މިފްކޯގެ ކެޕޭސިޓީ 40،000 ޓަނުން 63،000 ޓަނަށް އިތުރުކުރެވިއްޖެ: ފައުޒީ
12 އޮކްޓޯބަރު 2023 | ބުރާސްފަތި 00:16މިހާރު ކުރަމުންދާ މަސައްކަތަކީ އިތުރު 3 ބޯޓު ގެނައުމުގެ މަސައްކަތްކަމަށާއި އެތަނުން 1 ބޯޓު ވަރަށް އަވަހަށް ގެނެވޭނެކަމަށް ފައުޒީ ވިދާޅުވި
މިފްކޯގެ ސީއީއޯ އިސްމާއީލް ފައުޒީ
މިސަރުކާރުން މިފްކޯ ތަރައްގީކުރުމަށް ކުރަމުންދާ މަސައްކަތުގެ ތެރެއިން މިފަސް އަހަރު ތެރޭގައި މިފްކޯގެ ކެޕޭސިޓީ 40،000 ޓަނުން 63،000 ޓަނަށް އިތުރުކުރެވިފައިވާކަމަށް މިފްކޯގެ ސީއީއޯ އިސްމާއީލު ފައުޒީ ވިދާޅުވެއްޖެއެވެ.
މިފްކޯގެ ތަރައްގީއަށް މިސަރުކާރުން ކުރަމުންދާ މަސައްކަތްތަކާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ފައުޒީ ވިދާޅުވީ މިފަސް އަހަރުތެރޭގައި މިފްކޯ ތަރައްގީކުރުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގިނަ މަސައްކަތްތަކެއްކުރައްވާފައިވާކަމަށެވެ. ޚާއްސަކޮށް މިފްކޯގެ ކެޕޭސިޓީ އިތުރުކުރުމަށް ގިނަ މަސައްކަތްތަކެއް މިސަރުކާރުން ކުރަމުންދާކަމަށް ފައުޒީ ވިދާޅުވިއެވެ.
އެގޮތުން މަސް ގަތުމަށް ވަގުތީ ހައްލެއް ގެނައުމަށްޓަކައި ފުރަތަމަ ގެނައި ދެ ބޯޓުގެ ނަތީޖާ ވަރަށް ރަނގަޅުކަމަށާއި މަސް ކިރުމުގައި ދިމާވި ދަތިތަކަށް ހައްލު ގެނުވުނުކަމަށެވެ. އަދި ދެކުނުގެ ސަރަހައްދަށް ގެނައި ޖަޒީރާ 103 އަކީވެސް ދުވާލަކަށް 120 ޓަނުގެ މަސްގެނެވޭ ބޯޓެއްކަމަށާއި މިބޯޓު ފަހަރާއެކު މިފްކޯގެ ކެޕޭސިޓީ އިތުރުވެގެންދިޔަކަމަށް ފައުޒީ ވިދާޅުވިއެވެ.
މީގެއިތުރުން މިހާރު ދެކުނުގައި ގދ ތިނަދޫގައި ގއ ކޫއްޑޫގައި ހަދަމުންދާ ތަންތަން ނިމުމާއެކު ކެޕޭސިޓީ އިތުރުވެގެންދާނެކަމަށް ފައުޒީ ވިދާޅުވިއެވެ.
ފައުޒީ ވިދާޅުވީ ތިނަދޫގައި ހެދެމުންދަނީ އެންމެ އަވަހަށް ފްރީޒްކުރެވޭ ސިސްޓަމުކަމަށެވެ. އަދި މަސްކިރުމުގެ އިންތިޒާމުތަކަށް ބަލާއިރު އެންމެ ފަސޭހަ އެއްތަނަށް ތިނަދޫގައި ހެދެމުންދާތަން ވާނެކަމަށް ފައުޒީ ވިދާޅުވިއެވެ.
މިފްކޯއިން މިހާރު ކުރަމުންދާ މަސައްކަތަކީ އިތުރު 3 ބޯޓު ގެނައުމުގެ މަސައްކަތްކަމަށާއި އެތަނުން 1 ބޯޓު ވަރަށް އަވަހަށް ގެނެވޭނެކަމަށް ފައުޒީ ވިދާޅުވިއެވެ. މިހާރު ކުރެވެމުންދަނީ އެބޯޓުގެ ބްރެއިން ފްރީޒިންގ ޓެސްޓްކުރުމުގެ މަސައްކަތްކަމަށް ފައުޒީ ވިދާޅުވިއެވެ. އަދި ބާކީ ހުރި ބޯޓުތައްވެސް ގެނެވޭނެކަމަށް ފައުޒީ ވިދާޅުވިއެވެ.
ފައުޒީ އިތުރަށް ވިދާޅުވީ މިހާރު ކުރަމުންދާ މަސައްކަތަކީ މުވައްޒަފުންގެ މުސާރައިގެ އޮނިގަނޑަށް ބަދަލު ގެނައުންކަމަށެވެ.
