ނެތެމުންދާ ތަރިކައާއި އާޘާރުގެ ތެރައަށް ޙަމްދީއާއެކު ކުލަ ދަތުރެއް
23 އޮކްޓޯބަރު 2023 | ހޯމަ 09:40މި މަޝްރޫޢުގެ ބޭނުމަކީ މިޞްރުގެ ތާރީޚާއި ކުރެހުމުގެ ފަންނުވެރިކަން ގުޅުވާލުން
"ރަސަމް މިޞްރު"ގެ ތެރެއިން، އެ ޤައުމުގެ ތާރީޚާ ގުޅިފައި ވާ މަންޒިލްތަކަށް ދަތުރު ކުރޭ
ދިރިއުޅުމުގެ ވައްޓަފާޅިއަށް އައިސްފައި ވާ ބޮޑެތި ބަދަލުތަކާއެކު ކާބަފައިންގެ ވާހަކަތަކާއި ތާރީޚުގެ ވާހަކަތަކަކީ ބައެއް މީހުންނަށް އަޑުއަހާލަން މާ ފަސޭހަ ވާހަކަތަކަކަށް އޮންނަނީ ނުވެފައެވެ. ކާބަފައިންގެ ސާދާ ދިރިއުޅުމާއި، އޭރުގެ ރަސްރަސްކަލުންގެ ޝާހީ އަބުއިކަމުގެ ވާހަކަތަކަކީ ކަޓު ވާހަކަތަކަކަށް އޮންނަނީ ވެފައެވެ. ފޫހި ވާހަކަތަކަކަށް ވެފައެވެ. އެ ވިސްނުން ބަދަލުކޮށް، އެތައް ބައެއްގެ ސަމާލުކަން ދަމައިގަންނެވިދާނެ ގޮތަކަށް ތާރީޚުގެ ޞަފުޙާތަކުން ފިލާވަޅުތައް ނަގައި ދެމުން ދާ އެކަކީ ފަންނުވެރި ކަމުގެ ތާރީޚާއި ބެހޭ މިޞްރުގެ ޕްރޮފެސަރެއް ކަމަށް ވާ މުޙައްމަދު ޙަމްދީއެވެ.
މިޞްރުގެ ވިރާސީ ވެރިކަމުގެ ތާރީޚު ދުށް އެންމެ ފަހު ވެރިޔާ، ރަސްގެފާނު ފާރޫޤު ގެންގުޅުއްވި ބައެއް ސަމާނުތައް ބަހައްޓާފައި ވާ ދާރުލްއާޘާރުގައި ޕްރެފެސަރ ޙަމްދީ ވަށާލައިގެން ކޯޅިކޯޅިއަށް މީހުން ތިއްބާ ފެނުނެވެ. ތާރީޚުގެ ވާހަކަތަކެއް ކިޔައިދެމުން ދާއިރު ޝަޢުޤުވެރިކަމާއެކު އަޑަހަން ތިބި ބައެކެވެ. އެ ތަނުގައި އެމީހުން ކުރަމުން އެ ދާ ކަމަކީ، ހަމަ އެކަނި މީހަކު ދައްކާ ވާހަކަތަކެއް އަޑު އަހާލުމެއް ނޫނެވެ. ލިބުނު މަޢުލުމާތުގެ މައްޗަށް ބިނާކޮށް، އެ ތާރީޚީ އަޖައިބުތަކުގެ ވާހަކަ، ކުރެހުމެއްގެ ސިފައިގައި ބަޔާންވެސް ކޮށްދެއެވެ.
ދެކެވެމުން މި ދަނީ ޕްރޮފެސަރ ޙަމްދީގެ މަޝްރޫޢެއް ކަމަށް ވާ "ރަސަމް މިޞްރު"، ނުވަތަ "މިޞްރު ކުރާހާލާ" ގެ ވާހަކައެވެ. މި މަޝްރޫޢުގެ ބޭނުމަކީ މިޞްރުގެ ތާރީޚާއި ކުރެހުމުގެ ފަންނުވެރިކަން ގުޅުވާލުމެވެ.
