ކޮވިޑްގެ ހާލަތުގައި ރާއްޖެއަށް ފޮރިން ކަރަންސީ ގެނެވުނު ހަމައެކަނި ކުންފުންޏަކަށް މިފްކޯވާނެ: ފައުޒީ
ކުރިއަށްއޮތްތާ މިފްކޯވެގެންދާނީ މިހާރަށްވުރެންވެސް ރަނގަޅަށް ޕްރޮސެސްކުރާ ކުންފުންޏެއްގެ ގޮތުގައި
މިފްކޯގެ ސީއީއޯ އިސްމާއީލު ފައުޒީ
ކޮވިޑްގެ ހާލަތުގައި ރާއްޖެއަށް ފޮރިން ކަރަންސީ ގެނެވުނު ހަމައެކަނި ކުންފުންޏަކަށް މިފްކޯވާނެކަމަށް މިފްކޯގެ ސީއީއޯ އިސްމާއީލު ފައުޒީ ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ފައުޒީ ވިދާޅުވީ މިފްކޯއަށް ބޮޑެތި ގޮންޖެހުންތަކާއި ކުރިމަތިލާންޖެހުނުކަމަށެވެ. އެގޮތުން، މިފްކޯއަށް ހުރި ގޮންޖެހުންތަކަށް އަލިއަޅުއްވާލައްވާ ފައުޒީ ވިދާޅުވީ، މިފްކޯގެ ވަސީލަތްތައް ރަނގަޅު ހާލަތަކަށް ގެނައުމަށްޓަކައި ގިނަ މަސައްކަތްތަކެއް ކުރަންޖެހުނުކަމަށެވެ. އަދި އުތުރުގެ މަސްވެރިކަން ރަނގަޅުވާއިރު މަސް ކިރޭނެ އިންތިޒާމު ހަމަޖެހިފަ ނެތްކަން ފައުޒީ ފާހަގަކުރެއްވިއެވެ.
މީގެއިތުރުން ފައުޒީ ވިދާޅުވީ، ރަނގަޅު މާކެޓުގައި މަސް ޕްރޮސެސްކުރުން، ހާއްސަކޮށް ދަޅު މަހާއި އެއާއި ގުޅުންހުރި އުފެއްދުންތަކުގެ އިނާޔަތްތައް ނުލިބުމަކީ ދިމާވާ ވަރަށް ބޮޑު ގޮންޖެހުމެއްކަމަށެވެ.
ފައުޒީ އިތުރަށް ވިދާޅުވީ ކޮވިޑްގެ ހާލަތުގައި ރާއްޖެއަށް ފޮރިން ކަރަންސީ ގެނެވުނު ހަމައެކަނި ކުންފުންޏަކަށް މިފްކޯވާނެކަމަށެވެ.
މީގެއިތުރުން ކުރިއަށްއޮތްތާ މިފްކޯއިން ގަންނަ މަސް އަވަހަށް ފިނިކޮށް، ތާޒާކަމާއިއެކު މަސް ގަންނަ ފަރާތްތަކަށް ފޯރުކޮށްދެވުމުން މިފްކޯގެ އަގު ރަނގަޅުވެގެންދާނެކަމަށާއި، ކުރިއަށްއޮތްތާ މިފްކޯވެގެންދާނީ މިހާރަށްވުރެންވެސް ރަނގަޅަށް ޕްރޮސެސްކުރާ ކުންފުންޏެއްގެ ގޮތުގައިކަމަށް ފައުޒީ ފާހަގަކުރެއްވިއެވެ.
