އިތުބާރު ނެތްކަމުގެ މައްސަލަ ހުށަހަޅަން އޮއްވާ، އެ މައްސަލަ ކުރިއަށް ނުގެންގޮސް ސަޕްލިމެންޓްރީ ބަޖެޓުގެ މަސައްކަތް އެޖެންޑާކޮށްފި
ބަޖެޓާއި ސަޕްލިމެންޓްރީ ބަޖެޓުގެ މަސައްކަތް އެޖެންޑާގައި ހިމަނާފައި ވަނީ މަޖިލީހުގެ ރައީސްގެ މޭޒުން ހުށަހަޅާކަމެއްގެ ގޮތުގަ
މަޖިލީހުގެ ރައީސް މުހައްމަދު ނަޝީދު
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ހުށަހަޅަން އޮއްވާ، އެ މައްސަލަ ކުރިއަށް ނުގެންގޮސް ސަޕްލިމެންޓްރީ ބަޖެޓުގެ މަސައްކަތް އެޖެންޑާކޮށްފި އެވެ.
އަންގާރަ ދުވަހުގެ ޖަލްސާއަށް އެޖެންޑާކޮށްފައިވަނީ 2023 ވަނަ އަހަރަށް ލަފާކުރާ ސަޕްލިމަންޓްރީ ބަޖެޓް ހުށަހެޅުމަށެވެ. އަދި 2024 ވަނަ އަހަރަށް ލަފާކުރާ ދައުލަތުގެ ބަޖެޓްގެ މައްސަލަ ވެސް ވަނީ އެޖެންޑާކޮށްފައެވެ. މިގޮތަަށް މަޖިލީހުގެ އެޖެންޑާ އާއްމުކުރައްވާފައި މި ވަނީ ފިނޭންސް މިނިސްޓަރ އިބްރާހިމް އަމީރު ރާއްޖޭގައި ނޫޅުއްވާކަން މަޖިލީހަށް އަންގަވާފައި ވަނިކޮށްކަމަށް ރާއްޖެޓީވީ އަށް ވަނީ އިތުބާރު ހުރި ގޮތަކަށް މައުލޫމާތު ލިބިފައެވެ.
ރައްޔިތުންގެ މަޖިލީހުގެ ރައީސްގެ އިތުބާރު ނެތް ކަމުގެ މައްސަލައެއް މަޖިލީހަށް ހުށަހަޅާފައިވަނިކޮށް، އެ މައްސަލަ ކުރިއަށް ނުގެންގޮސް އެހެން އެއްވެސް މަސައްކަތެއް ކުރިއަށް ނުގެންދެވޭނެކަން މަޖިލީހުގެ ގަވާއިދުގެ 205 މާއްދާގެ (ރ)ގައި ވަނީ ބުނެފައެވެ. އެމްޑީޕީން ވަނީ އެ މާއްދާގައި ބުނެފައިވާ ގޮތުގައި އިތުބާރު ނެތް ކަމުގެ ގަރާރެއް ޖަލްސާއަށް ހުށަހަޅާފައި ވާނަމަ އެ ވަގުތު މަޖިލީހަށް ހުށަހެޅިފައިވާ އެހެން އެއްވެސް ކަމަކާ މެދު ބަހުސް ކުރެވޭނީ ނުވަތަ ގޮތެއް ނިންމޭނީ އެ ގަރާރާ މެދު ގޮތެއް ނިންމުމަށް ފަހުގައިކަން ފާހަގަކޮށްފައެވެ. އެހެންކަމުން މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ކުރިއަށް ނުގެންގޮސް އެހެން އެއްވެސް މައްސަލަ އެއް ކުރިއަށް ގެންދާނަމަ މަޖިލީހުގައި ބައިވެރި ނުވުމަށް އެމްޑީޕީގެ ޕީޖީ ގްރޫޕުން ވަނީ ނިންމާފައެވެ.
ބަޖެޓާއި ސަޕްލިމެންޓްރީ ބަޖެޓުގެ މަސައްކަތް އެޖެންޑާގައި ހިމަނާފައި ވަނީ މަޖިލީހުގެ ރައީސްގެ މޭޒުން ހުށަހަޅާކަމެއްގެ ގޮތުގައެވެ.
