ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުގެ ގިނަ އެންގުންތަކެއް

ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން ގިނަ އެންގުންތަކެއް އަންގައިފިއެވެ.

ބުދަ ދުވަހު ނެރުނު ސަރކިއުލަރއެއްގައި ޕްރައިވެޓައިޒޭޝަން ބޯޑުން ބުނީ ސަރުކާރުގެ ބާރުތައް އައު ސަރުކާރަށް ބަދަލުކުރުމުގެ މި މަރުޙަލާގައި ކުންފުނިތަކުގެ ވަޒީފާގެ އޮނިގަނޑަށް އެއްވެސް ބަދަލެއް ނުގެނައުމަށް އެދޭ ކަމަށެވެ.

ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން ނެރުނު ސަރކިއުލަރގައި ވަނީ އިންތިޤާލީ މަރުޙަލާގައި، ސަރުކާރުގެ ކުންފުނިތަކާއި، ސަރުކާރުން ވިޔަފާރި ކުރާ ކުންފުނިތަކާއި، ސަރުކާރު ހިއްސާވާ ކުންފުނިތަކުން ޢަމަލު ކުރަންވީ ގޮތްތައް ހާމަކޮށްފައެވެ.

ކުންފުނިތަކުން އަލަށް އެއްވެސް ޕްރޮޖެކްޓެއް ނުފެށުމާއި، ބޮޑު ޚަރަދު ކުރަންޖެހޭ އެއްވެސް ކަމެއް ނުކުރުމަށާއި ކުންފުނީގެ އާމްދަނީއަށް އަސަރުކުރާނެ ޤަވާޢިދުތަކާއި އުޞޫލުތައް ނިންމުންތަކަށް ބަދަލެއް ނުގެނައުމަށާއި، މުވައްޒަފުންނަށް މުސާރައާއި ޢިނާޔަތާއި ދިނުމަށް ކަނޑައެޅިފައިވާ އުސޫލްތަކާއި މުސާރައާއި އިނާޔަތްތަކަށް އެއްވެސް ބަދަލެއް ނުގެނައުމަށާއި، ކުންފުނިތަކުގެ މުވައްޒަފުންނާއި ގުޅޭ ޤަވާޢިދުތަކާއި އުޞޫލުތަކަށް ބަދަލު ނުގެނައުމަށާއި، ކުންފުނީގެ ވަޒީފާގެ އޮނިގަނޑަށް ބަދަލު ނުގެނައުމަށް ވެސް ވަނީ އަންގާފައެވެ.

މީގެއިތުރުން އިންތިޤާލީ ކޮމެޓީއަށް ބޭނުންވާ މަޢުލޫމާތު ފޯރުކޮށްދެއްވުމަށާއި، އެ ކޮމިޓީއަށް ބޭނުންވާ ލިޔެކިއުންތަކާއި، މަޢުލޫމާތު ފަސޭހައިން ލިބޭނެ އިންތިޒާމް ހަމަޖައްސާ ދިނުމަށާއި އިންތިޤާލީ މުއްދަތުގައި ރައްޔިތުންގެ މަސްލަހަތު އިސްކުރުމަށް ޚާއްސަ ސަމާލުކަމެއް ދެއްވުމަށާއި، ޒިންމާދާރު އަދި ހާމަކަންބޮޑު ގޮތެއްގައި ކުންފުނިތަކުގެ ނިންމުންތައް ނިންމުމަށް ކުންފުނިތަކުގެ ބޯޑުތަކަށްވަނީ އަންގާފައެވެ.