ރާމޯސް އަތުން ބައިކޮޅަށް ވަތް ލަނޑާއެކު ބާސެލޯނާއަށް މުހިންމު މޮޅެއް

ސްޕެނިޝް ލީގުގައި ސެވިއްޔާއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބާސެލޯނާއިން މުހިންމު މޮޅެއް ހޯދައިފިއެވެ.

ހުކުރު ދުވަހުގެ ރޭ ކުޅުނު މެޗުން ބާސެލޯނާ މޮޅުވެފައި ވަނީ 1-0ންނެވެ. މެޗު ފަށައިގެން 12 ވަނަ މިނެޓުގައި ޔާއޯ ފެލިކްސް ފޮނުވާލި ބޯޅަ ސެވިއްޔާގެ ގޯލް ކީޕަރު ވަނީ މަތަކޮށްފައެވެ. އެތުލެޓިކޯ މެޑްރިޑުގައި ހުރުމަށްފަހު، ލޯނު އެއްބަސްވުމެއްގެ ދަށުން ބާސެލޯނާއަށް ކުޅެމުން އަންނަ ފެލިކްސް އަންނަނީ އެ ކުލަބުގައި މޮޅު ކުޅުމެއް ދައްކަމުންނެވެ. ފަހުން ސެވިއްޔާގެ ކެޕްޓަން އިވާން ރަކިޓިޗް ފޮނުވާލި ބާރު ހަމަލާ މަތަކުރީ ބާސެލޯނާގެ ގޯލް ކީޕަރެވެ. މެޗުގެ 21 ވަނަ މިނެޓުގައި ފެލިކްސް ފޮނުވާލި ބާރު ހަމަލާ އަމާޒުވީ ސެވިއްޔާ ގޯލުގެ ހުރަސް ދަނޑިއަށެވެ. މެޗުން ބާސެލޯނާ މޮޅުވީ ދެވަނަ ހާފުގައި ސެވިއްޔާގެ ޑިފެންޑަރު ސާޖިއޯ ރާމޯސް އަތުން ބައި ކޮޅަށް ވަތް ލަނޑުންނެވެ. އެއީ ފެރާން ޓޮރޭސް ހުރަސްކޮށްދިން ބޯޅައެއް، ލަމީން ޔަމާލް ބޮލުން ޖައްސާލި ވަގުތު ރާމޯސް ގައިގައި ޖެހިފައި ގޯލަށް ވަދެގެންނެވެ.

މޮޅާއެކު ބާސެލޯނާ ވަނީ އަނެއްކާވެސް ލީގު ތާވަލްގެ އެއްވަނައަށް ޖެހިލާފައެވެ. އެއީ ލީގުގައި ކުޅުނު އަށް މެޗުން 20 ޕޮއިންޓު ހޯދައިގެންނެވެ. ބާސެލޯނާއަށްވުރެ އެއް މެޗު މަދުން ކުޅެގެން ދެވަނާގައި އޮތް ޖިރޯނާއަށް ލިބެނީ 19 ޕޮއިންޓެވެ. ތިންވަނަގައި ވާދަވެރި ރެއާލް މެޑްރިޑު އޮތީ 18 ޕޮއިންޓާއެކުއެވެ.