ރިޔާސީ އިންތިޚާބުގައި މައްސަލަ ޖެހުނު ކަންކަން ދެވަނަ ބުރުގައި ރަނގަޅުކުރާނެ ކަމަށް އިލެކްޝަން ކޮމިޝަން (އީސީ) އިން ބުނެފިއެވެ.
އީސީގެ ނައިބު ރައީސް އިސްމާއީލު ހަބީބު ރާއްޖެއެމްވީއަށް ވިދާޅުވީ ސެޕްޓެންބަރު މަހުގެ 9 ވަނަ ދުވަހު ބޭއްވުނު ރިޔާސީ އިންތިޚާބުގެ ދާއިމީ ނަތިޖާ ލިބުމުން، ލަފާދޭ ކޮމިޓީގެ މަޝްވަރާއާ އެކީ މަޝްވަރާ ބައްދަލުވުންތައް ބާއްވާނެ ކަމަށެވެ. އެ ބައްދަލުވުމުގައި މި އިންތިޚާބުގައި ފާހަގަކުރެވުނު މައްސަލަތަކަށް ރިޔާއަތް ކުރާނެ ކަމަށް ހަބީބު ވިދާޅުވިއެވެ. އަދި ވިދާޅުވީ މިމަހުގެ 30 ގައި ބާއްވާ އިންތިޚާބު ހުރިހާ ގޮތަކުން ފުރިހަމަ އިންތިޚާބަކަށް ހެދުމަށް މަސައްކަތް ކުރާނެ ކަމަށާއި، ފުރަތަމަ ބުރުގައި ބޭއްވުނު އިންތިޚާބުގައި ދިމާވި މައްސަލަތައް ތަކުރާރުނުވާނެ ގޮތަށް ފިޔަވަޅުތައް އަޅާނެ ކަމަށެވެ.
މީގެ އިތުރުން ހަބީބު ވިދާޅުވީ ވޯޓުލާ ބޫތް ބަހައްޓާގައި ހުންނަ ގޮތުން ވޯޓުގެ ސިއްރުކަން ގެއްލޭ ކަމަށް އޮބްޒާވަރުންނާއި، މަންދޫބުން ފާހަގަކޮށްފައިވާ މައްސަލައަށް ވެސް ލަފާދޭ ކޮމިޓީގައި މަޝްވަރާކުރާނެ ކަމަށެވެ. އަދި އެމައްސަލައަށް ވެސް ހައްލެއް ގެންނާނެ ކަމަށް ހަބީބު ވިދާޅުވިއެވެ. އަދި ވިދާޅުވީ ގޮތެއް ނިންމާނީ ކޮމިޓީގައި މަޝްވަރާ ކުރުމަށްފަހު ކަމަށެވެ.
ސެޕްޓެންބަރު މަހު 9 ވަނަ ދުވަހު ކުރިއަށް ދިޔަ ރިޔާސީ އިންތިޚާބުގައި ބައެއް މަރުކަޒުތަކަށް ދިއުމުން، ވޯޓުލާ މަރުކަޒުތަކުގައި ވޯޓޫލާ ބޫތް ބަހައްޓާގައި ހުންނަ ގޮތުން ވޯޓުގެ ސިއްރުކަން ގެއްލޭކަމަށް ބައެއް އޮބްޒާވަރުންނާއި މަންދޫބުން ބުނެފައިވެއެވެ.
އިންތިޚާބުގެ ގައުމީ ކޮމްޕްލެއިންޓްސް ބިއުރޯއަށް 26 މައްސަލަ އަދި ސިޓީ، އަތޮޅު ކޮމްޕްލެއިންޓްސް ބިއުރޯތަކަށް 25 މައްސަލަ އާއެކު ޖުމުލަ 51 މައްސަލަ ހުށަހަޅާފައިވެއެވެ. ރިޔާސީ އިންތިޚާބާއި ގުޅިގެން ހުށަހަޅާފައިވާ މައްސަލަތަކުގެ ތެރޭގައި ހިމެނެނީ ކެމްޕޭން ކުރުމާގުޅޭ 3 މައްސަލަ އާއި އޮބްޒާވަރުންނާ ގުޅޭ މައްސަލައަކާއި ވޯޓުލުމުގެ ހައްގާގުޅޭ 10 މައްސަލަ، ރަޖިސްޓްރޭޝަނާ ގުޅޭ 8 މައްސަލަ، އޮފިޝަލުންނާގުޅޭ 11 މައްސަލަ، ވޯޓުގެ ސިއްރުކަމާ ގުޅޭ 14 މައްސަލަ، ރިޝްވަތު ދިނުމާ ގުޅޭ 2 މައްސަލަ އަދި އެހެނިހެން 2 މައްސަލައެވެ.
މިމައްސަލަތަކަށް އިޝާރަތް ކުރައްވައި ހަބީބު ވިދާޅުވީ މީގެ ތެރެއިން ވަގުތުން ހައްލުކުރެވެން ހުރި މައްސަލަތައް ވަނީ ހައްލުކޮށްފައިވާ ކަމަށެވެ. އަދި ތަހުގީގު ކޮށްގެން އިތުރަށް ބަލަންޖެހޭ މައްސަލަތައް ތަހުގީގު ކުރުމުގެ މަސައްކަތް ކުރިޔަށް ދާ ކަމަށް ވެސް އޭނާ ވިދާޅުވިއެވެ.
