އިންތިގާލީ މަރުހަލާގައި ކުރިން އެއްބަސްވެފައިވާ މަޝްރޫޢުތައް ހަވާލުކުރެވޭނެ: ޕީސީބީ
7 އޮކްޓޯބަރު 2023 | ހޮނިހިރު 16:55ޕީސީބީން މިހެން ބުނެފައިމިވަނީ ކުރިން އެ ބޯޑުން ނެރުނު އިއުލާނު މުރާޖާ ކުރުމަށްފަހު ނެރުނު އިއުލާނެއްގައި
ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޮޑު (ޕީސީބީ)ގެ ނައިބު ރައީސް މުހައްމަދު ފިރާޒް
އިންތިގާލީ މަރުހަލާގައި އައު މަޝްރޫޢުތައް ނުހިންގި ނަމަވެސް ކުރިން އެއްބަސްވެފައިވާ މަޝްރޫޢުތައް ކުންފުނިތަކާއި ހަވާލު ކުރެވޭނެ ކަމަށް ޕްރައިވަޓައިޒޭޝަން ކޯޕަރަޓައިޒޭޝަން ބޯޑް (ޕީސީބީ)އިން ބުނެފިއެވެ.
ޕީސީބީން މިހެން ބުނެފައިމިވަނީ ކުރިން އެ ބޯޑުން ނެރުނު އިއުލާނު މުރާޖާ ކުރުމަށްފަހު ނެރުނު އިއުލާނެއްގައެވެ.
ޕީސީބީން އެންމެ ފުރަތަމަ ނެރުނު އިއުލާނުގައި ބުނެފައިވަނީ އިންތިހާބީ ރައީސް ޑރ. މުހައްމަދު މުއިއްޒުގެ ރިޔާސީ ދައުރު ފެށުމާ ހަމަޔަށް ހިނގާ އިންތިގާލީ މުއްދަތުގައި ސަރުކާރުގެ ކުންފުނިތަކާ ސަރުކާރު ހިއްސާވާ ކުންފުނިތަކާއި ސަރުކާރުގެ ވިޔާފަރިކުރާ އެންމެހާ ތަންތަނުން ފަސް ކަމަކަށް އަމަލު ކުރުމަށް އެދިފައެވެ.
އެގޮތުން ކުންފުނިން އާންމުކޮށް ހިންގާ ވިޔަފާރީގެ މުއާމަލާތްތައް ފިޔަވައި މުޅިން އަލަށް ޕްރޮޖެކްޓެއް ނުވަތަ ކުންފުނިން ބޮޑު ހަރަދެއް ކުރަންޖެހޭ އައު އެއްވެސް ކަމެއް ނުކުރުމާއި ކުންފުނީގެ އާމްދަނީއަށް އަސަރުކުރާނެ ގަވައިދުތަކާއި އުސޫލުތަކާއި ނިންމުންތަކަށް އެއްވެސް ބަދަލެއް ނުގެނައުމަށް އެ ބޯޑުން އަންގާފައިވެއެވެ.
އަދި ކުންފުނީގެ މުވައްޒަފުންނަށް މުސާރައާއި އިނާޔަތްދިނުމަށް ކަނޑައެޅިފައިވާ އުސޫލުތަކާއި މުސާރައާއި އިނާޔަތްތަކަށް އެއްވެސް ބަދަލެއް ނުގެނައުމަށްވެސް ޕީސީބީން އަންގާފައިވެއެވެ.
އޭގެ އިތުރުން ކުންފުނީގެ މުވައްޒަފުންނާ ގުޅޭ ގަވާއިދުތަކާއި އުސޫލުތަކަށް އެއްވެސް ބަދަލެއް ނުގެނައުމަށާއި ކުންފުނީގެ ވަޒީފާގެ އޮނިގަޑަށް މި މުއްދަތުގައި ބަދަލެއް ގެނެސްގެން ނުވާނެ ކަމަށް ވެސް ޕީސީބީން އަންގާފައިވެއެވެ.
ނަމަވެސް ޕީސީބީން ފަހުން މުރާޖާކޮށް ނެރުނު ބަޔާނުގައި ބުނެފައިވަނީ ކުންފުނިތަކުން ކޮންޓްރެކްޓަރުންނާއި ސަޕްލަޔަަރުންނާ ނެގޯޝިއޭޓްކުރެވިފައިވާ މަޝްރޫޢުތައް އަދި ހިނގަމުންދާ މަޝްރޫޢުތަކުގެ އެކްސްޓެންޝަން ފަދަ ކަންކަން ކުރިއަށް ގެންދެވޭނެ ކަމަށެވެ.
އަދި މި މަޝްރޫޢުތަކަކީ ސަރުކާރުގެ ސިޔާސަތުތަކުގެ ތެރެއިން ރައްޔިތުންނަށް ލާބަ އާއި މަންފާ ހުރި ޕްރޮޖެކްޓުތަކަކަށް ވާން ޖެހޭނެ ކަމަށް އެ ބޯޑުން ބުނެފައިވެއެވެ.
މީގެއިތުރުން އިންތިހާބީ ރައީސް ޑރ. މުއިއްޒުގެ ފަރާތުން އިންތިގާލީ މަރުހަލާގައި މަސައްކަތް ކުރައްވަމުން ގެންދަވާ އިންތިގާލީ ކޮމިޓީއަށް ބޭނުންވާ ހުރިހާ މައުލޫމާތު ފޯރުކޮށް ދިނުމަށާއި އެ ކޮމިޓީއަށް ބޭނުންވާނެ ލިޔެކިއުންތަކާއި މައުލޫމާތު ފަސޭހައިން ލިބޭނެ އިންތިޒާމެއް ހަމަޖެއްސުމަށް ވެސް ސަރުކާރުގެ ކުންފުނިތަކަށް އެ ބޯޑުން އަންގާފައިވެއެވެ.
