ޔާމީންގެ ނުސީދާ އެހެންނަމަވެސް ބޮޑު ތުހުމަތެއް!

ކޮންމެއަކަސް އިންތިހާބުގެ ނަތީޖާއާއެކު ކުރީގެ ރައީސް އަބްދުﷲ ޔާމީން ގެކޮޅަށް ބަދަލުކުރެވިއްޖެއެވެ. ގޭ ބަންދަކަށެވެ. ވަގުތީ ގޮތުންނެވެ. މިކަމުގައި އެންމެ ބުރަ މަސައްކަތެއް ކުރީ ޕީޕީއެމްގެ ކުރީ ސަފުގައި މުޒާހަރާ ކުރަމުންދާ މަދު އަންހެންވެރިންތަކެކޭ ބުނުމަކުން ދޮގަކަށް ނުވާނެއެވެ. ކޮންމެއަކަސް ޖަލުން ގެއަށް ބަދަލުވެވަޑައިގަތުމާއެކު އެ ސަޕޯޓަރުން ވަނީ އެމަނިކުފާނަށް ފަރިވަޅެއްވެސް އަރުވާފައެވެ. ނަމަވެސް މި ފަރިވަޅުގައި ޔާމީން ދެއްކެވީ ޖަލުގައި ހުންނެވި ނަމަވެސް އަދި މުޒާހަރާތައް ހަމަ ލޮލުން ނުފެނުނު ނަމަވެސް ތެދު ވާހަކަފުޅެކެވެ.

ވިދާޅުވީ މިހާރުވެސް ފެނިގެން މިދަނީ އެތައް މަސައްކަތެއް ކުރުމަށްފަހުގައި އެގޮތަށް ގޭގައި ހުންނަވަން ޖެހުމުން ނުވަތަ ޖަލަށްލީމަ އާދައިގެ އާންމު ރައްޔިތުންތަކެއް އެމަނިކުފާނު ދެކެ ލޯބިވާ ރައްޔިތުންތަކެއް ނުކުންނަވާތަން ކަމަށެވެ. ނަމަވެސް އެކަމަކު ބޮޑެތި ގޮނޑިތަކުގައި ތިބި ބޭފުޅުންނަށް އެ ފަސޭހަތަކެއް ލިބިގެންދިޔައީ ރައީސް ޔާމީނާއި އެ ޓީމް ކުރި މަސައްކަތުން ކަމަށް ފަރިވަޅު ހިފައިގެން އައިސްތިބި ސަޕޯޓަރުންނާއި މުހާތަބުކުރައްވާ ވިދާޅުވިއެވެ. ކޮންމެއަކަސް ޔާމީން ވެސް އެ ވިދާޅުވި ދޮގުވާހަކަފުޅެއް ނޫނެވެ. އެއްހާސް ދުވަސް ޖަލުގައި ހޭދަކުރެއްވި އިރު މަގުމައްޗަށް އެމަނިކުފާނުގެ ހައްގުގައި ނުކުތީ އިދިކޮޅު ލީޑަރޝިޕްގެ މަދު ބޭފުޅެކެވެ. ވަކިން ހާއްސަކޮށް އެކި މަގާމުތަކުގައި ތިބި މީހުން އެއްވެސް ވަރަކަށް ނުފެނެއެވެ.

އެމަނިކުފާނު ވާހަކަފުޅު ކުރިއަށް ގެންދަވަމުން ވިދާޅުވީ އިންސާނީ ތަބިއްޔަތުގައި ދެރަކަމަކަށް ވަނީ މަގާމުތަކަށް އާދެވުނީމާ ކަންކަން ހަނަދާން ނެތުން ކަމަށެވެ. އެހެންނަމަވެސް ރައްޔިތުންގެ ލޯތްބަކީ ޖަލުގޮޅިޔަށް ލިޔަސް އަނބުރާ ގެންދެވޭނެ އެއްޗެއްނޫން ކަމަށެވެ. ރަނގަޅު ވާހަކައެކެވެ. މެންބަރުންގެ ގޮތުގައި މަޖިލީހުގައި ތިއްބަސް އަދި މޭޔަރުކަމުގައި ސިޓީ ކައުންސިލްގައި އިންނެވިޔަސް ހަގީގަތަކީ އެ މީހުންނަށް އެ ހިސާބަށް ދެވުނީ ޔާމީން ވިއްކައިގެންނެވެ. މިއަދު އިންތިހާބީ ރައީސްއަށް މި ވާހަކަ އެންމެ ބޮޑަށް އަމާޒުވެއެވެ. ސަބަބަކީ އެންމެ މަދުން މުޒާހަރާތަކުން ފެނުނީ މުއިއްޒުކަމަށް ވާތީއެވެ. ބާއްވާ ބޮޑު އެއްވުމަކުން ނޫނީ ދެން ނުފެނެއެވެ. މޭޔަރުކަމުން ރައީސްކަމަށް މިއަދު އާދެވި މާދަމާ ފިނިކޮޓަރީގައި ބޮޑު ގޮނޑީގައި އިންނަވާއިރު، ޔާމީންގެ މަތިން ހަމަ ހަނދާން ނެތޭނެއެވެ. ރައީސް ޔާމީން އެ ވިދާޅުވީ އެ ވާހަކައެވެ.

