މާލެ ސިޓީ މޭޔަރު ޑރ. މުހައްމަދު މުއިއްޒު، ރިޔާސީ އިންތިޚާބު ކާމިޔާބުކުރައްވާފައިވާތީ، ހުސްވާ މޭޔަރުކަމުގެ މަގާމަށް މީހަކު އިންތިޚާބު ކުރުމަށް ބާއްވާ އިންތިޚާބު ޖެނުއަރީ މަހުގެ 17 ވަނަ ދުވަހުގެ ކުރިން ބާއްވަންޖެހޭކަމަށް ބެލެވޭކަމަށް އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބު ވިދާޅުވެއްޖެއެވެ.

ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަފުޅުދައްކަވަމުން ހަބީބު ވިދާޅުވީ ގާނޫނުގައި އޮންނަނީ މަގާމު ހުސްވާތާ 60 ދުވަސްތެރޭގައި އިންތިޚާބު ބޭއްވުމަށްކަމަށެވެ. އެހެންކަމުން މޭޔަރުކަމުގެ މަގާމު ހުސްވާހިސާބުން އެލްޖީއޭއިން އެކަން އެކަން އިލެކްޝަންސް ކޮމިޝަނަށް އަންގާނެކަމަށް ހަބީބު ވިދާޅުވިއެވެ. މިހާރު އޮތްގޮތުން އިންތިޚާބީ ރައީސް ހުވާކުރައްވާނީ ނޮވެމްބަރ މަހުގެ 17 ވަނަ ދުވަހުއެވެ. އެހެންކަމުން ޖެނުއަރީ މަހުގެ 17ގެ ކުރިން އިންތިޚާބު ބާއްވަންޖެހޭނެކަމަށް ހަބީބު ވިދާޅުވިއެވެ.

ވެރިކަން ބަދަލުވާ މަރުހަލާއަށް ވަގުތު ދެއްވުމަށް، އިންތިޚާބީ ރައީސް އަދި މާލެ ސިޓީގެ މޭޔަރު ޑރ. މުހައްމަދު މުއިއްޒުގެ މަސްއޫލިއްޔަތުތައް ޑެޕިއުޓީ މޭޔަރު އަހުމަދު ނަރީޝާ ވަނީ ހަވާލުކުރައްވާފައެވެ. ހުސްވާ މޭޔަރު ކަމުގެ މަގާމަށް ވާދަކުރެއްވުމުގެ ޝައުގުވެރިކަން ބައެއް ފަރާތްތަކުން މިހާރުވެސް އަންނަނީ ފާޅުކުރައްވަމުންނެވެ.

އެގޮތުން އެމްޑީޕީގެ ފަރާތުން ޔޫތު މިނިސްޓަރު އަހުމަދު މަޚުލޫފް އެ މަގާމަށް ވާދަކުރައްވާނެކަން ހާމަކުރައްވާފައިވާއިރު، ދަ ޑިމޮކްރެޓްސްގެ ފަރާތުން މާލެ ސިޓީގެ ކައުންސިލު މެމްބަރ މުހައްމަދު ސައިފް ފާތިހު ވާދަކުރައްވާނެކަން ވަނީ ހާމަކުރައްވާފައެވެ.