އަދާލަތު ޕާޓީން ވެސް ނިންމީ ބަރުލަމާނީ ނިޒާމަށް ތާއީދު ނުކުރުމަށް
މިގޮތަށް ނިންމާފައިވަނީ ޢަދާލަތު ޕާޓީގެ މަޝްވަރާ މަޖިލީހުގެ އިއްތިފާޤުން
ޢަދާލަތު ޕާޓީގެ މަޝްވަރާ މަޖިލީހުގެ ތެރެއިން
ބަރުލަމާނީ ނިޒާމަށް ތާއީދު ނުކުރުމަށް އަދާލަތު ޕާޓީން ވެސް ނިންމައިފިއެވެ.
އެ ޕާޓީން ބުނީ ހޯމަ ދުވަހުގެ ރޭ ބޭއްވި ޢަދާލަތު ޕާޓީގެ މަޝްވަރާ މަޖިލީހުގެ އިއްތިފާޤުން ބަރުލަމާނީ ނިޒާމަށް ތާޢީދު ނުކުރުމަށް ފާސްކޮށްފައިވާ ކަމަށެވެ.
އަދާލަތު ޕާޓީން މިގޮތަށް ނިންމާފައިވާއިރު ރާއްޖޭގައި އޮންނަން ފެންނަ ވެރިކަމުގެ ނިޒާމާއި ގުޅޭގޮތުން ރައްޔިތުންގެ ފެންނަ ނުފެންނަ ނުފެންނަ ވޯޓެއް ނަގާނަމަ އެމްޑީޕީން ތާއީދުކުރާނީ ބަރުލަމާނީ ނިޒާމާ ދެކޮޅަށްކަމަށް އެ ޕާޓީގެ ގައުމީ މަޖިލީހުން ވެސް ވަނީ ފާސްކޮށްފައެވެ.
މީގެއިތުރުން މި ހިނގަމުންދާ އޮކްޓޯބަރު މަހުގެ 30 ވަނަ ދުވަހު ނިޒާމީ ވޯޓު ނުނެގޭނެ ކަމަށާއި، އެކަމަށް މަދުވެގެން 30 ދުވަސް ބޭނުންވާ ކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގު ވެސް ވަނީ ވިދާޅުވެފައެވެ.
އޮކްޓޫބަރު މަހުގެ 30 ގެ ކުރިން ވެރިކަމުގެ ނިޒާމު ބަދަލުކުރުމަށް ފެންނަ ނުފެންނަ ވޯޓު ނެގުމަށް ރައްޔިތުންގެ މަޖިލީހުން ވަނީ ފާސްކޮށްފައެވެ. މިކަމާއި ގުޅިގެން ރާއްޖެ.އެމްވީއަށް ވާހަކަފުޅު ދައްކަވަމުން ފުއާދު ވިދާޅުވީ ވޯޓު ނެގުމާއި ގުޅޭ މައުލޫމާތާއި އެކީގައި އެކަމަށް ބޭނުންވާ ބަޖެޓް ބޭނުންވާ ކަމަށެވެ. އަދި އިންތިހާބު ބޭއްވޭނީ އެންމެ އަވަހަށް ވެސް އެކަންކަން ހަމަޖެހޭތާ 30 ދުވަހުގެ ތެރޭގައި ކަމަށާއި، މިހާރު ހާލަތު އޮތްގޮތުން ވޯޓަށް އެހުމަށް ބޭނުންވާ ސުވާލު މަޖިލީހުން ފާސްވެފައިތޯ އަދި އެކަމާއި ބެހޭ ބިލްތައް ތައްޔާރުވެފައިވޭތޯ ޔަގީންކުރަން ޖެހޭ ކަމަށެވެ.
ފުއާދު ވިދާޅުވީ މިކަމާއި ގުޅިގެން ސިޔާސީ އެކި ޕާޓީތަކުގެ ހުރީ ތަފާތު އިހުސާސްތަކެއް ކަމަށާއި، އެހެންކަމުން ބޮޑު މަސައްކަތެއް އަދި ޚަރަދެއް ދައުލަތުގެ ބަޖެޓުން ކުރާ އިރުގައި އޮޅުންފިލުވަންޖެހޭ ކަންކަން އެބަހުރި ކަމަށާއި، އެފަދަ މަސައްކަތެއް ކުރިއަށް ގެންދާއިރު، އިލެކްޝަންސް ކޮމިޝަންގެ ވެސް މަސްއޫލިއްޔަތުތަކެއްވާ ކަމަށެވެ. ފުއާދު ވިދާޅުވީ މަޖިލީހުގައި އެދިފައިވާ ހުރިހާ ކަމެއް ހަމަޖެހިއްޖެނަމަ 30 ދުވަހުގެ ތެރޭގައި ނިޒާމީ ވޯޓު ނެގިދާނެ ކަމަށެވެ.
