ހަންގޭރީގެ ބުޑަޕެސްޓްގައި ކުރިއަށް ގެންދިއުމަށް ހަމަޖެހިފައިވާ 17 ވަނަ ފީނާ ވާރލްޑް ސްވިމިން ޗެމްޕިއަންޝިޕްގައި ވާދަކުރުމަށް ދިވެހި ފެތުންތެރިން ބުޑަޕެސްޓަށް ފުރައިފިއެވެ.

ދުނިޔޭގެ ފެތުމުގެ ކުޅިވަރުތަކާއިބެހޭ މައި އިދާރާ (ފީނާ) އިން ބާއްވާ މި މުބާރާތަށް ދިވެހި ޓީމް ފުރާފައިވަނީ އަވައްޓެރި ސްރީލަންކާގައި ތަމްރީން ކޭމްޕެއް ކުރިއަށް ގެންދިއުމަށް ފަހުގައެވެ.

މުބާރާތުގައި ރާއްޖެ ތަމްސީލުކުރާ ފެތުންތެރިންނަކީ، މުބާލް އައްޒާމް އިބުރާހިމް އާއި، އިސްމާއިލް މުއުތަސިމް އަދުނާން އާއި، އާމިނަތު ޝަޖަންގެ އިތުރުން އައިޝަތު ސާޖިނާއެވެ. ޓީމުގެ ކޯޗަކީ އިބްރާހިމް މޫސާއެވެ. ފިޒިއޮތެރަޕިސްޓެއްގެ ގޮތުން މުހަންމަދު ފަޔާޒް އަލީ ރިޒާ ހަރަކާތްތެރި ވާއިރު، ޓީމުގެ މެނޭޖަރެއްގެ ގޮތުގައި ސްވިމިން އެސޯސިއޭޝަންގެ ރައީސް މުހަންމަދު އަބްދުއްސައްތާރު ވަނީ ބައިވެރިވެ ވަޑައިގެންފައެވެ.

މި މުބާރާތުގައި ރާއްޖެ ޓީމުން އިސްމާއިލް މުއުތަސިމް އަދުނާން، 50 މީޓަރު އަދި 100 މީޓަރު ބްރެސްޓް ސްޓްރޯކް އިވެންޓުގައި ވާދަކުރާއިރު، މުބާލް އައްޒާމް އިބްރާހިމް ވާދަކުރާނީ 400 މީޓަރު ފްރީސްޓައިލް އަދި 400 މީޓަރު އިންޑިވިޖުއަލް މެޑްލޭގައެވެ. އައިމިނަތު ސަޖަން 50 މީޓަރި އަދި 100 މީޓަރު ފްރީސްޓައިލްގައި ވާދަކުރާއިރު، އައިޝަތު ސާޖިނާ ވާދަކުރުމަށް ހަމަޖެހިފައިވަނީ 50 މީޓަރު އަދި 100 މީޓަރު ބްރެސްޓްސްޓްރޯކްގައެވެ. ޓީމް އިވެންޓުން ރާއްޖެ ވާދަކުރާނީ 4 ގުނަ 100 މީޓަރު ފްރީސްޓައިލް މިކްސް ރިލޭ އަދި 4 ގުނަ 100 މީޓަރު މިކްސް މެޑްލޭ ރިލޭގައެވެ.

ދިވެހި ޓީމް އެނބުރި ރާއްޖެ އައުމަށް ހަމަޖެހިފައިވަނީ މިމަހުގެ 30 ވަނަ ދުވަހުއެވެ.