ޣައްޒާގެ ރައްޔިތުން ގެތަކުން ނުކުތުމަށް ޔަހޫދީން ނެރުނު އަމުރާ ކުވައިތުން ދެކޮޅުހަދައިފި

ޣައްޒާގެ ރައްޔިތުން ގެތަކުން ނުކުތުމަށް ޔަހޫދީން ނެރުނު އަމުރާ ކުވައިތުން ދެކޮޅުހަދައިފިއެވެ.

ކުވައިތުގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ ޣައްޒާގެ އުތުރު ސަރަހައްދުގައި ދިރިއުޅޭ ފަލަސްތީނުގެ ރައްޔިތުންނަށް މަޖުބޫރުކޮށްގެން ގެއިން ބޭރަށް ނުކުތުމަށް ނެރުނު އަމުރަށް ކުވައިތުން ކަނޑައެޅިގެން ދެކޮޅުހަދާކަމަށެވެ.

މި ބަޔާން ނެރެފައިވަނީ ޣައްޒާގެ އުތުރުގައި ތިބިކަމަށް ލަފާކުރެވޭ، ފަލަސްތީނުގެ މިލިއަނަކަށްވުރެ ގިނަ ރައްޔިތުން، އިސްރާއީލުން އެތަނަށް އަރައިގަތުމުގެ ކުރިން ގެދޮރު ދޫކޮށް ދިއުމަށް މަޖުބޫރުކޮށްފައި ވަނިކޮށެވެ.

ނަމަވެސް ފަލަސްތީނުގެ ރައްޔިތުންނަށް ނުރައްކާ ކުރިމަތިވެފައި ވާއިރު، އިސްރާއީލުން ބަންދުކޮށްފައިވާ ސަރަހައްދުގެ ދެކުނަށް ޣައްޒާގެ ރައްޔިތުން ވަނީ މިސްރާބު ޖަހާފައެވެ. އިސްރާއީލުން ދަނީ ޣައްޒާގެ ރައްޔިތުން ރައްކާތެރިކަން ހޯދަމުންދާ ސަރަހައްދުތަކަށް ވައިގެ ހަމަލާތައް ދެމުންނެވެ.

ދެކުނަށް ދަތުރުކުރަމުން ދިޔަ މީހުންނަށް އިސްރާއީލުގެ ވައިގެ ހަމަލާއެއް އަމާޒުކޮށް، އާންމުންގެ އެތައް ބަޔަކު ވަނީ ޝަހީދުކޮށްލާފައެވެ.