ބާސްކެޓް ބޯޅަ ފަޅިއެއްގެ މަތީގައި އެއްތަނުން އަނެއް ތަނަށް ދިޔަ ޗިއާން، ބައިނަލްއަޤުވާމީ ފަތާފެންގަނޑަށް!

ގަދަ ހިތްވަރާއި ސާބިތުކަމާއެކު ދިރިއުޅުމުގެ މައިދާނުގައި ކުރިއަށް ދިއުމަށްޓަކައި، އަޣުލަބިއްޔަތުން މިނަން ގެންގުޅޭ ނާޅިން މިނާކަށް ކޮންމެހެން ނުޖެހެއެވެ. އުފާވެރި ދިރިއުޅުމެއް އުޅުމަށްޓަކައި، ދިރިއުޅުމުގެ ކަންކަން 'ފުރިހަމަ' ވާން ޖެހޭ ކަމަށް ބުނާ އިރު، އެ ފުރިހަމަކަން އެތައް ގޮތަކަށް، އެތައް ގިންތިއަކާއި ފަންތިއެއްގައިވެސް މާނަ ކުރެވިދާނެއެވެ. ދާދި މިދާކަށް ދުވަހު، ކުޅިވަރުގެ ދުނިޔެއިން ގިނަ ބައެއްގެ ސަމާލުކަން ހޯދި އެކަކީ ޗައިނާގެ ޕެރަލިމްޕިއަންއެއް ކަމަށް ވާ ޗިއާން ހޮންގްޔެންއެވެ.

ދުނިޔޭގެ އެކި ހިސާބުތަކުން ޗިއާންއަށް ސަމާލުކަން ހުއްޓެން ފެށީ ސަބަބެއް ނެތިއެއް ނޫނެވެ. ދިރިއުޅުމުގެ މައިދާނުގައި ޗިއާން ކުރަމުން ދާ ދަތުރަކީ، ހަށިގަނޑުގެ ހުރިހާ ގުނަވަނެއް ހަމައަށް ހުރި މީހުންނަށްވެސް އެތައް ފިލާވަޅެއް ދަސްކޮށްދޭނެ ދަތުރެކެވެ. ރަށްފުށުގައި، އިންތިހާ ފަޤީރު ދިރިއުޅުމެއް އުޅެމުން އައި ޗިއާންގެ ޙަޔާތުގެ ދަތުރުގައި އޭނާއަށް ކުރިމަތިލާން ޖެހުނު ގޮންޖެހުންތަކަކީ، ކޮންމެކޮންމެ މީހަކަށް އެހާ ސާބިތުކަމާއެކު ބަރުދާސްތުކޮށް، ކަޑަތު ކުރެވޭނެ ގޮންޖެހުންތަކެއް ނޫނެވެ. ބާސްކެޓް ބޯޅައެއްގެ މަތީގައި ދުނިޔެ ބިނާ ކުރަމުން ދިޔަ ޗިއާންއަކީ މިއަދު، ބައިނަލްއަޤުވާމީ ކުޅިވަރު މައިދާނުގައި، އޭނާގެ ޤައުމު ތަމްޞީލު ކުރާ ފަޚްރުވެރި ޤައުމީ ދަރިއެކެވެ.

ޗިއާން އުފަންވީ ޗައިނާގެ ހުޅަނގުދެކުނުގެ ޕްރޮވިންސްއެއް ކަމަށް ވާ ޔުނާންގައި އޮންނަ އެކަހެރި އަވަށަކަށެވެ. ވަރަށް ހަގު ޢުމުރެއްގައި، ޗިއާންގެ ދިރިއުޅުން ބަދަލުވެގެން ދިޔައީ 2000 ވަނަ އަހަރު ހިނގި އެކްސިޑެންޓެއްގައެވެ. ކާރު އެކްސިންޑެންޓްގައި ޗިއާންގެ 2 ފައިވެސް ބުރިކޮށްލަން ޖެހުނެވެ. އޭރު އޭނާގެ ޢުމުރަކީ އެންމެ 4 އަހަރެވެ.

