ގެވެށި އަނިޔާ ހުއްޓުވުމުގެ ޤާނޫނު ތަންފީކުރުމުގެ މަސްއޫލިއްޔަތު ކައުންސިލްތަކާ ހަވާލުކުރުމަށް ގަވާއިދެއް
ގެވެށި އަނިޔާގެ މައްސަލައެއް ރިޕޯޓް ކޮށްފިނަމަ ވަގުތުން އެކަން ކަމާ ބެހޭ އިދާރާތަކަށް އަންގަން ޖެހޭނެ
ކުޑަކުދިންނަށް ކުރާ އަނިޔާ
ގެވެށި އަނިޔާ ހުއްޓުވުމުގެ ޤާނޫނު ތަންފީކުރުމުގެ މަސްއޫލިއްޔަތު ކައުންސިލްތަކާ ހަވާލުކުރުމަށް ފެމިލީ ޕްރޮޓެކްޝަން އޮތޯރިޓީން ގަވާއިދެއް އެކުލަވާލައިފިއެވެ.
މި ގަވާއިދަކީ ކައުންސިލުތަކުގެ އިހުތިސާސް ހިނގާ ސަރަޙައްދުތަކުގައި ގެވެށި އަނިޔާ ހުއްޓުވުމުގެ ޤާނޫނު ތަންފީޒު ކުރުމުގެ މަސްއޫލިއްޔަތު އުފުލުމަށް އެ ކައުންސިލުތަކަށް މަގުފަހިކޮށްދިނުމަށާއި ގެވެށި އަނިޔާ ހުއްޓުވުމުގެ ޤައުމީ ސިޔާސަތު ތަންފީޒު ކުރުމުގައި ކައުންސިލުތަކުގެ ބައިވެރިވުން ހޯދޭކަން ކަށަވަރުކުރުމަށް އެކުލަވާލައިފައިވާ ގަވާއިދެކެވެ. މި ގަވާއިދުގެ ދަށުން ކައުންސިލްތަކާ މަސްއޫލިއްޔަތު ހަވާލު ކުރައްވާނީ ޖެންޑަރ މިނިސްޓަރުއެވެ.
ފެމިލީ ޕްރޮޓެކްޝަން އެޖެންސީން ގެޒެޓުކޮށްފައިވާ މި ގަވާއިދުގެ ދަށުން ގެވެށި އަނިޔާގެ މައްސަލައެއް ރިޕޯޓުކޮށްފިނަމަ ނުވަތަ ގެވެށި އަނިޔާގެ މައްސަލައެއް ރަށުތެރޭގައި ހިނގާކަމުގެ މަޢުލޫމާތު ލިބިއްޖެނަމަ ނުވަތަ އެފަދަ ކަމެއް ފާހަގަކުރެވިއްޖެނަމަ އެ ކަމެއް ވަގުތުން އެ ރަށެއްގައި ޤާއިމުކޮށްފައިވާ ފުލުހުންގެ މަރުކަޒަކަށް ނުވަތަ އެފަދަ މަރުކަޒެއް ނެތްނަމަ އެ އަތޮޅެއްގައި ގާއިމުކޮށްފައިވާ ފުލުހުންގެ މަރުކަޒަކަށް ކައުނސިލުން އަންގަން ޖެހޭނެއެވެ. އަދި އެކަން ރިކޯޑުކޮށް ގެވެށި އަނިޔާއާ ގުޅުންހުރި ތަފާސްހިސާބު ބަލަހައްޓައ،ި މިނިސްޓަރު އަންގާ ގޮތެއްގެ މަތީން ފެމެލީ ޕްރޮޓެކްޝަން އޮތޯރިޓީއާ ހިއްސާކުރަމުން ގެންދިޔުމަކީ ވެސް ކައުންސިލުގެ ޒިންމާއެކެވެ.
