ސަންޗޯއާއި ޓެން ހާގްއާ ދެމެދު ގިނަ މައްސަލަތަކެއް

މެންޗެސްޓަރ ޔުނައިޓެޑުގެ ކޯޗު، އެރިކް ޓެން ހާގްއާއި ޖޭޑަން ސަންޗޯއާ ދެމެދު މައްސަލަތަކެއް ޖެހި، ދެމީހުންގެ ދެމެދުގައި ބަހުގެ ހަމަލާތައް ފޮނުވަން ފަށައިފިއެވެ.

އާދިއްތަ ދުވަހުގެރޭ އާސެނަލް ކައިރިން 3-1ގެ ނަތީޖާއަކުން ބަލިވި މެޗުގައި ޔުނައިޓެޑުގެ ސްކޮޑުގައި ސަންޗޯ ހިމަނާފައެއް ނުވެއެވެ. އެކަމާ ގުޅޭގޮތުން ޓެން ހާގްއާ ސުވާލުކުުރުމުން ބުނީ، ފަރިތަކުރުންތަކުގައި ސަންޗޯ ފަރުވާ ކުޑަވެ، އޭނާ ބޭނުންވާ "ލެވެލް"އަށް ޕާފޯމް ނުކުރެވޭތީ ކަމަށެވެ.

ޓެން ހާގްގެ ވާހަކަތަކާ ގުޅޭގޮތުން ސަންޗޯ ވަނީ ސޯޝަލް މީޑިއާގައި ޕޯސްޓެއް ހިއްސާކޮށްފައެވެ. ސަންޗޯ ބުނެފައިވަނީ، ފެންނަހާ ވާހަކަތަކެއް ގަބޫލު ނުކުރުމަށާއި، އޭނާއާ ގުޅޭގޮތުން ދޮގު ވާހަކަ ފެތުރުމުގެ ފުރުސަތު ނުދޭނެ ކަމަށެވެ.

ސަންޗޯ އިތުރަށް ބުނީ މި ހަފުތާގެ ފަރިތަކުރުންތަކުގައި އޭނާ ވަރަށް ރަނގަޅަށް މަސައްކަތްކުރި ކަމަށެވެ. އަދި އޭނާ ޓީމަށް ނުނެގުމުގައި ކޮންމެވެސް އެހެން ސަބަބެއް އޮތް ކަމަށް ގަބޫލުކުރާކަމަށް ސަންޗޯ ބުންޏެވެ. އޭނާ އިތުރަށް ބުނީ ކޯޗިން ސްޓާފުންގެ ނިންމުންތަކަށް ފުރިހަމައަށް އިހުތިރާމްކުރާ ކަމަށާއި، ޔުނައިޓެޑުގައި އޭނާ ކުޅެނީ މޮޅު ކުޅުންތެރިންތަކަކާއެކު ކަމުން، ކޮންމެ ހަފުތާއެއްގައިވެސް ތަފާތު ގޮންޖެހުންތައް އަންނާނެ ކަމަށެވެ.

ފެބްރުއަރީ މަހު ޕްރިމިއަރ ލީގުގައި ސަންޗޯ ލަނޑު ޖެހުމުން ޓެން ހާގް ވަނީ އޭނާއަށް ވަރަށް ބޮޑަށް ތައުރީފުކޮށްފައެވެ. ސަންޗޯ ވަނީ ޖިސްމާނީ އަދި ނަފްސާނީ މައްސަލަތަކާ ހަނގުރާމަކޮށް، ތިން މަސް ދުވަހު ކުޅުމާ ދުރުގައިވެސް ހުރެފައެވެ.

ބޮރޫޝިއާ ޑޯޓްމަންޑުން ޔުނައިޓެޑަށް ސަންޗޯ ބަދަލުވީ 2021 ވަނަ އަހަރު، 73 މިލިއަން ޕައުންޑަށެވެ. ނަމަވެސް، އޭނާއަށް ޔުނައިޓެޑުގައި އެންމެ އެދެވޭ ކުޅުމެއް ދެއްކިފައެއް ނުވެއެވެ. 58 މެޗު ކުޅެ، އޭނާއަށް ޖެހިފައިވަނީ ނުވަ ލަނޑެވެ.