އުޅަނދުފަހަރުގެ ސަލާމަތާއި ރައްކާތެރިކަން ކަށަވަރުކުރުމަށް 35 ސަރވޭޔަރުން ތަމްރީނުކޮށްފި
28 އޮކްޓޯބަރު 2023 | ހޮނިހިރު 08:26ސަރވޭޔަރުންގެ ވަޒީފާއަކީ، ހަމައެކަނި ވަޒީފާއަކަށްވުރެ ބޮޑަށް މީހުންގެ ފުރާނައާއި އުޅަނދުފަހަރުގެ ރައްކާތެރިކަމާ ގުޅިފައިވާކަމެއް
ސަރވޭޔަރުން ތަމްރީނުކުރުމަށް ކުރިއަށްގެންދިޔަ ޕްރޮގްރާމް ނިންމުމުގެ ރަސްމިއްޔާތުގެ ތެރެއިން
އުޅަނދުފަހަރުގެ ސަލާމަތާއި ރައްކާތެރިކަން ކަށަވަރުކުރުމަށް ބޭނުންވާ 35 ސަރވޭޔަރުން ތަމްރީނުކޮށްފިއެވެ.
ޓްރާންސްޕޯޓު މިނިސްޓްރީގެ ފަރާތުން ކުރިއަށް ގެންދިޔަ މި ޕްރޮގްރާމަކީ، އުޅަނދުފަހަރުތަކާ ގުޅޭގޮތުން ހަދާފައިވާ ގާނޫނުތަކާއި ގަވާއިދުތަކާއި، ދަތުރުފަތުރުގެ ދާއިރާއާ ގުޅުންހުރި ގާނޫނުތަކާއި ގަވާއިދުތަކަށް ހޭލުންތެރިކުރުމަށް ހިންގުނު ޕްރޮގްރާމެކެވެ. އަދި މި ޕްރޮގްރާމުގެ ސަބަބުން ރައްކާތެރިކަން އިތުރަށް ކަށަވަރުކުރެވޭނެ ކަމަށާއި، ސަރވޭތަކާއި ސަރވޭކުރާ މީހުންގެ ފެންވަރު ރަނގަޅުވާނެކަމަށް މިނިސްޓްރީން މައުލޫމާތުދެއެވެ.
މި ޕްރޮގްރާމާ ގުޅޭގޮތުން ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރު އަހުމަދު ޒުހައިރު ވިދާޅުވީ، މި ޕްރޮގްރާމު ފުރިހަމަކުރުމަށް ފަސޭހަވިނަމަވެސް އޭގެ ފަހުން އަންނަ ޒިންމާ ވަރަށް ބޮޑުކަމަށެވެ. އެގޮތުން އުޅަނދާއި، އެ އުޅަނދުން ދަތުރުކުރާ މީހުންނާއި، އެއިން އުފުލާ މުދާ ރައްކާތެރިކުރުމުގައި ސަރވޭޔަރުންގެ ދައުރު ބޮޑުކަމަށް އޭނާ ވިދާޅުވިއެވެ.
މީގެ އިތުރުން ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރު އަލީ ސާލިހު ވިދާޅުވީ، ސަރވޭޔަރުންގެ ވަޒީފާއަކީ، ހަމައެކަނި ވަޒީފާއަކަށްވުރެ ބޮޑަށް މީހުންގެ ފުރާނައާއި މުދަލާއި އުޅަނދުފަހަރުގެ ރައްކާތެރިކަމާ ގުޅިފައިވާކަމެއް ކަމަށެވެ. އެހެންކަމުން މި ޒިންމާ ވަރަށް ރަނގަޅަށް އަދާކުރަންޖެހޭ ކަމަށާއި، އެއްވެސް ކަމެއްގައި ފަރުވާކުޑަކޮށް ދޫކޮށްލުން އެއީ ގިނަ ބައެއްގެ ރައްކާތެރިކަމާ ގުޅިފައިވާ ކަމެއް ކަމަށެވެ.
މި ޕްރޮގްރާމުގައި މެރިން ޕޮލިސްއާއި، ކޯސްޓްގާޑާއި، މުއާސަލާތާގުޅުންހުރި ސެޝަންތައް، އަދި ކަނޑުމަތީގެ ހާދިސާތަކާގުޅޭ ސެޝަންތައް ކުރިއަށް ގެންގޮސްފައިވެއެވެ. އަދި ރަށްރަށުގައި ތިބެގެންވެސް އުޅަނދުފަހަރު ސަރވޭ ކުރެވޭނެގޮތުގެ ތަމްރީން ބައިވެރިންނަށް ދީފައިވެއެވެ.
މި ޕްރޮގްރާމު ކުރިއަށްގެންގޮސްފައި ވަނީ މިމަހުގެ 22ން 26ށެވެ.
