އޭސީސީން ހޯދަން އެންގި 20 މިލިޔަން ރުފިޔާއަކީ، ކުރީ ސަރުކާރުން ހިންގާފައިވާ މުއާމަލާތްތަކަކާ ގުޅޭ ފައިސާކަމަށް، ފެނަކަ ކޯޕަރޭޝަނުން ބުނެފިއެވެ.

ބުދަ ދުވަހު އެ ކުންފުނިން ނެރުނު ނޫސްބަޔާނެއްގައި ބުނެފައިވަނީ، އޭސީސީން ހޯދަން އަންގާފައިވާ 20 މިލިޔަން ރުފިޔާއަކީ ކުރީ ސަރުކާރުން ހިންގާފައިވާ މުއާމަލާތްތަކަކާ ގުޅޭ ފައިސާ ކަމަށެވެ. އަދި އެއީ 2018 ނޮވެމްބަރުގެ ކުރިން ހިންގާފައިވާ 4 މުއާމަލާތަކާގުޅޭ ފައިސާކަމަށްވެސް އެ ބަޔާނުގައި ވަނީ ފާހަގަކޮށްފައެވެ.

އެ ކުންފުނިން ބުނެފައިވަނީ، ބަލަމުންދާ މައްސަލަތަކުގެ އަދަދުކަމަށް ބަޔާންކޮށްފައިވާ ތަފާސްހިސާބަކީ، 2012 ވަނަ އަހަރު އެ ކުންފުނި ވުޖޫދު ކުރެވުނު ދުވަހުން ފެށިގެން މިއަދާ ހަމައަށް ހުރި އަދަދު ކަމަށާއި، ޒިންމާވާ ފަރާތްތަކުގެ އަތުން ކުންފުންޏަށް ހޯދުމަށް އޭސީސީން އަންގާފައިވާ 20،504،491.54 (ވިހި މިލިޔަން ފަސް ލައްކަ ހަތަރު ހާސް ހަތަރު ސަތޭކަ ނުވަދިހަ އެއް ރުފިޔާ، ފަންސާސް ލާރި)އަކީ 2011 ވަނަ އަހަރުން ފެށިގެން 2017 ވަނަ އަހަރުގެ ނިޔަލަށް އެ ކުންފުނިން ހިންގާފައިވާ ޖުމްލަ 4 މުއާމަލާތަކާ ގުޅިގެން ހޯދުމަށް އަންގާފައިވާ ފައިސާކަމަށެވެ. އަދި ސަދަން ޔޫޓިލިޓީސް ލިމިޓެޑްގެ ކުރީގެ ފައިނޭންސް ޑިރެކްޓަރަކު ކިޔަވަން ދިއުމަށް އެ ކުންފުނީގެ އޭރުގެ މެނޭޖިން ޑިރެކްޓަރު، މަގާމުގެ ނުފޫޒު ބޭނުންކުރައްވައިގެން، ކުންފުނީގެ ބަޖެޓުން ދޫކުރައްވާފައި ވާކަމަށް ބުނެވޭ 240،000 (ދެލައްކަ ސާޅީސްހާސް ރުފިޔާ) ކަމަށެވެ.

