ތަފާތު މަންޒަރެއް: ރަށު ރައްޔިތުންނަށް ވަގުތުން މެޗު ދައްކައިދިނުމުގައި ޕްރިންސިޕަލް!

އިންސާނާގެ ދުނިޔެވީ ޙަޔާތުގައި، އެމީހަކަށް ލިބިފައިވާ މަޤާމަކާއި، އާރާއި ބާރު، އަދި ޢިއްޒަތާއި ޝަރަފަކީ އަބަދު އެއްވެސް މީހަކަށް ލިބިފައި އޮންނާނެ ކަންކަމެއް ނޫނެވެ. އެހެން ނަމަވެސް، އެކަންކަމާއެކު ވެސް އޭނާ ކޮށްދޭ ޚިދުމަތަކީ އަބަދުގެ އަބަދަށް ދެމި ހުންނާނެ ހަނދާންތަކެވެ. ކޮންމެ މަޤާމެއްގައި ހުރި ނަމަވެސް، ތިމާ އަކީ އެހެން މީހުންނަށް ޚިދުމަތް ކުރާ، އެހެން މީހުންނަށް އިޙުތިރާމް ކުރާ މީހަކަށް ވާން ޖެހެ އެވެ. އެފަދަ މީހުން އަޅުގަނޑުމެންގެ މި މުޖުތަމުގައި ވެސް އުޅެ އެވެ.

ވޮލީ ބޯޅަ އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމުކޮށްދެން ސްކޫލުތަކުގެ ދަރިވަރުންނަށް ބާއްވަމުން އަންނަ އިންޓަ ސްކޫލް ވޮލީ ބޯޅަ މުބާރާތުން ތަފާތު މަންޒަރެއް ވަނީ ފެނިފަ އެވެ. ގިނަ ސްކޫލުތަކަކުން މިއަހަރުގެ މުބާރާތުގައި ވާދަކުރާއިރު، އަތޮޅު ތެރެއަށް ނިސްބަތްވާ ނުވަ ސްކޫލެއް ވާދަކުރެ އެވެ. އޭގެ ތެރެއިން ވެސް ފ.އަތޮޅު މަދަރުސާ އިން ވަނީ ދެ އުމުރުފުރާއެއްގެ، ހަތަރު ކެޓަގަރީގައި ބައިވެރިވެފަ އެވެ. އެއީ 14 އަހަރުން ދަށުގެ އަންހެން، ފިރިހެން އަދި 16 އަހަރުން ދަށުގެ އަންހެން އަދި ފިރިހެން ބައެވެ. މިކަހަލަ މުބާރާތްތަކުގައި އަތޮޅުތެރޭގެ ސްކޫލްތަކުން ވާދަކުރާއިރު، އެ މެޗުތައް ބެލުމަަކީ އެ ރަށެއްގައި ތިބޭ ރައްޔިތުން އަދި ވަކިން ޚާއްސަކޮށް ބެލެނިވެރިން ކުރަން ބޭނުންވާނެ ކަމެކެވެ.

ފ.އަތޮޅު މަދަރުސާގެ މެޗުތައް ރަށުގައި ތިބި ބެލެނިވެރިން އަދި ރައްޔިތުންނަށް ދެއްކުމަށް އިސްނެންގެވީ އެ މަދަރުސާގެ ޕްރިންސިޕަލް ޢަބްދުއް ސައްތާރު އިސްމާއީލް އެވެ. މުބާރާތުގައި އެ ސްކޫލުން ކުޅޭ ހުރިހާ މެޗެއް، ލައިވް ކުރުމުގައި ހަރަކާތްތެރި ވަނީ ޕްރިންސިޕަލް އެވެ. ޕްރިންސިޕަލް ވިދާޅުވި ގޮތުގައި އެކަމަށް އިސްނެންގެވީ، އެ ސްކޫލުގެ މެޗުތައް ބެލެނިވެރިން ބަލަން ބޭނުންވާތީ، ބެލެނިވެރިން އަދި ރައްޔިތުންނަށް އެ މެޗުތައް ދެއްކުމުގެ ބޭނުމަގަ އެވެ. ފޯނު ސްޓޭންޑެއް ބަހައްޓައިގެން، ކޮންމެ މެޗެއް ލައިވް ކުރުމުގައި ޕްރިންސިޕަލް ހަރަކާތްތެރިވެވަޑައިގަންނަވަ އެވެ. އެ ސްކޫލުގެ ދެ މެޗު އެއް ވަގުތާ ދިމާވެއްޖެ ނަމަ، އެކަމަށް އެހެން އިންތިޒާމެއް ވެސް ޕްރިންސިޕަލް ވަނީ ހަމަޖައްސަވައި ދެއްވައިފަ އެވެ.

މީގެ އިތުރުން ވެސް ޕްރިންސިޕަލްގެ ފަރާތުން ފެންނަނީ ތަފާތު މަންޒަރެކެވެ. މެޗުތައް ކުޅޭ ވަގުތު މެޗު ލައިވް ކުރަމުންދާއިރު ވެސް، ސްކޫލު ދަރިވަރުންނަށް ހިތްވަރު ދެއްވަ އެވެ. މެޗުގެ ދެ ސެޓުގެ ދެމެދުގައި ދަރިވަރުންނާ ވާހަކަ ދައްކަވަ އެވެ. ހިތްވަރު ދެއްވަ އެވެ. މެޗު ނިމުމާާއެކު ދަރިވަރުންގެ ގާތަށް ވަޑައިގަންނަވަ އެވެ. އެއަށްފަހު އެ މެޗުން ޕްރިންސިޕަލަށް ފާހަގަވެވަޑައިގަންނަވާ ކަންކަން ދަރިވަރުންނާ ޙިއްސާކުރައްވަ އެވެ. ރަނގަޅު ކުރަންވީ ކަންކަން ބުނެދެއްވަ އެވެ. އެއާ ވިދިގެން، ދަރިވަރުންނަށް ސަޕޯޓު ދިނުމަށް ވީހާ ވެސް ގިނަ މީހުން ދަނޑަށް ދިޔުމަށް ޕްރިންސިޕަލް ބާރު އަޅުއްވަ އެވެ. ސަޕޯޓަރުންގެ ކަންކަން މެނޭޖުކުރުމުގައި ވެސް އެންމެ އިސްކޮށް އުޅުއްވަނީ ޕްރިންސިޕަލް އެވެ.

މިއީ ހަމަގައިމު ވެސް ތަފާތު މަންޒަރަކަށް ވާނެ އެވެ. އެކަން މުބާރާތުގެ މެޗުތައް ބެލުމަށް ދަނޑަށް ދާ މީހުންނާއި، މުބާރާތުގެ އެކި ކަންކަމުގައި އުޅޭ މީހުން ވެސް ފާހަގަ ކޮށްފައިވެ އެވެ. ޕްރިންސިޕަލެއްގެ ފަރާތުން، އެ ފެންނަނީ ރިވެތި ނަމޫނާ އެކެވެ. ސްކޫލް ދަރިވަރުންނަށް ހިތްވަރު ދެއްވުމާއި، އެ ކުދިންގެ ޙަރަކާތްތައް ރަށު ރައްޔިތުންނާއި ބެލެނިވެރިންނާ ހަމައަށް ގެނެސްދިނުމުގައި ވަރުބަލިކަމެއް ނެތި ޙަރަކާތްތެރި ވަނީ، ސްކޫލާއި، ދަރިވަރުންގެ މައްޗަށް އޮންނަ ލޯތްބެއްގެ ސަބަބުންނެވެ.