ފެނަކައިގެ މުވައްޒަފު ޚިލާފުވި އުސޫލެއް އެނގެން ނެތުމުން، ވަޒީފާއިން ވަކިކުރީ ރަނގަޅަށް ނޫންކަމަށް ނިންމައިފި
ވަޒީފާއިން ވަކި ކުރުމުގައި މައުޟޫއީ އަދި އިޖުރާއީ އަދުލުވެރިކަން ޤާއިމު ކުރަންޖެހޭ
މޫސާ އިބްރާހިމްގެ ފަރާތުން ހައިކޯޓުގައި އިސްތިއުނާފުކުރި މައްސަލަ
ވަގުތީ ކަރަންޓު ދޫކުރުމާބެހޭ އުސޫލާ ޚިލާފަށް ކަރަންޓު ފޯރުކޮށްދިންކަމަށް ބުނެ ފެނަކަ ކޯޕަރޭޝަނުން އެ ކުންފުނީގެ މުވަައްޒަފަކު ވަޒީފާއިން ވަކިކޮށްފައިވަނީ ރަނގަޅަށް ނޫންކަމަށް ދިވެހިރާއްޖޭގެ ހައިކޯޓުން ޙުކުމްކޮށްފިއެވެ.
ހައިކޯޓުން ކުރި ޙުކުމުގައި ބުނީ، މުވައްޒަފަކު ވަޒީފާއިން ވަކި ކުރެވެނީ އެ މުވައްޒަފަކު ވަޒީފާއިން ވަކި ކުރުމުގައި މައުޟޫއީ އަދި އިޖުރާއީ އަދުލުވެރިކަން ޤާއިމު ކުރުމަށްފަހުކަމަށެވެ.
މުވައްޒަފަކު ވަކި ކުރުމަށް ވަޒީފާދޭ ފަރާތަކުން ސާބިތުކޮށްދޭން ޖެހޭނީ މިވާބަތުގެ މަދަނީ މައްސަލަތަކުގައި ޝަރީއަތުން ހެކި ވަޒަން ކުރާ މިންގަނޑުން ކަމުގައިވާ ބޮޑަށް ބުރަވެވޭ ގޮތުގައިކަންވެސް ހައިކޯޓުން ފާހަގަކޮށްފައިވެއެވެ.
މި މައްސަލައިގައި މޫސާ އިބްރާހިމް ވަޒީފާއިން ވަކިކޮށްފައިވަނީ އޭނާ ކަރަންޓު ދިނުމުގައި ޤަވާއިދާއި އުސޫލާ ޚިލާފަށް އަމަލުކޮށްފައިވާކަމަށް ބުނެއެވެ. އެގޮތުން ލ ކަޅައިދޫ ކައުންސިލު އިދާރާއިން އެރަށުގައި އިމާރާތް ކުރަމުންދާ ގެސްޓްހައުސްއަށް ކުންފުނީގެ ބްރާންޗުން ކަރަންޓު ދޫކޮށްފައިވަނީ "ވަގުތީ ކަރަންޓު ދޫކުރުމާބެހޭ އުސޫލާ" ޚިލާފަށްކަމަށް އޭނާ ވަޒީފާއިން ވަކި ކުރި ލިއުމުގައި ބަޔާންކޮށްފައިވެއެވެ.
އެހެންނަމަވެސް އެފަދަ އުސޫލެއް ނުވަތަ ޤަވާއިދެއްވެސް ވަޒީފާއާބެހޭ ޓްރައިބިއުނަލަށް ހުށައެޅިފައިނުވާކަން ހައިކޯޓުގައި އޭނާގެ ފަރާތުން ފާހަގަކޮށްފައިވެއެވެ.
ހައިކޯޓުގެ ފަނޑިޔާރުންވެސް ވިދާޅުވީ، އޭނާ ޚިލާފުވެފައިވަނީ ކޮން އުސޫލަކާކަން ބުނެދިނުމަކީ ފެނަކަ ކޯޕަރޭޝަނުން ކުރަންޖެހޭ ކަމެއްކަމަށެވެ.
މި މައްސަލަ ހައިކޯޓުގައި ކުރިއަށްދިޔައިރުވެސް އެފަދަ އުސޫލެއް ހެދިފައި އޮތްކަން އެނގެން ނެތްކަމަށް ހައިކޯޓުގެ ފަނޑިޔާރުން ވިދާޅުވިއެވެ.
އަދި އެފަދަ އުސޫލެއް ވުޖޫދުގައިވާކަން ސާބިތުކޮށްދިނުމަކީ ވަޒީފާދޭ ފަރާތުގެ މަސްއޫލިއްޔަތެއްކަންވެސް ފާހަގަކޮށްފައިވެއެވެ.
ހައިކޯޓުގައި މި މައްސަލަ ބެއްލެވި ފަނޑިޔާރުންގެ އިއްތިފާޤުން ނިންމެވީ، އޭނާ ވަޒީފާއިން ވަކިކޮށްފައިވަނީ ޤާނޫނާ އެއްގޮތަށްކަމަށް ބެލެވެން ނެތްކަމަށާއި، މި މައްސަލައިގައި މައުޟޫއީ އަދި އިޖުރާއީ އަދުލުވެރިކަން ޤާއިމުކޮށްފައިވާކަމަށް ދެކިވަޑައިނުގަންނަވާކަމަށެވެ.
އަދި އޭނާ ވަޒީފާއިން ވަކިކޮށްފައިވަނީ އެކަށީގެންވާ ސަބަބެއް ނެތިކަމަށްވާއިރު، މި މައްސަލައިގައި އޭނާއަށް ލިބެންޖެހޭ ޤާނޫނީ ޙައްލާއި ބަދަލުގެ މިންވަރާއި ގުޅޭގޮތުން ގޮތެއް ކަނޑައެޅުމަށް މި މައްސަލަ ވަޒީފާއާބެހޭ ޓްރައިބިއުނަލަަށް ތަހުވީލު ކުރުމަށްވެސް ފަނޑިޔާރުން ވަނީ ޙުކުމް ކުރައްވާފައެވެ.
