ވިނަރެސް ފްލެޓުން ނުވިކި ހުރި ޔުނިޓްތައް ގަތުމަށް ހުޅުވާލަނީ

ވިނަރެސް މަޝްރޫޢުއިން ފުލެޓު ގަތުމަށް އެދި ހުށަހެޅި ފަރާތްތަކަށް އެކި ސަބަބުތަކާހުރެ ފްލެޓް ނުގަނެވުމުގެ ސަބަބުން ނުވިކި ހުރި ޔުނިޓްތައް ވިއްކާލުމަށް ހުޅުވާލާނެކަމަށް އަރބަންކޯއިން ބުނެފިއެވެ.

އެކަމާއި ގުޅިގެން އަރބަންކޯއިން ކޮށްފައިވާ އިއުލާނެއްގައި ބުނެފައިވަނީ 15 ސެޕްޓެމްބަރ 2022 ގެ ނިޔަލަށް ވިނަރެސް މަޝްރޫޢުއިން ފުލެޓް ގަތުމަށް އެދި ފޯމު ހުށަހަޅާފައިވާ ފަރާތްތަކުގެ ތެރެއިން ފުލެޓު ގަތުމަށް ޝަރުތުހަމަވާ ފަރާތްތަކުން ފުރިހަމަކުރަންޖެހޭ މަރުޙަލާތައް ނިންމާ، މި ފަރާތްތަކުން ފުލެޓު އިހްތިޔާރުކޮށް ނިމުމުން އަދި އެޕްލިކޭޝަން ދޫކޮށްލުމަށް އެދިފައިވާ ފަރާތްތަކުގެ އަދަދަށް ބެލުމަށް ފަހުވެސް ބާކީ ފުލެޓުތަކެއް ނުވިކި ހުންނާނެކަމަށް ވަނީ އަންދާޒާކުރެވިފައި ކަމަށެވެ. ވީމާ، 31 އޮކްޓޯބަރ ގެ ނިޔަލަށް މިހާރު ކުރިއަށްދާ މަރުޙަލާތައް ނިމުމުން މާލީ ޤާބިލިއްޔަތުކަން ފުރިހަމަނުވާ ފަރާތްތަކާއި، ޔުނިޓް އިހްތިޔާރުކުރުމަށް ދައުވަތު ދިނުމަށްފަހުވެސް ޔުނިޓް އިހްތިޔާރުކުރުމަށް ހާޒިރުވެފައިނުވާ ފަރާތްތަކުގެ ފޯމު ބާތިލްކޮށް ބާކީ ނުވިކިހުރި ޔުނިޓްތައް ވިއްކަން ހުޅުވާލުމަށް ހަމަޖެހިފައިވާކަމަށެވެ.

Advertisement

މި ފުލެޓުތަކަށް އެދި ފޯމު ހުށަހަޅުމަށް ހުޅުވާލަން ހަމަޖެހިފައިވަނީ 5 ނޮވެމްބަރ 2023 ވާ އާދީއްތަ ދުވަހު މިކޯޕަރޭޝަންގެ އޮންލައިން ޕޯޓަލް https://my.urbanco.mv ގައިވާ ‘Housing’ ޖަހާފައިވާ ލިންކް މެދުވެރިކޮށެވެ.

މިމަހުގެ 22 ވަނަ ދުވަހު އަރބަންކޯއިން ބުނެފައިވަނީ ވިނަރެސް ފްލެޓްތަކަށް ދިގު މުއްދަތަށް ބަހާލައިގެން ފައިސާދައްކާ ފަރާތްތައް ފައިސާ ދެއްކުމަށް އިންޓްރެސްޓް ރޭޓް 9 އިންސައްތައިން 6 އިންސައްތައަށް ކުޑަކޮށްފައި ވާކަމަށެވެ.

މިކަމުގެ ސަބަބުން ދިގު މުއްދަތައް ބަހާލައިގެން ފައިސާ ދައްކާ ފަރާތްތަކަށް ފައިސާ ދެއްކުމުގައި ލުއި ލިބޭނެ ކަމަށާއި، މި ބަދަލު ގެނެވިފައިވަނީ ހަމައެކަނި ދިގު މުއްދަތަށް ބަހާލައިގެން ފައިސާދައްކާ ފަރާތްތަކަށް އެކަނި ނޫން ކަމަށެވެ. މި ބަދަލާއެކު، ހުޅުމާލޭގެ ބޯހިޔާވަހިކަން ފޯރުކޮށްދިނުމަށް ހިންގާފައިވާ ވިނަރެސް މަޝްރޫއުގައި މިހާރު މުޅި ޖުމްލަ 288 އެގްރީމެންޓްގައި ސޮއިކުރެވިފައި ވާކަމަށް އާބަންކޯއިން ބުނެއެވެ.

ވިނަރެސް ފްލެޓްތަކަށް ދިގުމުއްދަތަށް ބަހާލައިގެން ފައިސާދައްކާ ފަރާތްތަކަށް ލުއި ގޮތްތަކެއް ހަމަޖައްސާފައިވާއިރު، 21 އޯގަސްޓް 2023ގައި ބައެއް މީހުންނަށް ވަނީ ވިނަރެސް ފްލެޓުތަކުގެ ތަޅުދަނޑި ހަވާލުކޮށްފައެވެ.

ވިނަރެސް އެޕާޓްމަންޓުތަކަކީ ހުޅުމާލޭގެ ބޯހިޔާވަހިކަން ފޯރުކޮށްދިނުމުގެ ގޮތުން އާބަންކޯއިން ހިންގާފައިވާ މަޝްރޫއުތަކުގެ ތެރެއިން، އެއްވެސް މައްސަލައެއް ކުރިމަތިނުވެ ވަރަށް ފުރިހަމަކަމާއެކު ކުރިއަށް ގެންދެވުނު މަޝްރޫއެއް ކަމަށް އެކުންފުނިން ބުނެއެވެ.

10 ޓަވަރުގެ މި މަޝްރޫއަކީ އާބަންކޯއިން ފުރަތަމަ ފަހަރަށް، މެދުފަންތީގެ ބޯހިޔާވަހިކަމަށް ޚާއްސަކޮށްގެން ހިންގައި، ޚިދުމަތް ފޯރުކޮށްދީފައިވާ މަޝްރޫއެވެ. މި 10 ޓަވަރުގައި ޖުމްލަ 1344 ފްލެޓް ހަދާފައިވެއެވެ. ވިނަރެސްގައި ދެ ވައްތަރެއްގެ އެޕާޓްމަންޓު ހިމެނެއެވެ. 902 އަކަފޫޓު އަދި 883 އަކަފޫޓް ހިމެނޭ މި އެޕާޓްމަންޓުތަކުގައި 3 ކޮޓަރި، 3 ފާޚާނާ އަދި ބެލްކަނި ހިމެނެއެވެ.