ތުރާކުނުގައި އެމްޓީސީސީން ކުރިއަށްގެންދާ 2 މަޝްރޫއެއްގެ އަމަލީ މަސައްކަތް ފަށައިފި
8.16 ހެކްޓަރުގެ ބިން ހިއްކާނެ
ތުރާކުނު މިސްކިތުގެ ބިންގާ އަޅުއްވަނީ
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހއ. ތުރާކުނުގައި ހިންގާ ދެ މަޝްރޫއެއްގެ އަމަލީ މަސައްކަތް ފަށައިފިއެވެ.
އަންގާރަ ދުވަހު އެ ރަށުގައި ބޭއްވި ރަސްމިއްޔާތުގައި ފަށާފައިވަނީ ތުރާކުނު މިސްކިތުގެ މަސައްކަތާއި ބިން ހިއްކުމުގެ މަސައްކަތާއި ގޮނޑުދޮށް ހިމާޔަތް ކުރުމުގެ މަސައްކަތެވެ. މި މަޝްރޫއުތައް ފެށުމަށް ބޭއްވި ރަސްމިއްޔާތުގައި ރައްޔިތުންގެ މަޖިލީހުގެ ހޯރަފުށި ދާއިރާގެ މެންބަރު އަހުމަދު ސަލީމާއި ތުރާކުނު ކައުންސިލްގެ ރައީސް އަލީ އަބްދުއްލަތީފާއި އެމްޓީސީސީގެ ސީއީއޯ އާދަމް އާޒިމްގެ އިތުރުން އެ ކުންފުނީގެ އިސް ބޭފުޅުން ބައިވެރިވެވަޑައިގެންނެވިއެވެ.
ތުރާކުނު މިސްކިތް ބިނާ ކުރުމަށް އެމްޓީސީސީއާ ހަވާލުކޮށްފައިވާއިރު މި މަޝްރޫއުގެ ދަށުން އެއްފަހަރާ 300 މީހުންނަށް ނަމާދު ކުރެވޭނެ މިސްކިތެއް ބިނާ ކުރާނެއެވެ. މި މިސްކިތުގެ މަސައްކަތް އެ ކުންފުންޏާ ސަރުކާރުން ހަވާލުކޮށްފައިވަނީ 11.21 މިލިއަން ރުފިޔާއަށެވެ.
މި މަޝްރޫއާ ގުޅޭގޮތުން ހޯރަފުށީ ދާއިރާގެ މެންބަރު އަހުމަދު ސަލީމް ވިދާޅުވީ އެމްޓީސީސީން ކޮލިޓީ މަސައްކަތެއްކޮށް، ތާވަލާ އެއްގޮތަށް މިސްކިތުގެ މަސައްކަތް ނިންމާނެ ކަމާމެދު ޝައްކު ނުކުރައްވާ ކަމަށެވެ. ކުރިން މި މަސައްކަތް އެހެން ބަޔަކާ ހަވާލުކޮށް، ލަސްވުމުގެ ސަބަބުން އަލުން އެމްޓީސީސީއާ ހަވާލުކުރަން ސަރުކާރުން ނިންމީ ވެސް އެ ކުންފުނިން މަސައްކަތް ކޮށް ނިންމާނެ ކަމުގެ ޔަގީންކަން އޮތުމުގެ ސަބަބުން ކަމަށާއި އެއިންވެސް އެނގެނީ މި ސަރުކާރުން ކުޑަ ރަށެއް އަދި ބޮޑު ރަށެއްގެ ތަފާތުކުރުން ނުގެންގުޅޭނެކަން ކަމަށް އޭނާ ވިދާޅުވިއެވެ.
އެމްޓީސީސީގެ ސީއީއޯ އާދަމް އާޒިމް ވިދާޅުވީ މި ސަރުކާރުން މަސައްކަތް ކުރަނީ ތަރައްޤީގެ މަޝްރޫއުތައް ބާރު ސްޕީޑުގައި ކުރިއަށްގެންދިއުމަށް ކަމަށާއި އެ ވިސްނުމާއެއްގޮތަށް ތުރާކުނުގައި ހިންގާ މަޝްރޫއުތައް ވެސް ނިންމައި ހަވާލު ކުރައްވާނެ ކަމަށެވެ. އަދި އެ ރަށުގެ މިސްކިތުގައި އަންނަ ރޯދަ މަހު ނަމާދު ކުރަން ފަށާނެ ކަމުގެ ޔަގީންކަން ވެސް އާޒިމް ދެއްވިއެވެ.
ތުރާކުނުގައި 707 މީހުންގެ އާބާދީއެއް އޮންނައިރު އެ ރަށުން ގޯތި ދޫކުރުމަށް ބިން ނެތުމުގެ ޝަކުވާ އެ ރަށުގެ ރައްޔިތުން ކުރެއެވެ. މިކަމަށް ހައްލު ހޯދައިދިނުމަށް އެ ރަށުގައި 8.16 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. އަދި ރަށްގިރުމުގެ މައްސަލަ ހައްލު ކުރުމަށް 1215 މީޓަރުގެ ސަރަޙައްދެއްގައި ރިވެޓްމެންޓް ޖަހައި، ސޭންޑް ސަރޗް ސަރވޭއެއް ހެދުމުގެ މަސައްކަތް ވެސް ކުރާނެއެވެ.
މި މަޝްރޫއުގެ މަސައްކަތް އެމްޓީސީސީއާ ހަވާލު ކުރީ 152.04 މިލިއަން ރުފިޔާއަށެވެ.
