އަނިޔާގައި ހުއްޓަސް މެސީ އާޖެންޓީނާ ޓީމުގައި ހިމަނައިފި

އަނިޔާގައި ހުއްޓަސް ވޯލްޑްކަޕް ކޮލިފައިންގައި ކުޅޭ އާޖެންޓީނާ ޓީމުގައި ކެޕްޓަން ލަޔޮނަލް މެސީ ހިމަނައިފި އެވެ.

އޭނާގެ ފަޔަށް ލިބުނު އަނިޔާގެ ސަބަބުން މެސީ އަށް ވަނީ އެންމެ ފަހުން އޭނާގެ ކުލަބު ކުޅުނު ތިން މެޗުގައި ވެސް ނުކުޅެވިފަ އެވެ. ނަމަވެސް އޭޖެންޓީނާއިން އެމީހުންގެ ކެޕްޓަން ޓީމުގައި ހިމެނީ އޭނާ އަށް ކުޅެވޭނެކަން ޔަގީން ނުވަނީހެވެ.

ކޮލިފައިންގައި އާޖެންޓީނާ ނުކުންނާނީ އަންނަ ބުރާސްފަތި ދުވަހު ޕެރަގުއާއޭ ދެކޮޅަށެވެ. އޭގެ ފަސް ދުވަސް ފަހުން ޕެރޫއާ ދެކޮޅަށް ވެސް ކުޅެންޖެހޭނެ އެވެ.

އުމުރުން 36 އަހަރުގެ މެސީ، ފިޓްނަސް އެންމެ ފުރިހަމައަށް ނެތުމުން އޭނާ މި ދެ މެޗުގައި ބޭނުންކުރާނީ ކިހާ ވަރަކަށްތޯ ނޫސްވެރިން ސުވާލުކުރުމުން އާޖެންޓީނާ ޓީމުން ވަކި އެއްޗެއް ނުބުނެ އެވެ.

ދެކުނު އެމެރިކާ ބައްރުގެ ކޮލިފައިންގައި އާޖެންޓީނާ މިވަގުތު އޮތީ ކުޅުނު ދެ މެޗުން ވެސް މޮޅުވެ ހަ ޕޮއިންޓާއެކު ޓޭބަލުގެ ދެ ވަނައިގަ އެވެ. އެއްވަނައިގައިވަނީ ބްރެޒިލް އެވެ.