ލޯތްބާއި ކުލުނާއި އޯގާތެރިކަން ނެތި އެއްވެސް ރައީސްއަކަށް ގައުމު ތަރައްގީ ނުކުރެވޭނެ ކަމަށް އެމްޑީއޭގެ ރައީސް އަހުމަދު ސިޔާމް މުހައްމަދު ވިދާޅުވެއްޖެއެވެ.

އާދިއްތަ ދުވަހުގެ ރޭ ހދ.މަކުނުދޫގައި ބޭއްވެވި ބަނދަރު ބައްދަލުވުމުގައި ސިޔާމް ވިދާޅުވީ މިއަދުގެ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހަކީ އަނިޔާވެރި ބޭފުޅެއް ނޫން ކަމަށާއި، އެކަން މުޅި ރާއްޖޭގެ ރައްޔިތުން ގަބޫލުކުރާނެ ކަމަށެވެ. ގައުމަށް ތަރައްގީ ގެނައުމުގައި ލޯތްބާއި ކުލުނާއި އޯގާތެރިކަން އިސްކުރަންޖެހޭ ކަމަށާއި، އެކަންކަމާއި ނުލައި ގައުމަށް ތަރައްގީ ނުގެނެވޭނެ ކަމަށް ސިޔާމް ވިދާޅުވިއެވެ. އަދި ވިދާޅުވީ އޯގާތެރި ރައީސްއެއް ދިވެހިންނަށް ލިބިގެންދިޔައީ 2018 ވަނަ އަހަރުން ފެށިގެން ކަމަށެވެ. މިއަދުގެ ރައީސް އަކީ އޯގާތެރި، ހިކުމަތްތެރި, ވިސްނުންތެރި ރައީސްއެއް ކަމަށެވެ.

މަކުނުދޫގެ ތަރައްގީއަށް އިޝާރާތް ކުރައްވައި ސިޔާމް ވިދާޅުވީ އެރަށުގައި އެޅިދާ އެއާޕޯޓާއެކު ރަށަށް ވަރަށް ބޮޑެތި ބަދަލުތަކެއް އަންނާނެ ކަމަށެވެ. އެއާޕޯޓާއެކު ވަޒީފާތައް އިތުރުވެ، ދަރިންގެދަރީންނަށް ފައިދާކުރާނެ ކަމަށާއި، ފަތުރުވެރިކަން ކުރިއަރައިގެންދާނެ ކަމަށް ސިޔާމް ވިދާޅުވިއެވެ. އަދި ވިދާޅުވީ ރަށު ފަތުރުވެރިކަމާއެކު، ރަށުގެ އިގްތިސާދު ވެސް 10 ގުނަ އިތުރުވާނެ ކަމަށެވެ.

މީގެ ކުރީ ސަރުކާރުތަކުން ކަންކަންކޮށްފައިވާ ގޮތަށް އިޝާރާތް ކުރައްވައި ސިޔާމް ވިދާޅުވީ ތަރައްގީ ގެނެސްދިނީ ބޮޑެތި އާބާދީތަކަށް ކަމަށާއި، އެކަހެރިވެފައިވާ ރަށްތައް ވަރަށް ބޮޑަށް ބާކީކޮށްފައިވާ ކަމަށެވެ. ނަމަވެސް މިސަރުކާރުން އެގޮތަށް އަމަލުނުކުރާނެ ކަމަށް ސިޔާމް ވިދާޅުވިއެވެ.

މީގެ އިތުރުން މި ބަނދަރު ބައްދަލުވުމުގައި ސިޔާމް ވަނީ ރިޔާސީ އިންތިޚާބުގައި ވާދަކުރައްވާ ޖޭޕީގެ ލީޑަރު ގާސިމް އިބްރާހީމް އިތުރުފުޅު ނުހެއްދެވުމަށް ގޮވާލައްވާފައެވެ. ސިޔާމް ވިދާޅުވީ، އެމްޑީއޭ ވެސް އަދި އެބޭފުޅާ ވެސް ހުންނަވާނީ ރައީސް ސާލިހާއެކު ކަމަށެވެ. ގާސިމްއަކީ ވަރަށް އިހުތިރާމް ކުރައްވާ ބޭފުޅެއް ކަމަށާއި، ނަމަވެސް އިތުރުފުޅު ނުހެއްދެވުމަށް އެދިވަޑައިގަންނަވާ ކަަމަށެވެ. އަދި އިންތިޚާބާއި ކުރިމަތިލައްވައިގެން އުޅުއްވުމަކީ ވަރަށް ބޭކާރު ކަމެއް ކަމަށާއި، އެއީ އަތުންދާ ފައިސާތަކެއްދާ ކަމެއް ކަމަށް ސިޔާމް ވިދާޅުވިއެވެ. އަދި ބޭކާރު މަސައްކަތްތަކެއް ނުކުރައްވާ، ރައީސް ސާލިހުގެ ފަހަތްޕުޅަށް އަރައިވަޑައިގަތުމަށް ސިޔާމް ގޮވާލެއްވިއެވެ.