ބަހުރެއިން ބަލިކޮށް، ޤައުމީ ޓެނިސް ޓީމަށް ތާރީޚީ މޮޅެއް!
18 އޮކްޓޯބަރު 2023 | ބުދަ 15:09މިއީ މިމުބާރާތުގައި ރާއްޖޭގެ ފުރަތަމަ މޮޅު
މުބާރާތުގައި ވާދަކުރާ ގައުމީ ޓެނިސް ޓީމް
ބަހުރެއިން ބަލިކޮށް, ރާއްޖޭގެ ގައުމީ ޓެނިސް ޓީމުން ތާރީޚީ މޮޅެއް ހޯދައިފިއެވެ.
ޓެނިސް ޓީމުން ބަހުރެއިން ބަލިކުރީ, ބަހުރެއިންގައި ކުރިއަށްދާ ބިލީ ޖީން ކިންގ ކަޕް, އޭޝިޔާ/ އޯސޭނިޔާ ގްރޫޕް 3 ގައި ވާދަކޮށެވެ. ބަހުރެއިންގެ މައްޗަށް ރާއްޖެއިން ކުރިހޯދީ 3-0 ނެވެ. ރާއްޖެއިން ފުރަތަމަ ކުޅެން އަރާ ލަޔާން މުހައްމަދު ޝާމިން ވަނީ ސީދާ ދެ ސެޓުން ހާޖަރު ޒައިދާން ބަލިކޮށްފައެވެ. އެއީ 6-1, 6-2 ނެވެ. އާރާ އާސަލް އާޒިމް ނިކުތީ ބަހުރެއިންގެ ސަލްމާ ފަރަގަاللهއާ ދެކޮޅަށެވެ. އާރާ ވަނީ 6-1, 6-0 ން ކުރި ހޯދާފައެވެ. ފުރަތަމަ ޑަބަލްސްގައި ނިކުތީ އާރާއާއި, ލަޔާން ޝާމިންގެ ޕެއަރއެވެ. ސީދާ ދެ ސެޓުން ކާމިޔާބުހޯދީ ސަލްމާ އާއި ހާޖަރު ޒައިދާންގެ ޕެއަރގެ މައްޗަށެވެ. އެއީ 6-1, 6-0 ނެވެ. މިއީ މިމުބާރާތުގެ ތާރީޚުގައި ރައްޖެއިން ހޯދި ފުރަތަމަ މޮޅެވެ. މީގެކުރިން ރާއްޖެ ވަނީ 2022 ވަނަ އަހަރުވެސް ވާދަކޮށްފައެވެ.
ރައްޖޭގެ ޓީމްގައި އާރާއާއި ލަޔާން މުޙައްމަދު ޝާމިންގެ އިތުރުން ހިމެނެނީ ނަޔާރާ އުސާމާ އަލީއާއި މިޝާލް މުޙައްމަދެވެ. އޭޝިޔާ/ އޯސޭނިޔާ ގްރޫޕް 3 ގައި 14 ގައުމު ހިމެނެއެވެ. އެއީ ރާއްޖޭގެ އިތުރުން ބޫޓާން, ބުރޫނާއީ ދާރުއްސަލާމް, އިރާން, އިރާގު, ކިރުގިސްތާން, ލާއޯސް, މަކާއޯ, ނޭޕާލް, ޤަތަރު, ސައުދީ އަރަބިޔާ, ތަޖަކިސްތާން އަދި ވިއެޓްނާމެވެ.
