ޖަގަހަތައް ބަންދުކޮށްގެން އިދާރީ މަސައްކަތްކުރެވިދާނެ، ކެމްޕެއިންގެ އެއްވެސް ހަރަކާތެއް ނުހިންގޭނެ: ހަބީބު
9 ސެޕްޓެމްބަރު 2023 | ހޮނިހިރު 01:08ޖަގަހަތަކުގެ އެތެރޭގައި ޕާޓީތަކުގެ މެމްބަރުންނަށް އިދާރީ މަސައްކަތްކުރެވޭނެ، ނަމަވެސް ޖަގަހަތައް ހުންނަންވާނީ ބަންދުކޮށްފައި
އިލެކްޝަންސް ކޮމިޝަންގެ ނައިބު ރައީސް އިސްމާއީލު ހަބީބު
ހުކުރު ދުވަހުގެ އިރުއޮއްސި 6:00ން އާދީއްތަ ދުވަހުގެ ހެނދުނު 6:00 އާ ދެމެދު އެއްވެސް ކެންޑިޑޭޓެއްގެ ކެމްޕޭން ޖަގަހައެއް ހުޅުވާފައި ބެހެއްޓުމަކީ ހުއްދަ ކަމެއް ނޫން ކަމަށް އިލެކްޝަން ކޮމިޝަން (އީސީ)ން ނިންމާފައިވާ ނިންމުމަށް މިހާރު ބަދަލުގެނެސްފައިވާކަމަށް އެކޮމިޝަންގެ ނައިބު ރައީސް އިސްމާއީލު ހަބީބު ވިދާޅުވެއްޖެއެވެ.
ކުރިން އީސީން ވަނީ ސެޕްޓެމްބަރު 8 ވާ ހުކުރު ދުވަހުގެ އިރުއޮއްސި 6:00 އިން ފެށިގެން، ސެޕްޓެމްބަރު 10 ވާ އާދީއްތަ ދުވަހުގެ ހެނދުނު 6:00 އާ ދެމެދު، ސިޔާސީ ޕާޓީއެއްގެ ނުވަތަ އެއްވެސް ކެންޑިޑޭޓެއްގެ ކެމްޕޭން ޖަގަހަ އެއް ހުޅުވާފައި ބެހެއްޓުމަކީ، ހުއްދަ ކަމެއް ނޫންކަން، ރިޔާސީ ކެންޑިޑޭޓުންގެ ރަސްމީ އިންތިޚާބީ އޭޖެންޓުންނަށް އަންގާފައެވެ. އަދި މަނާގަޑީގައި ކެމްޕޭން ޖަގަހަ ހުންނަންޖެހޭނީ ބަންދުކޮށްފައި ކަމަށްވެސް ކޮމިޝަނުން ނިންމިއެވެ.
ނަމަވެސް ހުކުުރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮމިޝަންގެ ނައިބު ރައީސް ވިދާޅުވީ ލަފާދޭ ކޮމިޓީގައި މަޝްވަރާކުރިއިރު ގިނަ ސިޔާސީ ޕާޓީތަކަކުން ޖަގަހަތަކުގައި ތިބެގެން މަސައްކަތްކުރެވޭނެ ގޮތް ބޭނުންވާތީ އެކަމާއި ގުޅޭގޮތުން ކޮމިޝަންގެ މެމްބަރުންގެ މެދުގައި މަޝްވަރާކޮށްފައިވާކަމަށެވެ. އަދި ކޮމިޝަންގެ މެމްބަރުންގެ ނިންމުމަކީ ޖަގަހަތަކުގެ އެތެރޭގައި ޕާޓީތަކުގެ މެމްބަރުންނަށް އިދާރީ މަސައްކަތްކުރެވޭނެކަމަށާއި ނަމަވެސް ޖަގަހަތައް ހުންނަންވާނީ ބަންދުކޮށްފައިކަމަށެވެ.
ހަބީބު ވިދާޅުވީ ކެމްޕެއިން ކުރަން މަނާވަގުތުތަކުގައި ސޯޝަލް މީޑިޔާ މެދުވެރިކޮށްވެސް ކެމްޕެއިން ނުކުރެވޭނެކަމަށެވެ. އަދި މިކަންކަމަށް ހުރިހާ އެންމެންވެސް ސަމާލުކަން ދިނުމަށް ހަބީބު އެދިވަޑައިގެންނެވިއެވެ.
