ނިއުކާސަލް އަތުން ބަލިވެ، ކަރަބޯ ކަޕުން ސިޓީ ކަޓައިފި

ކަރަބޯ ކަޕްގެ ތިން ވަނަ ބުރުގައި ނިއުކާސަލް ޔުނައިޓެޑާ ދެކޮޅަށް ކުޅުނު މެޗުން ބަލިވެ، މެންޗެސްޓަރ ސިޓީ މުބާރާތުން ކަޓައިފި އެވެ.

ބުދަ ދުވަހުގެ ރޭ އެސްޓީ ޖޭމްްސް ޕާކުގައި ކުޅުނު މެޗު ނިއުކާސަލް އިން ކާމިޔާބު ކުރީ 1-0 އިންނެވެ. މި މެޗުގައި ސިޓީގައި މޮޅު ކުޅުމެއް ދައްކަމުން އަންނަ ނޯވޭގެ އާލިން ހާލަންޑަށް ކޯޗު ޕެޕް ގާޑިއޯލާ ފުރުސަތު ދީފައެއް ނުވެ އެވެ. މެޗުގައި އޭނާ ހިމަނާފައިވަނީ ބެންޗުގަ އެވެ. ސިޓީގެ އެއް ވަނަ ގޯލް ކީޕަރު، ބްރެޒިލްގެ އެޑާސަންގެ ބަދަލުގައި މި މެޗުގައި ފުރުސަތު ދިނީ ދެ ވަނަ ގޯލް ކީޕަރު ސްޓެފަން އޯޓެގާ އަށެވެ.

ސިޓީއާ ދެކޮޅަށް ކުޅުނު މެޗުގައި ނިއުކާސަލް އިން ލަނޑު ޖަހާފައި ވަނީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން އަށް ވަނަ މިނެޓުގައި އެ ޓީމަށް ލީޑު ނަގައިދިނީ އަލެކްސެންޑާ އިސާކް އެވެ. އެއީ ސިޓީގެ ގޯލު އޭރިޔޭ ބޭރުން ލިބުނު ބޯޅައެއް ހިފައިގެން އޭރިޔާ ތެރެއަށް ވަދެ، ތިން ޑިފެންޑަރު ކައިރިން ނައްޓާލުމަށްފަހު ޖޯލިންޓަން ދިން ބޯޅައެއް ގޯލަށް ވައްދާލައިގެން އިސާކް ޖެހި ލަނޑެކެވެ. އޭގެ ފަހުން ވެސް އިސާކް އަށް ވަނީ ނިއުކާސަލް އަށް ލީޑު ފުޅާ ކޮށްދޭން ފުރުސަތު ލިބިފަ އެވެ. އޭރިޔާ ތެރެއިން އޭނާ ފޮނުވާލަން މަސައްކަތް ކުރި ބޯޅަ ބޭރުވީ، ސިޓީގެ ޑިފެންޑަރެއްގެ ފައިގައި ޖެހިފަ އެވެ.

މިއީ މި ސީޒަންގެ އެފްއޭ ކޮމިއުނިޓީ ޝީލްޑް މެޗުގައި އާސެނަލް އަތުން ބަލިވި ފަހުން، ސިޓީ ބަލިވި ފުރަތަމަ މެޗެވެ. ޕްރިމިއާ ލީގުގައި މިހާތަނަށް ކުޅުނު ހަ މެޗުން ވެސް ސިޓީ އޮތީ މޮޅުވެފަ އެވެ. ޔުއެފާ ޗެމްޕިއަންސް ލީގު ގްރޫޕް ސްޓޭޖުގެ ފުރަތަމަ މެޗުން ވެސް އެ ޓީމު އޮތީ މޮޅުވެފަ އެވެ. އަނެއްކޮޅުން ލީގު ތާވަލްގެ އަށް ވަނައިގައި އޮތް ނަމަވެސް، މިދިޔަ ސީޒަންގައި ނިއުކާސަލް ވަނީ މޮޅު ކުޅުމެއް ދައްކައިފަ އެވެ.