ގަޓީގެ އެއްބަސްވުން އައުކުރުމުގެ މަޝްވަރާތަކުގައި ޔުވެންޓަސްއަށް ކުރިއެރުންތަކެއް

ޔުވެންޓަސްއަށް ކުޅެމުން އަންނަ އިޓަލީގެ ޑިފެންޑަރު ފެޑެރިކޯ ގަޓީގެ އެއްބަސްވުން އައުކުރުމުގައި އެ ކުލަބުން ކުރިއެރުންތަކެއް ހޯދައިފިއެވެ.

އުމުރުން 25 އަހަރުގެ ކުޅުންތެރިޔާ ޔުވެންޓަސްއަށް ބަދަލުވީ މިދިޔަ އަހަރުއެވެ. އެ ކުލަބަށް އޭނާ ބަދަލުވީ ލޯނު އެއްބަސްވުމެއްގެ ދަށުން، އެއް އަހަރު ދުވަހުގެ މުއްދަތަކަށެވެ. ލޯނު އެއްބަސްވުމުގެ މުއްދަތު ހަމަވުމާއެކު ޔުވެންޓަސްއިން ބޭނުންވަނީ އޭނާއާއެކު ދާއިމީ އެއްބަސްވުމެއް އެކުލަވާލުމަށެވެ. އެ ކުލަބުން މަސައްކަތް ކުރަމުން އަންނަނީ ހަތަރު އަހަރު ދުވަހުގެ އެއްބަަސްވުމެއްގައި އޭނާ ލައްވައި ސޮއިކުރުވުމަށެވެ. އެކަމާ ގުޅުންހުރި މަޝްވަރާތައް ޔުވެންޓަސްއިން ގަޓީއާއެކު ކުރަމުން އަންނައިރު، މިހާރު މަޝްވަރާތައް ވަނީ ފައިނަލް ސްޓޭޖުގައި ކަމަށް މީޑިއާތަކުން ބުނެއެވެ. އެހެންކަމުން 2028 ވަނަ އަހަރުގެ ޖޫން މަހުގެ ނިޔަލަށް އޭނާ ޔުވެންޓަސްގައި މަޑުކުރުމުގެ ފުރުސަތު ބޮޑު ކަމަށްވެސް ވަނީ ބުނެފައެވެ. ސަބަބަކީ ޔުވެންޓަަސްގައި މަޑު ކުރުމަށް ގަޓީވެސް ބޭނުންވާތީއެވެ.

ގަޓީ ވަނީ މިހާތަނަށް ޔުވެންޓަސްއަށް ކުޅެދިން 27 މެޗުގައި ދެ ލަނޑު ޖަހައިފައެވެ. ޔުވެންޓަސްގެ ކޯޗު މާސިމިލިއާނޯ އަލެގްރީ ދެކޭގޮތުގައި އޭނާއަކީ ޔުވެންޓަސްއަށް މުހިންމު ކުޅުންތެރިޔެކެވެ. އަލެގްރީ އަންނަނީ އޭނާގެ ޓީމުގައި ގަޓީ ހިމަނައިގެން، އޭނާއަށް ގިނައިން ފުރުސަތުވެސް ދެމުންނެވެ.