ޤަވާއިދާ ޚިލާފަށް ލިޔެކިޔުންތައް ނައްތާލާ ކުންފުނިތަކާމެދު ޤާނޫނީ ފިޔަވަޅު އަޅާނަން: ޕީސީބީ

ކަނޑައެޅިފައިވާ ޤާނޫނުތަކާއި ގަވާއިދާ ޚިލާފަށް އެއްވެސް ކުންފުންޏަކުން ރަސްމީ އެއްވެސް ލިޔެކިޔުމެއް ނައްތާލާފައިވާނަމަ، އެކަމުގެ ސަބަބުން އެފަރާތަކާމެދު އަޅަންޖެހޭ ޤާނޫނީ ފިޔަވަޅު އަޅާނެކަމަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު، ޕީސީބީއިން ބުނެފިއެވެ.

ސަރުކާރުގެ އިދާރާތަކުންނާއި މުއައްސަސާތަކުން މުހިންމު ބައެއް ލިޔުންތައް ނައްތާލާ ކަމަށް އިދިކޮޅު ފަރާތްތަކުން ދަނީ ތުހުމަތު ކުރަމުންނެވެ. މިފަދަ އަޑުތަކެއް ފެތުރިފައިވާ އިރު ރަސްމީ ލިޔުންތައް ޤަވާއިދާއި ޚިލާފަށް ނައްތާލާކަމަށް ބުނެ އެންޓި ކޮރަޕްޝަން ކޮމިޝަން (އޭސީސީ) އަށް ވެސް ވަނީ މައްސަލަ އެއް ހުށަހަޅާފައެވެ.

އެކަމާއި ގުޅިގެން އޭސީސީން ވަނީ އެފަދަ އަމަލުތަކަށް ސަމާލުވުމުގެ އިތުރުން އެފަދަ މައްސަލަތައް ހުއްޓުވުމަށް ފިޔަވަޅު އަޅާދިނުމަށް ޕީސީބީގައި އެދިފައެވެ.

ޕީސީބީން ނެރުނު ސަރކިއުލާއެއްގައި ބުނެފައި ވަނީ ދިވެހިރާއްޖޭގެ ޤައުމީ އަރުޝީފުގެ ޤާނޫނުގެ ދަށުން ހަދާފައިވާ ދިވެހި ދައުލަތުގެ މުއައްސަސާތަކުން ރަސްމީ ލިޔެކިޔުންތަކާއި، ފޮޓޯތަކާއި، ޗާޓުތަކާއި، ރެކޯޑްތަކާއި، މައުލޫމާތު ނައްތާލުމާއި ބެހޭގޮތުން ޢަމަލުކުރަންވީގޮތުގެ ގަވާއިދުގެ 3 ވަނަ މާއްދާގެ މަތިން ހަނދުމަކޮށްދީފައެވެ. ޕީސީބީއިން ވަނީ ގާނޫނާއި އެއްގޮތަށް އަމަލުކުރުމަށް ކުންފުނިތަކުގެ ވެރިންނަށް ވެސް އަންގާފައެވެ.

އެގޮތުން އެ މާއްދާގެ ދަށުން ދައުލަތުގެ މުއައްސަސާތަކާއި، ސަރުކާރުގެ ކުންފުނިތަކުން އެއްވެސް ބާވަތެއްގެ ރަސްމީ ލިޔުންތަކާއި، ފޮޓޯތަކާއި، ޗާޓުތަކާއި، ރެކޯޑްތަކާއި، މަޢުލޫމާތު ނައްތާލަން ބޭނުނަވެއްޖެނަމަ ޤައުމީ އަރުޝީފުގެ ޑިރެކްޓަރ ޖެނެރަލަށް އެކަން އަންގަން ޖެހޭކަން ޕީސީބީގެ ސަރކިއުލާގައި ވަނީ ފާހަގަކޮށްފައެވެ. އަދި އެފަދަ ތަކެތި ނައްތާލެވޭނީ އެ ގަވާއިދުގައިވާގޮތުގެ މަތިން ބަލަން ޖެހޭ ކަންކަން ބެލުމަށް ފަހުގައި ކަމަށް ވެސް ވަނީ ބުނެފައެވެ.

ޕީސީބީން ބުނީ ސަރުކާރުގެ އެއްވެސް ކުންފުންޏަކުން މި ޤާނޫނުގެ ދަށުން ގަވާއިދާ ޚިލާފަށް އެ ކުންފުންޏެއްގެ ރަސްމީ ލިޔެކިޔުންތަކާއި، ފޮޓޯތަކާއި، ޗާޓުތަކާއި، ރެކޯޑްތަކާއި، މަޢުލޫމާތު ނައްތާލުމުގެ އެއްވެސް އަމަލެއް ނުކުރުމަށް އަންގާފައިވާ ކަމަށެވެ. މީގެ އިތުރުން އެފަދަ ޙާލަތެއް މެދުވެރިވެއްޖެކަން ކުންފުންޏަށް އެނގިއްޖެ ނަމަ ޤަވާއިދުގައި ބުނާ ގޮތުގެ މަތިން ޢަމަލުކުރުމަށްވެސް ޕީސީބީން ވަނީ ސަރުކާރު ކުންފުނިތަކަށް އަންގާފައެވެ.