އަންނަ އަހަރު ޖަރުމަނުގައި އޮންނަ ޔޫރޯ ފުޓުބޯޅަ މުބާރާތުގެ ކޮލިފައިންގައި ނޯތު މަސަޑޯނިއާއާ ދެކޮޅަށް ކުޅުނު މެޗުން މޮޅުވެ، ޔޫކްރެއިން ގްރޫޕް ސީގެ ތިން ވަނަ އަށް ޖެހިލައިފި އެވެ.

އެޕިޓް އެރީނާގައި ކުޅުނު މެޗު ޔޫކްރެއިން އިން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި ޔޫކްރެއިން އިން އެއް ލަނޑު ޖެހިއިރު، އަނެއް ލަނޑު ޖެހީ އިތުރު ވަގުތުގަ އެވެ. ފުރަތަމަ ހާފުގެ 30 ވަނަ މިނެޓުގައި ޔޫކްރެއިން އަށް ލީޑު ނަގައިދިނީ ޖޯޖީ ސުޑަކޯ އެވެ. އޭނާ އެ ލަނޑު ޖެހީ އޮލެކްސެންޑާ ޒިންޗެންކޯ ތަނަވަސްކޮށްދިން ފުރުސަތެއްގަ އެވެ. ޔޫކްރެއިންގެ ދެ ވަނަ ލަނޑު މެޗުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގައި ޖެހީ އޮލެކްސެންޑާ ކަރަވައޭ އެވެ. މެޗުގައި އޭނާ ކުޅެން ނިކުމެފައި ވަނީ ބަދަލު ކުޅުންތެރިޔެއްގެ ގޮތުގަ އެވެ.

މޮޅާއެކު ޔޫކްރެއިން އިން ވަނީ ނޯތު މަަސަޑޯނިއާ ފަހަތަށް ޖައްސާލުމަށްފަހު، ގްރޫޕްގެ ތިން ވަނަ އަށް ޖެހިލައިފަ އެވެ. އެއީ މިހާތަނަަށް ކުޅުނު ހަ މެޗުން 10 ޕޮއިންޓު ހޯދައިގެންނެވެ. ދެ ވަނައިގައި އޮތް އިޓަލީ އަށް ވެސް ލިބެނީ 10 ޕޮއިންޓެވެ. އެހެން ނަމަވެސް އެއީ ޔޫކްރެއިން އަށް ވުރެ އެއް މެޗު މަދުން ކުޅެގެންނެވެ.