ޔާމީން ވިދާޅުވީ އަދިވެސް ޖަލުގައި ހުންނަވާފާނެ ކަމަށެވެ. ނަމަވެސް އެންމެ ބޮޑު އުފަލަކީ އެމްޑީޕީގެ ސަރުކާރު ނިމުމަކަށް އައުން ކަމަށެވެ. ހިތާމަފުޅުކުރައްވަނީ އަނެއްކާވެސް މަޖިލީހަށް ނުކުމެވަޑައިގަންނަވާއިރު ކެމްޕޭނަށް ވަޑައިގަންނަވާނީ ރައްޔިތުން ކައިރިއަށް ކަމަށް ވިދާޅުވިއެވެ. އެމަނިކުފާނުގެ ސަޕޯޓަރުންގެ ގޭގޭގައި ޓަކި ޖަހާނެ ކަމަށާއި، އެކަމަކު ސަޕޯޓަރުން މިއަދު މަގުމައްޗަށް ނުކުމެ ތިއްބެވީ އެމަނިކުފާނުގެ ހައްގުގައި ކަމަށް ވިދާޅުވިއެވެ. އަދި މާލޭ ގޮނޑިތަކާއި ރަށްރަށުގެ ގޮނޑިތަކަށް ކުރިމަތިލައްވާ އަޅުގަނޑުމެންގެ ބޭފުޅުން ސަޕޯޓަރުންގެ އަރިހަށް ވަޑައިގަންނަވާ ވޯޓު ހޯއްދަވަން އަންނާނެ ކަމަށެވެ. އަދި އެމަނިކުފާނުގެ ހައްގުގައި ނުކެމެ ތިބީ ކަނބަލުން ކަމަށާއި، ކޮންމެ މީހަކު އައި ނަމަވެސް، ސަލާމްކުރައްވާ، ރައީސް ޔާމީންގެ ހައްގުގައި ސަޕޯޓަރުން، މައިންބަފައިންނާއި ދަރިން އަދި ފިރިން ގޭގައި ދޫކޮށްލުމަށް ނުކުންނެވި އިރު، މަގާމުތަކަށް ވަޑައިގަންނަވާ ބޭފުޅުން ތިއްބެވީ އެކިއެކި ފިނިކޮޓަރީގައި ކަމަށް ވިދާޅުވެ ދެއްވުމަށް ޔާމީން އެދިވަޑައިގެނެނެވިއެވެ.

އެހެންވީމަ މިހާރު މަޖިލީހަށް ވަޑައިގަންނަވަން އުޅުއްވަނީ ގައުމީ ހައްގުގައިތޯ ނުވަތަ އަމިއްލަ ކަމެއް ފުއްދަންތޯ ސާފުކުރެއްވުމަށް ވެސް އެދިވަޑައިގެންނެވިއެވެ. ގައުމުގެ ހައްގުގައި އެންމެ ވަރުގަދައަށް މަސައްކަތް ކުރި ލީޑަރު ހައްޔަރުގައި ހުރި އިރު ތިބެންވާނެ ސަޕޯޓަރުންނާއެކީ މަގުމަތީގައި ކަމަށް ރައީސް ޔާމީން ވިދާޅުވިއެވެ. މަގުމަތީގައި އުޅެންވާނެ ކަމަށާއި، ބަސް ބުނަންވާނީ މަގާމު ލިބުމުން ނޫން ކަމަށާއި، އެ މީހާގެ އެތެރޭގައި އޮއްޓަރެއް ހުރި ކަމެއް ދައްކަން ވާނީ އޭގެ ކުރިން ކަމަށް ވިދާޅުވިއެވެ.

ކޮންމެއަކަަސް ޔާމީންވެސް އެ ދެއްކެވީ ރަނގަޅު ވާހަކަފުޅެކެވެ. މަގުމަތިކޮށްލީ އާންމު މެންބަރުންނެވެ. މުޒާހަރާކުރަން ނުކުންނަ މީހުންގެ ތެރޭގައި މަދު ބަޔަކު އަބަދު އެކަމުގައެވެ. މަގާމާއި ފިނިކޮޓަރީގައި ތިބި ބަޔަކު ނުފެނެއެވެ. ކޮންމެއަކަސް ޔާމީންގެ އުދާސްތައް ބަންޑުންކޮށްލިއެވެ. ދޭހަވެގެން ދިޔައީ ރިޔާސީ އިންތިހާބުގައި ވާދަ ނުކުރެވުނު ކަމުގައި ވިޔަސް އަދި މިނިވަން ނުވިކަމުގައި ވިޔަސް، އެމަނިކުފާނުގެ ހައްގުގައި ފިނިކޮޓަރީގައި ތިބި ބަޔަކު ނުނުކުތް ކަމެވެ.