އަމިއްލަ މިނިވަން ކަމުގެ ޙައްޤުގައި ހަމާސް ޖަމާޢަތުން، ޔަހޫދީ އިޒްރޭލަށް ޢަމާޒުކޮށްގެން ދިން ޙަމަލާގެ ރައްދުގައި ކަމަށް ބުނެ، ޣައްޒާއާ ދެކޮޅަށް ހަނގުރާމަ ޢިއުލާންކޮށް، އެޔެއް މިޔެއް ބެލުމެއް ނެތި ޔަހޫދީންގެ ޢުދުވާނީ ޙަމަލާތަކުގައި ޣައްޒާ ސުންނާފަތި ކުރަމުންދާތާ މިހާރު މި ވަނީ ހަފުތާއެއް ފާއިތުވެފައެވެ. އަދި ފެނިގެން މި ދަނީ ހަނގުރާމައިގެ ކޮޅުމަތި ކަމަށް ޚުދުމުޚުތާރު އިޒްރޭލުން ބުނަމުން ދާއިރު، ޣައްޒާ އޮތީ ހަފުސް ވެފައެވެ. އިންސާނަކަށް ވީތީ ލިބިދޭންޖެހޭ ދިރިހުރުމުގެ ޙައްޤާއި ހިސާބުން ފެށިގެން ގޮސް، އަސާސީ އެތައް ޙައްޤުތަކުން ޣައްޒާގެ ރަށްވެހިން ވަނީ އެކަހެރި ކޮށްފައެވެ. އެ ޙާލުގައިވެސް، ޣައްޒާއިން ފެނިގެން ދަނީ އިންސާނިއްޔަތު ކަމުގެ ރީތި މިސާލުތަކެވެ. ހަމަ އެކަނި އެއް އިންސާނަކު އަނެއް އިންސާނަކާ މެދުގައެއް ނޫނެވެ. ޖަނަވާރުތަކާއި ދޫނިސޫފާސޫތްޕާ މެދުގައިވެސްމެއެވެ.

އަމިއްލަ ގެދޮރު ދޫކޮށް، ޢާއިލާއާއެކު ވަޤުތީ ހިޔާއަކަށް ބަދަލު ވެފައި ވާ އެކަކީ ޢުމުރުން އެންމެ 13 އަހަރުގެ އަޒުމީ ދިޢާބްއެވެ. ގެދޮރު ދޫކޮށް، ފުރާނަ އަތް މައްޗަށް ލައިގެން އަޒުމީ ދަތުރު ފެށީ، އިންތިހާ ލޯބި ދީގެން އޭނާ ގެންގުޅޭ ދޫނިވެސް ގޮވައިގެންނެވެ. ރެފިއުޖީންނާ ބެހޭ އދގެ އިދާރާ (ޔޫއެންއާރްޑަބްލިއުއޭ)އިން ޚާން ޔޫނިސްގެ ހުޅަނގުގައި ހިންގާ ކޭމްޕަށް އަޒުމީ ބަދަލުވެ، އެތަނުގައި ވަޤުތުތަކުގައި ހޭދަ ކުރަމުން ދާ އިރު، ހިނދުކޮޅަކަށްވެސް އޭނާގެ ދޫނި ދޫކޮށެއް ނުލައެވެ.

ރެފިއުޖީ ކޭމްޕަށް ދިއުމަށް އަޒުމީ ކުރި ދަތުރަކީވެސް އިންތިހާއަށް ބިރުވެރި ދަތުރެކެވެ. ފުރާވަރު ޢުމުރުގެ ދުވަސްތަކަށް ގުނަން ފަށާފައި ވާ ޢަޒުމީގެ އެ ޅަ ސިކުނޑީގައި ހާދަހާ ވާ ކަމެއް ދަޢުރުވަމުން ދެއެވެ.

