މިސަރުކާރުން ކުރަން ވައުދުވި ކަންކަމުގެ ތެރޭގައި ކޮންމެވެސް ސިފައެއްގައި ކުރަން ނުފަށާއޮތް ކަމެއްނެތް: އަސްލަމް

މިސަރުކާރު އައިއިރު ކުރަން ވައުދުވެފައިވާ ކަންކަމުގެ ތެރޭގައި ކޮންމެސް ސިފައެއްގައި އެކަމެއް ކުރަން ނުފަށާ އޮތް ކަމެއް ނޯންނާނެކަމަށް ރައީސް ޞާލިހުގެ ރަނިންގމޭޓް މުހައްމަދު އަސްލަމު ވިދާޅުވެއްޖެއެވެ.

ތ އަތޮޅަށް ކުރެއްވި ކެމްޕެއިން ދަތުރުފުޅުގައި އެއަތޮޅު އޮމަދޫގެ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން އަސްލަމް ވިދާޅުވީ ރަށްރަށުގެ ތަރައްޤީއަށް ގިނަ މަސައްކަތްތަކެއް މިސަރުކާރުން ކޮށްފައިވާކަމަށެވެ. ޒުވާނުންނާއި ކުޑަކުދިންނާއި އުމުރުން ދުވަސްވީ މީހުންނަށް އަމާޒުކޮށްގެން ގިނަ ކަންތައްތަކެއް މިސަރުކާރުން ކޮށްދެމުންދާކަމަށް އަސްލަމް ވިދާޅުވިއެވެ.

އަސްލަމް ވިދާޅުވީ ކޮވިޑްގެ ސަބަބުން ބޭނުންވި ސްޕީޑްގައި ތަރައްޤީގެ މަޝްރޫޢުތައް ކުރިޔަށްނުދާކަމަށެވެ. ނަމަވެސް މިސަރުކާރުން ވީވައުދުގެ 90 އިންސައްތަ ފުރިހަމަކުރެވިފައިވާކަމަށް އަސްލަމް ވިދާޅުވިއެވެ.

އަސްލަމް ވިދާޅުވީ އޮމަދޫގައި މިސަރުކާރުން 10 މަޝްރޫޢު ހިންގަމުންދާކަމަށާއި އެމަޝްރޫޢުތަކަށް 64 މިލިއަން ރުފިޔާ ހޭދަވާނެކަމަށެވެ.