މީގެ އިތުރުން، 2015 ވަނަ އަހަރުގެ ތެރޭގައި އަމިއްލަ ކުންފުންޏަކުން ކޮށްފައިވާ މުއާމަލާތްތަކަކާ ގުޅިގެން، އެ ކުންފުނީގެ ޕްރޮކިއުމަންޓް ޕޮލިސީއާ އެއްގޮތަށް އުނިކުރަންޖެހޭ ޖޫރިމަނާ ފައިސާ އުނިނުކޮށް، އެ ފަރާތަށް ފައިސާ ދައްކާފައިވާތީވެ، ކުންފުންޏަށް ލިބުނު ގެއްލުމަށް ވާ 1،017،170.44 (އެއް މިލިޔަން ސަތާރަހާސް ސަތޭކަ ހަތްދިހަ ރުފިޔާ، ސާޅީސް ހަތަރު ލާރި) ކަމަށާއި، 2016 ވަނަ އަހަރު އެ ކުންފުންޏަށް ބޭނުންވާ ޑޮލަރު ގަތުމަށް އަމިއްލަ ކުންފުންޏަކާއެކު ކުރެވުނު މުއާމަލާތުގައި އެ ކުންފުންޏަށް ލިބެންޖެހޭ 17،857،979.10 (ސަތާރަ މިލިޔަން އަށް ސަތޭކަ ފަންސާސް ހަތްހާސް ނުވަސަތޭކަ ހަތްދިހަ ނުވަ ރުފިޔާ، ދިހަ ލާރި) ކަމަށް ފެނަކައިން ވަނީ ބުނެފައެވެ.

އޭގެއިތުރުން، ފެނަކައިން ބުނެފައިވަނީ، 2017 ވަނަ އަހަރު އެ ކުންފުންޏަށް ބޭނުންވާ ބިލިންގ ސްފޮޓްވެއަރ ހޯދުމަށް އަމިއްލަ ކުންފުންޏަކާއެކު ކޮށްފައިވާ މުއާމަލާތުގައި ކުންފުންޏަށް ގެއްލިފައިވާ 1،389،342 (އެއް މިލިޔަން ތިން ލައްކަ އަށްޑިހަ ނުވަހާސް ތިންސަތޭކަ ސާޅީސް ދެ ރުފިޔާ) ކަމަށެވެ.

އޭސީސީން ބުނެފައިވަނީ، ފެނަކައާ ގުޅިގެން ހުށަހެޅިފައިވާ މައްސަލަތަކުގެ ތެރޭގައި، ކުންފުނި ހިންގުމުގައި މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދުމާއި/ހޯދައިދިނުމާ ގުޅޭ މައްސަލަތަކާއި، އުސޫލުތަކުގެ ބޭރުން އެކި މީހުންނަށް ވަޒީފާ ހަމަޖައްސާފައިވާކަމުގެ ތުހުމަތުތަކުގެ މައްސަލަތަކާއި، ކުންފުނީގެ ޕްރޮކިއުމަންޓު އުސޫލުތަކާ ޚިލާފުވުމުގެ މައްސަލަތަކާއި، ކުންފުނިން ފައިސާ ދޫކުރުމާ ގުޅޭގޮތުން އެކަށައަޅާފައިވާ އުސޫލުތަކާ ޚިލާފަށް ފައިސާ ދޫކުރުމުގެ ތުހުމަތުތަކުގެ މައްސަލަތައް ހިމެނޭކަމަށެވެ.

މި މައްސަލަތަކާ ގުޅިގެން، 92 ކަމެއް އިސްލާހުކުރުމަށް އޭސީސީން ވަނީ އެ ކުންފުންޏަށް އަންގާފައެވެ. އެކަންކަމުގެ ތެރޭގައި؛ ކުންފުނި ހިންގުމާގުޅޭ ކަންކަން ކުރިއަށް ގެންގޮސްފައިވާ ގޮތުގެ 48 ކަމެއް އިސްލާހުކުރުމަށާއި، ކުންފުނީގެ ސިޔާސަތުތަކާ ގުޅޭ 24 ކަމެއް އިސްލާހުކުރުމާއި، ކޮރަޕްޝަނުގެ އަމަލުތަކުގެ ސަބަބުން ކުންފުންޏަށް ގެއްލިފައިވާ ފައިސާ އަނބުރާ ހޯދުމާގުޅޭ 6 ކަމަކާއި، ކުންފުނިން ބަލައި ތަހުގީގުކުރުމަށް 6 ކަމެއް މިހާތަނަށް އޭސީސީން ވަނީ އެކުންފުންޏަށް އަންގާފައެވެ.