ބާންލީ ބަލިކޮށް، ޔުނައިޓެޑަށް ހަމަޖެހުމެއް

އިނގިރޭސި ޕްރިމިއާ ލީގުގައި ބާންލީއާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ޔުނައިޓެޑުން ހަމަޖެހުމެއް ހޯދައިފި އެވެ.

ހޮނިހިރު ދުވަހުގެ ރޭ ބާންލީގެ ދަނޑުގައި އޮތް މެޗަށް ކުރިމަތިލީއިރު، ޔުނައިޓެޑު އޮތީ ޕްރެޝަރުގަ އެވެ. އެންމެ ފަހުން ކުޅުނު ތިން މެޗުން ވެސް ބަލިވެފަ އެވެ. އެއީ ޕްރިމިއާ ލީގުގައި އާސެނަލް އަދި ބްރައިޓަނާ ދެކޮޅަށް ކުޅުނު މެޗުގެ އިތުރުން، ޔުއެފާ ޗެމްޕިއަންސް ލީގުގައި ބަޔާން މިއުނިކާ ދެކޮޅަށް ކުޅުނު މެޗެވެ. އެހެންކަމުން، ބާންލީ މެޗުން ކޮންމެހެން ވެސް ޔުނައިޓެޑަށް ތިން ޕޮއިންޓު މުހިންމުވި އެވެ.

ބާންލީއާ ދެކޮޅަށް ކުޅުނު މެޗު ޔުނައިޓެޑުން ކާމިޔާބު ކުރީ 1-0 އިންނެވެ. މެޗު ފަށައިގެން 25 ވަނަ މިނެޓުގައި ޔުނައިޓެޑުގެ ޑިފެންޑަރު ޖޮނީ އިވާންސް ވަނީ ލަނޑެއް ޖަހައިފަ އެވެ. ނަމަވެސް ވީއޭއާރު ބެލުމަށްފަހު ރެފްރީ ނިންމީ އެ ލަނޑު ބަަލައިނުގަތުމަށެވެ. އޭގެ ފަހުން ފުރަތަމަ ހާފުގެ 45 ވަނަ މިނެޓުގައި ޔުނައިޓެޑަށް ލީޑު ނަގައިދިނީ ކެޕްޓަން ބްރޫނޯ ފެނާންޑޭސް އެވެ. އޭނާ އެ ލަނޑު ޖެހީ އިވާންސް ތަނަވަސްކޮށްދިން ފުރުސަތެއްގަ އެވެ.

މޮޅާއެކު ޔުނައިޓެޑު ވަނީ ލީގު ތާވަލްގެ އަށް ވަނަ އަށް ޖެހިލައިފަ އެވެ. އެއީ މިހާތަނަަށް ކުޅުނު ހަ މެޗުން ނުވަ ޕޮއިންޓު ހޯދައިގެންނެވެ. ހަތް ވަނައިގައި އޮތްް އެސްޓަން ވިލާ އަށް ނުވަ ޕޮއިންޓު ލިބެނީ ފަސް މެޗުންނެވެ. މެޗުގެ އަދަދު ހަމަކޮށްގެން، ފަރަގު ފުޅާކުރުމުގެ ފުރުސަތު އެ ޓީމަށް އޮންނާނެ އެވެ.