އެންމެ ހަ އޯވަރުން ލަންކާ ބަލިކޮށް، ޗެމްޕިއަންކަން އިންޑިޔާ އަށް

އެންމެ ހަ އޯވަރު ތެރޭގައި ސްރީލަންކާ 10 ވިކެޓުން ބަލިކޮށް އޭޝިޔާ ކަޕް ކްރިކެޓް މުބާރާތުގެ ޗެމްޕިއަންކަން އިންޑިޔާ ހޯދައިފި އެވެ.

ލަންކާގައި ކުޅުނު ފައިނަލް މެޗުގައި ފުރަތަމަ ބެޓްކުރަން ނުކުތީ ލަންކާ އެވެ. އެކަމަކު މުޅި ޓީމަށް މައްސަލަ ދިމާވީ އެންމެ އޯވަރަކުން މުހިންމު ހަތަރު ކުޅުންތެރިން ނުބައިވުމުންނެވެ. އެންމެ ފަހުން 15 އޯވަރުގެ ތެރޭގައި ހުރިހާ ކުޅުންތެރިން ނުބައިވެގެން ލަންކާ އަށް ހެދުނީ އެންމެ 50 ލަނޑެވެ.

ޖަވާބުގައި ކުޅެން ނުކުމެ އިންޑިޔާ މޮޅުވީ ކުޅުންތެރިއަކު ނުބައިނުވެ، ހަ އޯވަރުގެ ތެރޭގައި 51 ލަނޑު ހެދުމުންނެވެ.

ހަ ގައުމު ޖުމުލަ 13 މެޗު ކުޅުނު މުބާރާތުގެ އެންމެ މޮޅު ކުޅުންތެރިއަކަށް ހޮވުނީ އިންޑިޔާގެ ކުލްދީޕް ޔަދާވް އެވެ. އެންމެ ގިނަ ލަނޑު ޖެހީ އިންޑިޔާގެ ޝުބްމަން ގިލް އެވެ. އޭނާ 302 ލަނޑު ޖެހި އެވެ. އެންމެ ގިނަ ވިކެޓް ނެގީ ލަންކާގެ މަތީޝާ ޕަތިރަނާ އެވެ. އޭނާ 11 ވިކެޓް ނެގި އެވެ.

އޭޝިޔާ ކަޕުގެ އެންމެ ކާމިޔާބު ގައުމަކީ އިންޑިޔާ އެވެ. އެ ގައުމު ވަނީ އަށް ފަހަރު ތަށި ހޯދައިފަ އެވެ.