ލިޓަން މަރާލިކަމަށް ތުހުމަތުކުރެވޭ ނިޒާމަށް ކުރާ ދައުވާގެ އަޑުއެހުމެއް މާދަމާ
ގާޒީ ވަނީ އޭނާ ޝަރީއަތް ނިމެންދެން ބަންދުކޮށްފައި ހުރި ހުރުން ދެމެހެއްޓުމަށް ނިންމަވާފައި
ބަންގްލަދޭޝްއަށް ނިސްބަތްވާ މުހައްމަދު ލިޓަން (މަތީ ފޮޓޯގައި) އަދި އޭނާ މަރާލި ކަމަަށް ތުހުމަތުކުރެވޭ، ގދ. ތިނަދޫ މަނާރު، މުހައްމަދު ނިޒާމް
ބަންގްލަދޭޝަށް ނިސްބަތްވާ މުހައްމަދު ލިޓަންގެ މަރުގެ މައްސަލާގައި، އޭނާ މަރާލި ކަމަށް ތުހުމަތުކުރެވޭ، ގދ. ތިނަދޫ، މަނާރު، މުހައްމަދު ނިޒާމުގެ މައްޗަށް ކުރާ ދައުވާގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ތާވަލްކޮށްފިއެވެ.
މީގެ ކުރިން އޭނާ ޝަރީއަތް ނިމެންދެން ބަންދުކޮށްފައި ވާއިރު، މިއީ ޖިނާއީ ބޮޑު މައްސަލައަކަށް ވެފައި، އޭނާ މި މައްސަލާގައި ފިލައިގެންވެސް އުޅެފައިވާތީ، ގާޒީ ވަނީ އޭނާ ޝަރީއަތް ނިމެންދެން ބަންދުކޮށްފައި ހުރި ހުރުން ދެމެހެއްޓުމަށް ނިންމަވާފައެވެ.
މި މައްސަލާގައި ނިޒާމް ދައްކާފައި ހުރި ވާހަކަތަކާއި އެހެން ހެކިތަކުން، އޭނާ ކުރި ކަމަކުން ލިޓަން މަރުވެފައިވާކަމަށް ގަބޫލުކުރެވޭ ކަމަށް ޕްރޮސެކިއުޓަރ ޖެނެރަލް އޮފީހުން ބުނެފައިވެއެވެ. އަދި ނިޒާމް ކުރި ކަމަކީ މީހަކު މަރުވެދާނެ ފަދަ ކަމެއް ކަމަށާއި، އެއީ އެނޫން ނަތީޖާއެއް ނުނިކުންނާނެ ކަމެއްކަން ދައުލަތުން ކޯޓުގައި ސާބިތުކޮށްދޭނެ ކަމަށްވެސް ބުނެފައިވެއެވެ.
ލިޓަންއާއި ނިޒާމް ތެޔޮ ބޯޓެއްގައި ކަނޑުމައްޗަށް ނުކުމެ އުޅެނިކޮށް ޚަބަރެއް ނުވެގެން އެ މީހުން ހޯދަން ފެށީ މިދިޔަ ޑިސެމްބަރުމަހުގެ 28 ވަނަ ދުވަހުއެވެ. އެ ދެ މީހުން ހޯދުމުގެ މަސައްކަތް ކުރިއަށްދަނިކޮށް ހުޅުލޭ ނެރު ކައިރިން، އެ ދެ މީހުން ދަތުރުކުރި ތެޔޮބޯޓު ވަނީ ފެނިފައެވެ.
ނިޒާމްވެސް ގެއްލިފައި ވާކަމަށްބުނެ ފުލުހުން އޭނާއާއި ލިޓަން ހޯދުމުގެ މަސައްކަތް ކުރަމުންދަނިކޮށް، ގެއްލުނުތާ ތިން ދުވަސް ފަހުން ނިޒާމް މާލެއިން ފެނިގެން، ފުލުހުން ވަނީ ޖެނުއަރީ 3ގައި އޭނާ ހައްޔަރުކޮށްފައެވެ.