"ރަސަމް މިޞްރު"ގެ ތެރެއިން، އެ ޤައުމުގެ ތާރީޚާ ގުޅިފައި ވާ މަންޒިލްތަކަށް ދަތުރު ކުރެއެވެ. އެ ތަންތަނުގެ މަޢުލޫމާތު ހިއްސާކުރެއެވެ. ލިބެމުންދާ މަޢުލޫމާތު، ރައްކާ ކުރަމުން ދަނީ، ކުރެހުންތަކެއްގެ ސިފައިގައެވެ.
ގަލަންތަކާއި ފިހިތައް ބޭނުން ކޮށްގެން އެކި ޒާތްޒާތުގެ ރޮނގުތައް އަޅަމުން ދާ ފަންނުވެރިންގެ މަސައްކަތުން، ދާރުލް އާޘާރަށް އައު ދިރުމެއް ގެނެސްދެއެވެ.
ޕްރޮފެސަރ ޙަމްދީގެ މިޞްރު ކުރަހާލުމުގެ މަޝްރޫޢު ފެށިގެން އައި އިރު، އެކަމަށް ލިބުނީ އެންމެ 20 އަކަށް މީހުންގެ ސަމާލު ކަމެވެ. ނަމަވެސް އިމާމް ޝާފީގެ މަޤުބަރާ ހުރި ސަރަޙައްދު ތަޅާލުމުގެ ޚަބަރު ފެންމަތިވުމާއެކު، އެ ސަރަޙައްދަށް ދަތުރެއް ކޮށް، ކުރެހުންތައް ކުރަހާލުމުގެ ފުރުޞަތު ދޭ ޓުއަރއެއް ޢިއުލާން ކުރުމާއެކު، "ރަސަމް މިޞްރު" މަޝްރޫޢުގެ މަޤުބޫލުކަން އިތުރުވެގެން ދިޔައެވެ.
އޭގެ ފަހުން، ޕްރޮފެސަރ ޙަމްދީ، ތާރީޚުގެ ތެރެއަށް ކުރާ ކުލަ ދަތުރުތަކުގައި 100 ވަރަކަށް މީހުން ބައިވެރިވާ ފަހަރުވެސް އާދެއެވެ. އެކި ޢުމުރުގެ ބައިވެރިންނެވެ. އޭގެ ތެރޭގައި ކުޑަ ކުދިންވެސް ހިމެނެއެވެ.
"ރަސަމް މިޞްރު" މަޝްރޫޢު މި ވަޤުތު ކުރިއަށް ދަނީ މިޞްރުގެ ވެރިކަން ކުރާ ޤާޚިރާ ސަރަޙައްދުގައި އެކަނި ނަމަވެސް، ޕްރޮފެސަރ ޙަމްދީގެ ޢަމާޒު ހުރީ އެހެން ގަވަނަރޭޓްތަކަށްވެސް އެ ދަތުރުތައް ފުޅާ ކުރުމާ ދިމާއަށެވެ.
މިޞްރަކީ މުއްސަނދި ތާރީޚެއް ލިބިފައި އޮތް ޤައުމެކެވެ. މިޞްރަކީ މުޅި ދުނިޔެއަށް ބެލި ކަމުގައި ވީ ނަމަވެސް، އެންމެ ޒަމާންވީ އިންސާނީ ޙަޟާރާތު ފެތުރިފައި އޮތް ޤައުމުވެސްމެއެވެ. މިޞްރަކީ ރަނުގެ މުއްސަނދިކަން އޭގެ އެންމެ އިންތިހާއަށް ލިބިފައި އޮތް ޤައުމެއް ކަމުން، ގިނަ ބަޔަކު ވަނީ ރަން ނެގުމުގެ ބޭނުމަށް، މިޞްރުގައި ވަޒަންވެރިވެ، ދިރިއުޅުން އާބާދު ކޮށްފައެވެ.
