްސަލަ ނިންމެވީ ފަނޑިޔާރު ދީބާނާޒު ފަހުމީ، ފަނޑިޔާރު ހުޒައިފާ މުޙައްމަދު އަދި ފަނޑިޔާރު އަހުމަދު ޝަކީލެވެ.
ހައިކޯޓުގެ ފަނޑިޔާރުންގެ އިއްތިފާޤުން ވަނީ އޭނާ ބަންދުން ދޫކޮށްލުމަށް ނިންމި އަމުރު ބާތިލުކޮށް، ބަންދާމެދު ގޮތެއް ކަނޑައެޅުމަށް 7 ދުވަހުގެ ތެރޭގައި ދަށު ކޯޓަށް ހުށައަޅައިފިނަމަ ހައިކޯޓުގެ ޙުކުމުގައި ބަޔާންކޮށްފައިވާ ކަންކަމުގެ އަލީގައި އޭނާގެ ބަންދާމެދު އަލުން ގޮތެއް ކަނޑައަޅަންޖެހޭކަމަށް ނިންމަވާފައެވެ.
ހައިކޯޓުގެ ނިންމުމުގައި ބަޔާންކޮށްފައިވާ ގޮތުގައި ހެކިބަސްދޭން ހުރިމީހަކަށް ނުފޫޒު ފޯރުވުމުގެ އިޙްތިމާލުއޮތް މިންވަރާއި، ކުށަށް އިޢުތިރާފު ވެފައިވުމާއި ނުވުމާއި، މުޖުތަމަޢުގައި އޭނާގެ ބާރާއި ނުފޫޒުއޮތް މިންވަރަށް ރިޢާޔަތްކޮށް، އިބްރާހީމް މުޙައްމަދުގެ ބަންދާމެދު ކުރިން ގޮތް ނިންމާފައިވާ ޙާލަތު ބަދަލުވިގޮތް މެޖިސްޓްރޭޓު ކޯޓުގެ އަމުރުން ސާފެއް ނުވެއެވެ.