ފުރޮޅުލީ ގޮނޑިއެއް ގަނެވޭނެ ފަދަ ތަނަވަސްކަމެއް، ޗިއާންގެ ޢާއިލާގެ އަތުގައި ނެތުމުގެ ނަތީޖާއަކަށް ވީ، ކޮޓަރީގެ ހަތަރު ފާރުގެ އެތެރޭގައި ޗިއާން ޤައިދުވުމެވެ. އެގޮތުގައި ދުވަސްތައް ގުނަމުން ދަނިކޮށް ޗިއާންގެ ދިރިއުޅުން ބަދަލުކޮށްލަދިން މޭސްތިރިއަކީ އޭނާގެ ކާފައެވެ. އެތެރެ ހޮއެކޮށް އޮންނަ ބާސްކެޓްބޯޅައެއްގެ މަތީގައި މީހާ ބެލަންސްކޮށްގެން އެއްތަނުން އަނެއް ތަނަށް ދާން ޗިއާންއަށް ދަސްކޮށްދިނީ އެ ކާފައެވެ. ކާފަގެ ވާހަކަތައް ކިޔައިދެމުން ދިޔައިރު ޗިއާންގެ މޫނުމަތިން އެ ފެނުނު އުފާވެރިކަން، ކިތަންމެ ހައި ވެސް ސާފެވެ.

އެހާ ހިސާބުން ޗިއާން މަޝްހޫރުވެގެން ދިޔައީ 'ބާސްކެޓްބޯލް ގަރލް'ގެ ގޮތުގައެވެ. ޗައިނާއާއި ބޭރުގެ މީޑިއާތަކުގައިވެސް އޭނާގެ ވާހަކަ ޖެހިއެވެ. ނަތީޖާއަކަށް ވީ، ޗައިނާގައި ނުކުޅެދޭ މީހުންގެ ޖަމިއްޔާއަކާއި އެފަދަ އެތައް ބައެއްގެ ސަމާލުކަން، ޗިއާންއަށް ހުއްޓިގެން ދިއުމެވެ.

ފެތުމުގެ ރޮނގުން މީހުން ތަމްރީނު ކުރަމުން ދާ ޗޯންގް ހޮންގްހޫއަށް ޗިއާން ތަޢާރަފުވީ 2007 ވަނަ އަހަރުގެ ތެރޭގައެވެ. ޗޯންގްއަކީ ނުކުޅުދުންތެރިކަން ހުންނަ ގިނަ ޢަދަދެއްގެ ކުދިންނާއެކުގައި މަސައްކަތް ކޮށްފައި ހުރި ކޯޗެކެވެ.

ފަތާފެންގަނޑު ތެރޭގައި މިނިވަންކަމާއެކު ކޮޅުކޮޅަށް ހެލިފެލިވެލާ އުޅެވުނެއް ކަމަކު، ޢާންމު ފަތާފެންގަނޑުތަކުގައި، ނުވަތަ ޢާންމުންގެ ތެރޭގައި އުޅުމަށް ޗިއާން ފަސްޖެހޭ ފަހަރުތައް ކުރިމަތިވިއެވެ.

އެ ފަދަ ހުރިހާ ނުތަނަވަސްކަމަކާ ކުރިމަތިލައި، އިތުރު ގަދަ ހިތްވަރަކާއެކު ޗިއާން ފެތުމުގެ ތަމްރީނުތައް ވަރުގަދަ ކުރިއެވެ. މިހާރު ޢުމުރުން 27 އަހަރު ފުރިފައި ވާ ޗިއާންއަށް ޚާއްޞަކޮށްގެން، ކޯޗް ޗޯންގް ވަނީ އެތައް ތަމްރީނުތަކެއް ފަރުމާކޮށްދީފައެވެ. އެތައް އިސްތިރާޖެއް ތައްޔާރުކޮށްދީފައެވެ.

ޗައިނާގެ ޝީޖިއާންގް ޕްރޮވިންސްގައި ކުރިއަށް ދާ އޭޝިއަން ޕެރާ ގޭމްސްގެ މައިދާނުގައި ހުރެވުމަކީވެސް މިއަދު ޗިއާންއަށް ލިބޭ ފަޚްރެކެވެ. ކާމިޔާބެކެވެ. ނަމަވެސް، އޭނާ ޢަމާޒު ހިފީ، އޭނާއަށް މިހާތަނަށް ހޯދިފައި ނުވާފަދަ ކާމިޔާބެއް ހޯދުމަށެވެ. ބުރާސްފަތި ދުވަހު މުބާރާތުގައި ވާދަ ކުރި ޗިއާން ވަނީ އަންހެނުންގެ 100 މީޓަރު ބްރެސްޓްސްޓްރޯކްގެ ގަދަ 10 އަކުން ޖާގަ ހޯދާފައެވެ. ބުރާސްފަތި ދުވަހުގެ މުބާރާތުގައި ޗިއާންއަށް ލިބުނީ 9 ވަނަ މަޤާމު ކަމުގައި ވީ ނަމަވެސް، އެހާ ހިސާބަށް އޭނާ ކުރި ދަތުރަކީ އެތައް ބައެއްގެ ތަޢުރީފާއި ލޯބި އޭނާއަށް ވެދުން ކުރަމުން ދަތުރެކެވެ.