ތައިލެންޑުގެ މެޖިކް ކޮންވެންޝަނުން ޝަރީފް ފަޚުރުވެރި ކާމިޔާބީތަކެއް ހޯއްދަވައިފި
24 އޮކްޓޯބަރު 2023 | އަންގާރަ 12:16ޝަރީފް ވަނީ ޝަރަފްވެރިކަމުގެ މާރޓިން އެވޯޑު ހާސިލްކުރައްވާފައި
މޯލްޑިވްސް މެޖިޝަން އެސޯސިއޭޝަންގެ ރައީސް އަހުމަދު ޝަރީފް
މޯލްޑިވްސް މެޖިޝަން އެސޯސިއޭޝަންގެ ރައީސް އަހުމަދު ޝަރީފް، ތައިލެންޑުގެ މެޖިކް ކޮންވެންޝަނުން ފަޚުރުވެރި ކާމިޔާބީތަކެއް ހޯއްދަވައިފިއެވެ.
އޮކްޓޯބަރު މަހުގެ ކުރީކޮޅު ބޭއްވުނު ބައިނަލްއަގުވާމީ މެޖިކް ކޮންވެންޝަނުގައި ބައިވެރިވެވަޑައިގެން، ޝަރީފް ވަނީ ފަޚުރުވެރި ކާމިޔާބީތަކެއް ހޯއްދަވާފައެވެ. އެގޮތުން ޝަރީފް ވަނީ ޝަރަފްވެރިކަމުގެ މާރޓިން އެވޯޑުގެ އިތުރުން، އާރޓް ބަބްލް މެނިޕްލޭޝަން އިންޓަރނޭޝަނަލް ސެޓްފިކެޓްވެސް ހާސިލްކުރައްވާފައެވެ.
ޝަރީފަކީ ޖާދޫ ހެއްދެވުމުގެ މަސައްކަތުގައި 23 އަހަރު ހޭދަކުރައްވާފައިވާ، ކާމިޔާބު ޖާދޫގަރެކެވެ. އެގޮތުން، ބޭރުގެ ތަފާތު ގައުމުތަކުގައި ގިނަ ޝޯތަކެއް ދެއްވައި، އޭނާ ވަނީ ކާމިޔާބު ވަނަތަކެއްވެސް ހޯއްދަވާފައެވެ. މީގެއިތުރުން، އޭނާ ވަނީ މާލެއާއި ރާއްޖެތެރޭގެ އެކި ހަފްލާތަކުގައިވެސް ޝޯތައް ހުށަހަޅުއްވާފައެވެ.
ތައިލެންޑުގެ ބެންކޮކް ސިޓީގައި، 300އެއްހާ މެމްބަރުން ހިމެނޭގޮތަށް ބޭއްވި މި ކޮންވެންޝަނަކީ ކޮންމެ އަހަރަކުވެސް ބެންކޮކުގައި ބާއްވާ ކޮންވެންޝަނެކެވެ.