ގެވެށި އަނިޔާގެ ޝިކާރައަކަށް ވެފައިވާ ފަރާތަކުން ކައުންސިލުގެ އެހީތެރިކަމަށް އެދިއްޖެ ހާލަތެއްގައި ފެމެލީ ޕްރޮޓެކްޝަން އޮތޯރިޓީ ނުވަތަ މިނިސްޓްރީ ނުވަތަ މިނިސްޓްރީގެ ފެމިލީ އެންޑް ޗިލްޑްރަންސް ސަރވިސް ސެންޓަރު މެދުވެރިކޮށް އެ ފަރާތަކަށް ބޭނުންވާ އެހީތެރިކަން ފޯރުކޮށްދިނުމަށް ކައުންސިލްތަކުން މަގުފަހިކޮށްދޭން ޖެހޭނެއެވެ. އަދި ގެވެށި އަނިޔާގެ މައްސަލަތަކާ ދެކޮޅަށް ހޭލުންތެރިކަމުގެ ޕްރޮގްރާމްތައް ހިންގުމާއި ގެވެށި އަނިޔާ ހުއްޓުވުމުގެ ޤައުމީ ސިޔާސަތު ތަންފީޒު ކުރުމުގައި ފެމިލީ ޕްރޮޓެކްޝަން އޮތޯރިޓީއަށް އެއްބާރުލުން ދިނުމަކީ ވެސް މި ގަވާއިދުގެ ދަށުން ކައުންސިލްތަކުގެ ޒިންމާއެކެވެ.
ގެވެށި އަނިޔާގެ މައްސަލަތަކުގައި ކުއްލިގޮތަކަށް ފިޔަވަޅު އަޅަންޖެހޭ ހާލަތްތަކާއި ވަގުތުން ފިޔަވަޅު އަޅަންޖެހޭ ހާލަތްތަކުގައި ކަމާ ގުޅުންހުރި އިދާރާތައް މެދުވެރިކޮށް ފިޔަވަޅުއެޅުމަށް މަގުފަހިކޮށްދިނުމަކީ އަތޮޅު ކައުންސިލްތަކުގެ މަސްއޫލިއްޔަތެެވެ.
މި ގަވާއިދުގެ ދަށުން ކައުންސިލްތަކާ މަސްއޫލިއްޔަތުތައް ހަވާލުކުރާނީ ފެމިލީ ޕްރޮޓެކްޝަން އޮތޯރިޓީއަށް ކޮންމެ އަހަރަކު ކަނޑައަޅާ ބަޖެޓުގެ ތެރެއިން ކައުންސިލުތަކުގެ މަސްއޫލިއްޔަތު އަދާކުރުމަށް ބޭނުންވާ ވަސީލަތްތައް އެ ކައުންސިލަކަށް ފޯރުކޮށްދިނުމަށް ފަހުގައެވެ.
ކައުންސިލުތަކުން ގެވެށި އަނިޔާގެ މައްސަލަތަކުގައި އަޅަން ޖެހޭ ފިޔަވަޅުތައް އަޅަން ޖެހެނީ ކައުންސިލުގައި އެކަމަށް ހާއްސަކޮށްފައި ތިބޭ މުވައްޒަފުންނެވެ. މި މުވައްޒަފުންގެ ތެރޭގައި ކައުންސިލުގެ މެމްބަރަކުވެސް ހިމެނިދާނެ ކަމަށް ގަވާއިދުގައި ވަނީ ބުނެފައެވެ.
ގެވެށި އަނިޔާގެ މައްސަލައަކާ ގުޅިގެން ކައުންސިލުގެ މަސްއޫލިއްޔަތު އަދާކުރުމުގައި ލިބޭ މައުލޫމާތުގެ ސިއްރުވެސް ހިފަހައްޓަން ޖެހޭނެއެވެ. އެފަދަ އެއްވެސް މައްސަލައަކާ ގުޅިގެން މީޑިއާ މެދިވެރިކޮށް ނުވަތަ އެނޫން ގޮތަކަށް ވެސް އެ މައުލޫމާތު ތިންވަނަ ފަރާތަކާ ހިއްސާކޮށްގެން ނުވާނެކަމަށް ވެސް ގަވާއިދުގައި ވަނީ ބަޔާންކޮށްފައެވެ.
މި ގަވާދަށް އަމަލު ކުރަން ފަށާނީ ބުދަ ދުވަހުން ފެށިގެން ތިން މަސް ދުވަސް ފަހުންނެވެ.
