ބޮޑު ބައްޔެއް، ޖަރުމަނު ކޯޗު ބުނަނީ އަދިވެސް އެންމެ ރަނގަޅީ އޭނާ ކަމަށް
އޭނާގެ ކޯޗުކަމުގައި ޖަރުމަނުގެ ފަހު 16 މެޗުގެ ތެރެއިން މޮޅުވީ ހަތަރު މެޗުން
ހަންސީ ފްލިކް
ޖަޕާން އަތުން 41-ގެ ބޮޑު ތަފާތަކުން ބަލިވި ނަމަވެސް ޖަރުމަނުގެ ކޯޗުކަމަށް އަދިވެސް އެންމެ ރަނގަޅީ އޭނާ ކަމަށް ކޯޗު ހަންސީ ފްލިކް ބުނެފި އެވެ.
އޭނާ މިހެން ބުނިއިރު ފްލިކް ކޯޗުކަމާ ހަވާލުވި ފަހުން މިވީ ދެ އަހަރު ތެރޭގައި ޖަރުމަނަށް ކާމިޔާބެއް ނުލިބެ އެވެ. އަދި އޭނާގެ ކޯޗުކަމުގައި އެންމެ ފަހުން ކުޅުނު 16 މެޗުގެ ތެރެއިން ޖަރުމަނު މޮޅުވީ ވެސް އެންމެ ހަތަރު މެޗުންނެވެ. ރޭ ޖަޕާން އަތުން ބަލިވިއިރު މިދިޔަ އަހަރުގެ ވޯލްޑްކަޕުގެ ގްރޫޕް ސްޓޭޖުން ކެޓިއިރު ވެސް ޖަޕާން އަތުންވީ ބައްޔެވެ. މިހެންވެ ރޭގެ މެޗު ހިނގަމުންދިޔައިރު ސަޕޯޓަރުންގެ މަލާމާތާއި ފުރައްސާރަ ޓީމަށް އަމާޒުވި އެވެ.
ނަމަވެސް މެޗަށް ފަހު ބަޔާން މިއުނިކްގެ ކުރީގެ ކޯޗު ބުނަނީ އޭނާގެ މަގާމާމެދު އިތުބާރު ގެއްލުވާނުލާ ކަމަށެވެ.
ނަމަވެސް އޭނާ ބުނީ ފުޓްބޯޅަ އަކީ އެކިގޮތްގޮތަށް ކަންކަން އަވަހަށް ބަދަލުވާ ކުޅިވަރެއްކަން އެނގޭ ކަމަށާއި ކުރިމަގު އޮންނާނެ ގޮތް ދެނެގަންނަން އޭނާ އަށް ވެސް ނޭނގޭ ކަމަށެވެ.
ޖަރުމަނުގެ މިވަގުތު އެންމެ ބޮޑު ވުމަކީ މީގެ އަށް މަސް ފަހުން އަންނަ އަހަރު ބާއްވާ ޔޫރޯ ފުޓްބޯޅަ މުބާރާތަށް ޓީމު ރަނގަޅަށް ތައްޔާރުނުކުރެވިދާނެ ކަމާމެދު އެވެ. ނަމަވެސް ފުޓްބޯޅަ ފެޑަރޭޝަނުން ފްލިކްގެ މަގާމާމެދު ވަކި އެއްޗެއް ނުބުނެ އެވެ.
