މިދިޔަ 5 އަހަރު އެއްވެސް ފުލުހަކަށް ޕްރޮމޯޝަން ދިނުމަށް ސަރުކާރުން އަންގާފައިނުވޭ: ފުލުހުން
10 ސެޕްޓެމްބަރު 2023 | އާދީއްތަ 11:55އިންތިޚާބާއި ގުޅިގެން ވެސް، އަދި އެނޫން އިރެއްގައިވެސް ފުލުހަކަަށް ޕްރޮމޯޝަން ދިނުމަށް އަންގާފައިނުވޭ
ވޯޓުލާ މަރުކަޒެއްގެ ކައިރީގައި ފުލުހެއް ހަރަކާތްތެރިވަނީ
މިފާއިތުވި ފަސް އަހަރުގެ ތެރޭގައި އެއްވެސް ފުލުހަކަށް ޕްރޮމޯޝަން ދިނުމަށް ސަރުކާރުން އަންގާފައިނުވާ ކަމަށް ދިވެހި ފުލުހުންގެ ޚިދުމަތުން ބުނެފިއެވެ.
ފުލުހުން މިހެން ބުނެފައިވަނީ ރާއްޖޭގެ މީޑިއާއެއްގައި ދިވެހި ފުލުހުންގެ ޚިދުމަތުގައި މަސައްކަތް ކުރާ 300 ފުލުހަކަށް ޕްރޮމޯޝަން ދިނުމަށް ސަރުކާރުން އަންގާފައިވާ ކަމަށް ރިޕޯޓުކުރުމާއި ގުޅިގެންނެވެ. އަދި ޕްރޮމޯޝަން ދިނުމަށް އަންގާފައިވަނީ ރިޔާސީ އިންތިޚާބުގެ ދެވަނަ ބުރުގައި އެ ފުލުހުންގެ ތާއީދު އެމްޑީޕީގެ ރިޔާސީ ކެންޑިޑޭޓް ރައީސުލްޖުމުހުރިއްޔާ އިބްރާހިމް މުހައްމަދު ޞާލިހްއަށް ހޯދުމުގެ ގޮތުން ކަމަށެވެ. މީގެ އިތުރުން ހުޅުމާލޭ ފޭސް 2 ގައި އަޅާ ފްލެޓުތަކުން 200 ފްލެޓް ބައެއް ފުލުހުންނަށް ދޭން ކަނޑައަޅަން ވެސް ސަރުކާރުން މިހާރު އަންގާފައިވާ ކަަމަށް ރިޕޯޓުކޮށްފައިވެއެވެ.
މި ޚަބަރާއި ގުޅިގެން ފުލުހުން ބުނީ އިންތިޚާބާއި ގުޅިގެން ވެސް، އަދި އެނޫން އިރެއްގައިވެސް މިދިޔަ 5 އަހަރު ތެރޭ އެއްވެސް ފުލުހަކަަށް ޕްރޮމޯޝަން ދިނުމަށް ސަރުކާރުން އަންގާފައިނުވާ ކަމަށެވެ.
ފުލުހުންގެ މުއައްސަސާއަކީ މިނިވަންކަމާއެކު ގައުމާއި، ރައްޔިތުންގެ ސަލާމަތަށް މަސައްކަތް ކުރާ އެންމެ ބޮޑު އެއް މުއައްސަސާއެވެ. ފުލުހުންނަށް އަމާޒުކޮށް ނަފްރަތު އުފެދޭ ގޮތަށް މައުލޫމާތުތައް ނުފެތުރުމަށް މީގެ ކުރިން ވެސް އެމުއައްސަސާއިން ވަނީ އިލްތިމާސްކޮށްފައެވެ.