އަޒުމީގެ ކޮނޑުމަތީގައި ޖައްސާލައިގެން އިން ދޫންޏަކީ، އެ ދުނީގެ ވަރަށް ޅަފަތުގައި އަޒުމީއަށް ފެނުނު ދޫންޏެކެވެ. ޣައްޒާއަކީ އިޒްރޭލުގެ ޢުދުވާންތައް ސިލްސިލާ ގޮތެއްގައި ޢަމާޒު ވާ މަންޒިލެއް ކަމުން، އަޒުމީ ވަނީ، ޙަމަލާތަކުން ދިފާޢު ލިބޭ ފަދަ ހާއްޔެއްވެސް އެ ދުންޏަށްޓަކައި ތައްޔާރު ކޮށްދީފައެވެ.

އަޒުމީއާއި ވާހަކަދައްކާލުމުން، ޣައްޒާގެ ރަށްވެހިންގެ ހިތުގައި އޮތް އިންސާނިއްޔަތުކަމުގެ ކުލުނުގެ މަތިވެރިކަން ކިތަންމެ ހާ ރަނގަޅަކަށްވެސް ހާމަވެއެވެ.

އަޒުމީ އެކަންޏެއް ނޫނެވެ. ދޫނި ސޫފާސޫތްޕާއި ޖަނަވާރުތަކަށް ކަމޭހިތުމުގެ ރީތި އެތައް މިސާލެއް، މިވީ ހަފުތާއެއްހާ ދުވަހުގެ ތެރޭގައި ޣައްޒާގެ މަސްރަޙުން ވަނީ ފެނިފައެވެ. ޢަބްދުއްރަޙުމާން ޢުބައިދުގެ ވާހަކައަކީވެސް ހަމަ އެފަދަ ވާހަކައެކެވެ.

ކުޑައެއް ބޮ@ޑެއް، އަންހެނެއް މުސްކުޅިއެއް ބެލުމެއް ނެތި ޔަހޫދީން ދެމުންދާ ޙަމަލާތަކުގައި ދިރުން ގެއްލި ގޮސްފައި ވާ ޣައްޒާގެ ރަށްވެއްސެއް ކަމަށް ވާ ޢުބައިދުގެ އަތުގައި މިއަދު އޮތް ހަމަ އެކަނި އެއްޗަކީ، ބުޅަލެކެވެ. އެ ބުޅަލަކީ، ވައިގެ ޙަމަލާތަކުގައި ސުންނާފަތި ވެފައިވާ ސަރަޙައްދަކުން އޭނާ ސަލާމަތް ކުރި ބުޅަލެކެވެ. މިއަދު، ޢުބައިދުގެ ހުރިހާވެސް އެއްޗަކީ އެއީއެވެ.

އިޒްރޭލުގެ އެންމެ ފަހުގެ ޢުދުވާންތައް ފެށުމުގެ ކުރިންވެސް ޣައްޒާއަކީ އެކި ކަހަލަ ޖަނަވާރުތަކާއި ދޫނި ސޫފާސޫފި ގެންގުޅެމުން ދިޔަ ސިޓީއެކެވެ. ދިރިއުޅުމުގެ ޙާލަތު އިންތިހާއަށް ދަތިވި ކަމުގައި ވީ ނަމަވެސް، އިންސާނުންގެ އިތުން މި ދުނިޔޭގައި ދިރިއުޅޭ އެހެން ދިރުންތަކަށް އިޚުތިރާމް ކުރާ ރައްޔިތަކު ދިރިއުޅޭ ސިޓީއެކެވެ. އަނެކުންނަށް އޯގާތެރިކޮށް ހިތާ، ހެޔޮ ފޯރުކޮށްދިނުމަށްޓަކައި، މިނިވަންކަމާއި ތަނަވަސްކަމަކީ ކޮންމެހެން ބޭނުން ކަންކަމެއް ނޫންކަން ސާބިތުކޮށްދިން ހިތްވަރުގަދަ ބަޔަކު ދިރިއުޅޭ ސިޓީއެކެވެ.