ނަޝީދުގެ އިތުބާރު ނެތްކަމުގެ މައްސަލަ: މާދަމާ ޖަލްސާއެއް ބާއްވައިދިނުމަށް މަޖިލީހުގައި އެދެން އެމްޑީޕީ ޕީޖީ ގްރޫޕުން ނިންމައިފި

މަޖިލީހަށް މިހާރު ހުށަހަޅާފައިވާ، ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށް ގެންދިއުމަށްޓަކައި ބުރާސްފަތި ދުވަހު ޖަލްސާއެއް ބާއްވައިދިނުމަށް މަޖިލީހުގެ އިދާރާގައި އެދުމަށް އެމްޑީޕީގެ ޕީޖީ ގްރޫޕުން ނިންމައިފިއެވެ.

އެމްޑީޕީ ޕީޖީ ގްރޫޕުން އެގޮތަށް ނިންމާފައިވަނީ ބުދަ ދުވަހުއެވެ.

ބުދަ ދުވަހު އެމްޑީޕީން ވަނީ މި މައްސަލަ މަޖިލީހުން ކުރިއަށް ނުގެންދާތީ އެކަމާ އިހުތިޖާޖު ވެސް ކޮށްފައެވެ. އެގޮތުން ނަޝީދަށް އިތުބާރު ގެއްލިފައިވާކަމާއި، އިތުބާރު ގެއްލުމުން އެންމެ ރަނގަޅު ގޮތަކީ އަމިއްލަފުޅަށް އިސްތިއުފާ ދެއްވުންކަމަށް ލިޔެފައިވާ ބެނަރ ހިފައިގެން މެންބަރުން ވަނީ އިޖުތިޖާޖު ކުރައްވާފައެވެ.

މިކަމާ ގުޅޭގޮތުން ރާއްޖެއެމްވީއާ ވާހަކަފުޅު ދައްކަވަމުން ހުޅުމާލޭ ދާއިރާގެ މެންބަރު އަލީ ނިޔާޒު ވިދާޅުވީ، ބުދަ ދުވަހުގެ 11:00 ޖެހިއިރު އެމްޑީޕީގެ ޕީޖީ ގްރޫޕުގެ ބައްދަލުވުމެއް ބާއްވަވައި، މި މައްސަލައިގައި ކުރިއަށްދާނެ ގޮތަކާއި ގުޅޭގޮތުން މަޝްވަރާ ކުރައްވާފައިވާ ކަމަށެވެ.

އަދި ބުރާސްފަތި ދުވަހު ޖަލްސާއެއް ބާއްވައިދިނުމަށް އެދުމަށް ނިންމާފައިވާ ކަމަށާއި، މި މައްސަލަ ވަކި ކޮޅެއްގައި ޖެހެންދެން އެމްޑީޕީން އިހުތިޖާޖު ކުރިއަށް ގެންދާނެކަމަށް ވެސް އޭނާ ވިދާޅުވިއެވެ.

ނަޝީދަށް މެންބަރުންގެ އިތުބާރު ނެތް ކަން ސާފުކޮށް އެނގިވަޑައިގަންނަވާއިރު، ގަދަބާރުން މަޖިލީހުގައި އެމަނިކުފާނު ހުންނެވުމުގެ ބޭނުމެއް ނެތް ކަމަށް އެމްޑީޕީގެ މެންބަރުން ގެންދަވަނީ ވިދާޅުވަމުންނެވެ.

އޭގެ އިތުރުން، އިތުބާރު ނެތްކަމުގެ މައްސަލައަކީ އިތުބާރު ގެއްލޭ ފަދަ ގިނަ ކަންކަން ރައީސް ނަޝީދުގެ ފަރާތްޕުޅުން ފެނުމުގެ ސަބަބުން ހުށަހެޅި މައްސަލައެއް ކަމަށާއި، އެ މައްސަލަ ނިމުމުން 24 ގަޑިއިރު މަޖިލީހުގައި ތިއްބަވައިގެން އަދި އިތުރު ޖަލްސާތައް އެޖެންޑާ ކުރައްވައިގެން ނަމަވެސް، މަސައްކަތްތައް ނިންމަވާނެކަމަށް ވެސް އެމްޑީޕީ ޕީޖީ ގުރޫޕުން ވަނީ ބުނެފައެވެ.

ރައްޔިތުންގެ މަޖިލީހުގެ އާދިއްތަ ދުވަހާއި ހޯމަ ދުވަހުގެ ޖަލްސާއަށް މަޖިލީހުގެ ރައީސް ނަޝީދު ވަކިކުރުމުގެ މައްސަލަ އެޖެންޑާކުރިއެވެ. އެހެންނަމަވެސް ސިއްހީ ހާލަތު ހުރިގޮތުން ކަމަށް ވިދާޅުވެ، މަޖިލީހުގެ ނާއިބު ރައީސް އީވާ އަބްދުﷲ މަޖިލީހަށް ދެ ދުވަހުވެސް ވަޑައިގެންފައެއް ނުވެއެވެ.

މި މައްސަލަ ބުދަ ދުވަހުގެ ޖަލްސާއަށް އެޖެންޑާ ކުރި ނަމަވެސް އީވާ އަބްދުﷲ ސަލާމް ފޮނުއްވުމާ ގުޅިގެން އެ ޖަލްސާ ވެސް ވަނީ ކެންސަލް ކޮށްފައެވެ.

އެމްޑީޕީން މިހާރު މި މައްސަލަ ސުޕްރީމް ކޯޓަށް ހުށައަޅާފައިވާއިރު، އަންނަ ހޯމަ ދުވަހަށް ވަނީ ސުޕްރީމް ކޯޓުގައި މި މައްސަލަތާވަލުކޮށްފައެވެ.